Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 8 | |
8:1 | И услыша во днехъ онѣхъ Иудиѳъ дщерь Мераріи, сына оксова, сына Иосифова, сына Озiилева, сына Елкіева, сына Ананіева, сына гедеонова, сына Рафаинова, сына акиѳонова, сына иліева, сына Елiавова, сына наѳанаилева, сына Саламiилева, сына Саласадаіева, сына Иеилева. |
8:2 | И мужъ ея Манассіа, от племене ея и отечества ея, и умре во днехъ жатвы ячменя: |
8:3 | настояше бо надъ вяжущими снопы на поли, и зной прiиде на главу его, и паде на одръ и скончася во ветилуи градѣ своемъ: и погребоша его со отцы его на селѣ сущемъ посредѣ Доѳаима и Валамона. |
8:4 | И бѣ Иудиѳъ въ дому своемъ вдовствующи лѣта три и месяцы четыри. |
8:5 | И сотвори себѣ жилище на кровѣ дому своего и возложи на чресло свое вретище, и бяху на ней ризы вдовства ея: |
8:6 | и постяшеся вся дни вдовства своего кромѣ предсубботiй и субботъ, и предновомесячiй и новомесячiй, и праздниковъ и радованiй дому Израилева: |
8:7 | и бѣ добра видомъ и красна взоромъ зѣло: и остави ей Манассіа мужъ ея сребро и злато, и отроки и отроковицы, и скоты и села, и пребываше надъ ними: |
8:8 | и не бѣ, иже бы нанеслъ ей глаголъ злый понеже бояшеся Бога зѣло. |
8:9 | И услыша глаголы людій злыя на началника, яко возмалодушествоваша о скудости водъ: и слыша вся словеса Иудиѳъ, яже глаголаше къ нимъ Озіа, яко клятся имъ предати градъ по пяти днехъ Ассириомъ: |
8:10 | и пославши рабыню свою, приставницу всему имѣнiю ея, призва Озію и хавріна и Хармина, старѣйшинъ града своего. |
8:11 | И прiидоша къ ней, и рече къ нимъ: послушайте убо мене, началницы живущихъ во ветилуи, яко неправо слово ваше, еже глаголасте предъ людьми въ день сей, и устависте клятву, юже глаголасте между Богомъ и вами, и рѣсте предати градъ врагомъ нашымъ, аще не въ тыя обратится Господь помощи намъ: |
8:12 | и нынѣ кто есте вы, иже искусисте Бога во днешнiй день, и устависте кромѣ Бога посредѣ сыновъ человѣческихъ? |
8:13 | и нынѣ Господа Вседержителя испытуете, и ничтоже познаете даже до вѣка, |
8:14 См.: 🔗Пс. 63:7 🔗Рим. 11:34 | понеже глубины сердца человѣческаго не изслѣдите и словесъ мысли его не постигнете: и како Бога, иже сотвори вся сiя, испытаете, и умъ его увѣдаете, и мысль его познаете? никакоже, братiя, не прогнѣвляйте Господа Бога нашего: |
8:15 | Зане аще не восхощетъ въ пяти днѣхъ помощи намъ, той имать власть въ кіихъ хощетъ покрыти днехъ, или и истребити насъ предъ лицемъ враговъ нашихъ: |
8:16 | вы же не одолжайте совѣтами Господа Бога нашего, зане не яко человѣку Богу претити, ниже яко сына человѣча судити: |
8:17 | сего ради ожидающе от него спасенiя, призовемъ его на помощь нашу, и послушаетъ гласа нашего, аще будетъ ему угодно: |
8:18 | ибо не воста въ родѣхъ нашихъ, ниже есть во днешнiй день, ниже племя, ниже отечество, ниже сонмъ, ниже градъ от насъ, иже покланяются богомъ рукотвореннымъ, якоже бысть въ первыхъ днехъ, |
8:19 | ихже ради предани быша подъ мечь и на расхищенiе отцы наши и падоша паденiемъ великимъ предъ врагами нашими: |
8:20 | мы же инаго Бога не познахомъ развѣ его, тѣмже уповаемъ, яко не презритъ насъ, ниже от рода нашего: |
8:21 | понеже, внегда взятымъ быти намъ, тако сядетъ вся Иудеа, и расхищена будутъ святая наша, и взыщетъ оскверненiя ихъ от устъ нашихъ, |
8:22 | и убиенiя братiи нашея и плѣненiе земли и опустѣнiе наслѣдiя нашего обратитъ на главу нашу во языцѣхъ, идѣже аще поработаемъ тамо, и будемъ въ соблазнъ и въ поношенiе предъ стяжавшими насъ, |
8:23 | ибо не исправится служба наша въ благодать, но въ безчестiе положитъ ю Господь Богъ нашъ: |
8:24 | и нынѣ, братiя, покажемъ братiи нашей, яко от насъ зависитъ душа ихъ, и святая и домъ и олтарь утверждается на насъ: |
8:25 | кромѣ сихъ всѣхъ возблагодаримъ Господеви Богу нашему, иже искушаетъ насъ, якоже и отцевъ нашихъ: |
8:26 | помяните, елика сотвори со Авраамомъ, и еликими искушаше Исаака, и елика быша Иакову въ Месопотамiи Сирстѣй, пасущу овцы Лавана брата матере своея, |
8:27 | Зане не якоже оныхъ искуси во истязанiи сердца ихъ, и насъ не обидѣ, но въ наученiе наказуетъ Господь приближающихся ему. |
8:28 | И рече къ ней Озіа: вся, елика рекла еси, благимъ средцемъ глаголала еси, и нѣсть, иже бы противосталъ словесемъ твоимъ, |
8:29 | понеже не нынѣ мудрость твоя явна есть, но от начала дній твоихъ вѣдаютъ вси людiе разумъ твой, како благо есть смышленiе сердца твоего: |
8:30 | но людiе жаждаху зѣло и принудиша сотворити насъ, якоже глаголахомъ имъ, и навести клятву на насъ, еяже не преступимъ: |
8:31 | и нынѣ молися о насъ, ибо жена благочестива еси, и послетъ Господь дождь во исполненiе рвовъ нашихъ, и оскудѣвати не будемъ ктому. |
8:32 | И рече къ нимъ Иудиѳъ: послушайте мене, и сотворю дѣло, еже прострется въ роды родовъ сыномъ рода нашего: |
8:33 | вы станете при вратѣхъ въ нощь сiю, и изыду азъ съ рабынею моею, и во днехъ, по нихже рѣсте предати градъ врагомъ нашымъ, посѣтитъ Господь Израиля рукою моею: |
8:34 | вы же не испытуйте дѣла моего, не бо реку вамъ, дондеже совершатся, яже азъ творю. |
8:35 | И рече Озіа и началницы къ ней: иди съ миромъ, и Господь Богъ предъ тобою на отмщенiе враговъ нашихъ. |
8:36 | И возвращьшеся от жилища, идоща ко ополчениемъ своимъ. |