Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 19 | |
19:1 | Се, Господь сѣдитъ на облацѣ легцѣ и прiидетъ во Египетъ, и потрясутся рукотворенная Египетская от лица его, и сердца ихъ разслабнутъ въ нихъ. |
19:2 См.: 🔗2Пар. 20:23 🔗Иез. 38:21 | И востанутъ Египтяне на Египтяны, и вооружится человѣкъ на брата своего, и всякъ на ближняго своего, востанетъ градъ на градъ и законъ на законъ. |
19:3 | И возмятется духъ Египтянъ въ нихъ, и совѣтъ ихъ разсыплю, и вопросятъ боговъ своихъ и кумiровъ своихъ, и гласящихъ от земли и чревоволшебниковъ. |
19:4 | И предамъ Египетъ въ руцѣ человѣковъ властелей жестокихъ, и царiе жестоцы обладати будутъ ими: сiя глаголетъ Господь Саваоѳъ. |
19:5 См.: 🔗Иез. 30:12 | И испiютъ Египтяне воду, яже при мори, а рѣка оскудѣетъ и изсхнетъ. |
19:6 | И оскудѣютъ рѣки и ровенницы рѣчнiи: и изсхнетъ весь сонмъ водный, и во всяцѣмъ лузѣ тростнѣмъ и ситнѣмъ, |
19:7 | и злакъ зеленый весь иже окрестъ рѣки, и все сѣемое при рѣцѣ посхнетъ вѣтромъ растлѣнно. |
19:8 | И возстенятъ рыбарiе, и возстенятъ вси мещущiи удицу въ рѣку, и мещущiи неводы и мещущiи сѣти возрыдаютъ. |
19:9 | И студъ прiиметъ дѣлающихъ ленъ расчесаный и дѣлающихъ виссонъ, и будутъ дѣлающiи я въ болѣзни, |
19:10 | и вси творящiи Сикеру опечалятся и поболятъ душами. |
19:11 | И юродиви будутъ князи танесовы: мудрiи царевы совѣтницы, совѣтъ ихъ обюродѣетъ. Како речете царю: сынове смысленыхъ мы, сынове царей древнихъ? |
19:12 | Гдѣ суть нынѣ мудрiи твои, и да возвѣстятъ тебѣ и рекутъ: что совѣща Господь Саваоѳъ на Египетъ? |
19:13 См.: 🔗Иер. 2:16 🔗Ос. 9:6 | Оскудѣша князи танесовы, и вознесошася князи мемфитстiи, и прельстятъ Египта по племеномъ. |
19:14 См.: 🔗3Цар. 22:21 | Господь бо раствори имъ духъ прельщенiя, и прельстиша Египта всѣми дѣлесы своими, якоже прельщается пiяный и купно блюющь. |
19:15 См.: 🔗Ис. 9:14 | И не будетъ Египтяномъ дѣла, еже бы сотворило главу и ошибъ, и начало и конецъ. |
19:16 | Въ той день будутъ Египтяне аки жены во страсѣ и трепете от лица руки Господа Саваоѳа, юже той возложитъ на ня. |
19:17 | И будетъ страна Иудейска во страхъ Египтяномъ: всякъ, иже аще воспомянетъ ю имъ, убоятся совѣта ради, егоже совѣща Господь Саваоѳъ нань. |
19:18 | Въ той день будетъ пять градовъ во Египтѣ, глаголющихъ языкомъ ханаанитскимъ и кленущихся именемъ Господа Саваоѳа: градъ аседекъ прозовется единъ градъ. |
19:19 | Въ той день будетъ жертвенникъ Господеви въ земли Египетстѣй и столпъ въ предѣлѣхъ его Господеви. |
19:20 См.: 🔗Нав. 24:27 | И будетъ въ знаменiе во вѣкъ Господеви въ земли Египетстѣй: яко возопiютъ ко Господу на оскорбляющыя ихъ, и послетъ имъ Господь человѣка, иже спасетъ я, судяй спасетъ я. |
19:21 | И познанъ будетъ Господь Египтяномъ: и увѣдятъ Египтяне Господа въ той день и сотворятъ жертвы и дары, и обѣщаютъ обѣты Господеви и воздадятъ. |
19:22 | И поразитъ Господь Египтянъ язвою великою и исцѣлитъ ихъ цѣльбою, и обратятся ко Господеви, и услышитъ ихъ и исцѣлитъ ихъ цѣльбою. |
19:23 | Въ той день будетъ путь от Египта ко Ассиріаномъ, и внидутъ Ассиріане во Египетъ, и Египтяне пойдутъ ко Ассиріаномъ, и поработаютъ Египтяне Ассиріаномъ. |
19:24 | Въ той день будетъ Израиль третiй во Египтянѣхъ и во Ассиріанѣхъ, благословенъ на земли, |
19:25 См.: 🔗Ос. 2:1 | юже благослови Господь Саваоѳъ, глаголя: благословени людiе мои, иже во Египтѣ и иже во Ассиріахъ, и наслѣдiе мое Израиль. |