Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 1 | |
1:1 | И бысть внегда судяху судiи, бысть гладъ на земли. И иде мужъ от Виѳлеема Иудина обитати въ селѣ Моавли, самъ и жена его, и два сыны его: |
1:2 См.: 🔗Быт. 35:19 🔗Суд. 17:7 | имя же мужеви Елимелехъ, имя же женѣ его Ноемминь и имя двѣма сынома его маалонъ и хелеонъ, Ефраѳейстiи от Виѳлеема Иудина. И прiидоша въ село Моавле, и бѣша тамо. |
1:3 | И умре Елимелехъ мужъ Ноеммининъ, и остася она и оба сыны ея: |
1:4 См.: 🔗Неем. 13:23 | и пояста себѣ жены Моавитскiя: имя единѣй орфа и имя вторѣй руѳь: и жиша тамо до десяти лѣтъ. |
1:5 | И умроста оба сыны ея, маалонъ и хелеонъ, и остася жена от мужа своего и от обоихъ сыновъ ея. |
1:6 См.: 🔗4Цар. 8:3 | И воста она и обѣ снохи ея, и возвратишася съ села Моавля: зане услыша на селѣ Моавли, яко присѣти Господь людій своихъ дати имъ хлѣбы. |
1:7 | И отъиде от мѣста, идѣже бѣ, она и обѣ снохи ея съ нею, и идяху въ путь возвратитися въ землю Иудину. |
1:8 См.: 🔗Руф. 2:11 🔗Быт. 43:14 | И рече Ноемминь обѣма снохама своима: идите убо, возвратитеся каяждо въ домъ отца своего: да сотворитъ Господь съ вами милость, якоже сотвористе со умершими и со мною: |
1:9 См.: 🔗Руф. 3:1 | да дастъ Господь Богъ вамъ обрѣсти покой коейждо въ дому мужа своего. И цѣлова я: они же воздвигоша гласы своя и плакашася, |
1:10 | и рекоша ей: ни, но идемъ съ тобою въ люди твоя. |
1:11 | И рече Ноемминь: обратитеся убо, дщери мои, вскую идете со мною? или еще мнѣ сынове во утробѣ моей, и будутъ вамъ мужи? |
1:12 | возвратитеся убо, дщери мои и отидите, яко состарѣхся, и не буду мужу: аще же быхъ и рекла, яко у мене есть надежда, да буду мужу и рожду сыны, |
1:13 | вы ли пождете ихъ, дондеже возрастутъ? и вы ли удержитеся, да не будете иному мужу? ни, дщери мои, яко горько бысть мнѣ паче васъ, яко изыде на мя рука Господня. |
1:14 | И воздвигоша гласы своя, и плакаша паки. И цѣлова орфа свекровь свою, и возвратися въ люди своя, руѳь же послѣдова ей. |
1:15 | И рече Ноемминь къ руѳѣ: се, возвратися ятровь твоя къ людемъ своимъ и къ богомъ своимъ, возвратися убо и ты вслѣдъ ятрове своея. |
1:16 | И рече руѳь: не срящи мене то, еже оставити тебе или обратитися мнѣ от тебе, но идѣже идеши ты, и азъ пойду, и идѣже водворишися ты, водворюся и азъ: людiе твои людiе мои, и Богъ твой Богъ мой: |
1:17 См.: 🔗1Цар. 3:17 | и идѣже аще умреши, умру и тамо погребуся: тако да сотворитъ мнѣ Господь, и сiя да приложитъ, яко смерть разлучитъ между мною и тобою. |
1:18 | Видѣвши же Ноемминь, яко укрѣпися она ити съ нею, умолче глаголати къ ней ктому. |
1:19 | Идостѣ же обѣ, дондеже прiидостѣ въ Виѳлеемъ. И бысть егда прiидостѣ они въ Виѳлеемъ, и возгласи весь градъ о нихъ, и рекоша: еда сiя есть Ноемминь? |
1:20 См.: 🔗Иов. 9:18 | И рече къ нимъ: не зовите убо мене Ноемминь, но зовите мене горька: яко исполни мя горести Вседержитель зѣло: |
1:21 См.: 🔗Быт. 32:10 | азъ исполнь отидохъ, и нынѣ тщу мя возврати Господь: и вскую мя нарицаете Ноемминь, Господь смири мя и Вседержитель озлоби мя? |
1:22 | И возвратися Ноемминь и руѳь Моавитиня сноха ея съ нею, обращающыяся съ села Моавля: и прiидостѣ въ Виѳлеемъ въ началѣ жатвы ячменя. |