Книга Бытия, глава 50

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 50
50:1 См.: 🔗Быт. 46:4	И при­­падъ Иосифъ на лице отца сво­его, плакася [горько] о немъ и облобыза его:
50:2	и повелѣ Иосифъ рабомъ сво­имъ погребателемъ погребсти отца сво­его. И погребоша погребателiе Израиля.
50:3	И исполнишася ему четыредесять дній: тако бо исчисляют­ся дніе погребенiя: и плакася его Египетъ седмьдесятъ дній.
50:4	Егда же преидоша дніе плача, глагола Иосифъ ко вельможамъ фараоновымъ, глаголя: аще обрѣтохъ благодать предъ вами, рцыте о мнѣ во ушы фараону, глаголюще:
50:5 См.: 🔗Быт. 47:29	отецъ мой закля мя прежде скончанiя [сво­его], глаголя: во гробѣ, егоже ископахъ себѣ въ земли Ханаани, тамо мя погреби: нынѣ убо воз­шедъ погребу отца мо­его и воз­вращуся. И рекоша фараону по словеси Иосифову.
50:6	И рече фараонъ ко Иосифу: взыди, погреби отца тво­его, якоже закля тя.
50:7	И взыде Иосифъ погребсти отца сво­его. И совзыдоша съ нимъ вси раби фараони и старѣйшины дому его, и вси старѣйшины земли Египетскiя,
50:8	и весь домъ Иосифовъ и братiя его, и весь домъ отца его и сродницы его: овцы же и волы оставиша въ земли Гесемъ.
50:9	И совзыдоша съ нимъ и колесницы и кон­ницы, и бысть полкъ великъ зѣло.
50:10 См.: 🔗Сир. 22:11	И прiидоша на Гумно Атадово, еже есть объ онъ полъ Иордана, и рыдаша его рыданiемъ велiимъ и крѣпкимъ зѣло: и сотвори плачь отцу сво­ему седмь дній.
50:11	И видѣша жителiе земли Ханаанскiя плачь на Гумнѣ Атадовѣ и рѣша: плачь великъ сей есть Египтяномъ. Сего ради наречеся имя мѣсту тому плачь Египетскъ, еже есть объ онъ полъ Иордана.
50:12	И сотвориша ему тако сынове его, якоже заповѣда имъ.
50:13 См.: 🔗Деян. 7:16 🔗Быт. 23:17	И взяша его сынове его въ землю Ханааню и погребоша его въ пещерѣ Сугубѣй, юже стяжа Авраамъ пещеру въ стяжанiе гроба от­ Ефрона Хеттеанина, прямо Мамвріи.
50:14	И воз­вратися Иосифъ во Египетъ, самъ и братiя его и вси совоз­шедшiи погребсти отца его.
50:15	Видѣв­ше же братiя Иосифовы, яко умре отецъ ихъ, рѣша: да не когда воспомянетъ злобу нашу Иосифъ и воз­даянiемъ воз­дастъ намъ за вся злая, яже показахомъ ему.
50:16	И при­­шедше ко Иосифу рекоша: отецъ твой закля прежде кончины сво­ея, глаголя:
50:17 См.: 🔗Быт. 26:24 🔗Быт. 31:42	тако рцыте Иосифу: остави имъ неправду и грѣхъ ихъ, яко лукавая тебѣ показаша: и нынѣ прiими неправду рабовъ Бога отца тво­его. И плакася Иосифъ, глаголющымъ имъ къ нему.
50:18	И при­­шедше къ нему рекоша: се, мы тебѣ раби.
50:19	И рече къ нимъ Иосифъ: не бойтеся, Божiй бо есмь азъ:
50:20 См.: 🔗Быт. 45:5	вы совѣщасте на мя злая, Богъ же совѣща о мнѣ во благая, дабы было якоже днесь, и препиталися бы людiе мнози.
50:21	И рече имъ: не бойтеся, азъ препитаю васъ и домы вашя. И утѣши ихъ, и глагола имъ по сердцу ихъ.
50:22 См.: 🔗Быт. 41:46	И вселися Иосифъ во Египтѣ самъ и братiя его и весь домъ отца его: и поживе Иосифъ лѣтъ сто десять.
50:23 См.: 🔗Чис. 32:39	И видѣ Иосифъ Ефремли дѣти до третiяго рода: и сынове Махира сына Манассіина родишася при­­ бедрѣхъ Иосифовыхъ.
50:24 См.: 🔗Евр. 11:22	И рече Иосифъ братiи сво­ей, глаголя: азъ умираю, посѣщенiемъ же посѣтитъ васъ Богъ и изведетъ васъ от­ земли сея въ землю, о нейже клят­ся Богъ отцемъ нашымъ Аврааму, Исааку и Иакову.
50:25 См.: 🔗Исх. 13:19 🔗Нав. 24:32	И закля Иосифъ сыны Израилевы, глаголя: въ посѣщенiи, имже посѣтитъ васъ Богъ, совоз­несите и кости моя от­сюду съ вами.
50:26	И скончася Иосифъ сый лѣтъ ста десяти: и погребоша его, и положиша въ рацѣ во Египтѣ. Конецъ книзѣ первѣй Моисеовѣ: имать въ себѣ главъ 50.