Деяния святых Апостолов, глава 8

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 8
8:1 См.: 🔗Деян. 11:19	Савлъ же бѣ со­изволяя убій­ст­ву его. Бысть же въ той день гоненiе велiе на церковь Иерусалимскую: вси же разсѣяшася по странамъ Иудейскимъ и Самарийскимъ, кромѣ апостолъ:
8:2	погребоша же Стефана мужiе благоговѣйнiи и сотвориша плачь велiй надъ нимъ.
8:3 См.: 🔗Деян. 9:1 🔗Деян. 22:4 🔗Деян. 26:10 🔗1Кор. 15:9 🔗Гал. 1:13	Савлъ же озлобляше церковь, въ домы входя, и влачя мужы и жены, предаяше въ темницу.
8:4	Разсѣяв­шiися же прохождаху, благовѣ­ст­вующе слово.
8:5	[Зач. 18.] Филиппъ же сошедъ во градъ Самарійскiй, проповѣдаше имъ Христа:
8:6	внимаху же народи глаголемымъ от­ Филиппа единодушно, слышаще и видяще знаменiя, яже творяше:
8:7 См.: 🔗Мк. 16:17	дуси бо нечистiи от­ многихъ имущихъ я, вопiюще гласомъ велiимъ, исхождаху, мнози же разслаблен­нiи и хромiи исцѣлишася:
8:8	и бысть радость велiя во градѣ томъ.
8:9	Мужъ же нѣкiй, именемъ Симонъ, прежде бѣ во градѣ волхвуя и удивляя языкъ Самарійскiй, глаголя нѣко­его быти себе велика,
8:10	емуже внимаху вси от­ мала даже до велика, глаголюще: сей есть сила Божiя великая.
8:11	Внимаху же ему, зане доволно время волхвованiи удивляше ихъ.
8:12 См.: 🔗Деян. 6:5	Егда же вѣроваша Филиппу благовѣ­ст­вующу яже о Цар­ст­вiи Божiи и о имени Иисусъ Христовѣ, крещахуся мужiе же и жены.
8:13	Симонъ же и самъ вѣрова и крещься бѣ пребывая у Филиппа: видя же силы и знаменiя велiя бываема, ужасенъ дивляшеся.
8:14	Слышав­ше же иже во Иерусалимѣ апостоли, яко прiятъ Самаріа слово Божiе, послаша къ нимъ Петра и Иоан­на,
8:15	иже сошедше помолишася о нихъ, яко да прiимутъ Духа Святаго:
8:16	еще бо ни на единаго ихъ бѣ при­­шелъ, точiю крещени бяху во имя Господа Иисуса:
8:17 См.: 🔗Деян. 6:6	тогда воз­ложиша руцѣ на ня, и прiяша Духа Святаго.
8:18	[Зач. 19.] Видѣвъ же Симонъ, яко воз­ложенiемъ рукъ апостолскихъ дает­ся Духъ Святый, при­­несе имъ сребро,
8:19	глаголя: дадите и мнѣ власть сiю, да, на негоже аще положу руцѣ, прiиметъ Духа Святаго.
8:20 См.: 🔗Мф. 10:8	Петръ же рече къ нему: сребро твое съ тобою да будетъ въ погибель, яко даръ Божiй непщевалъ еси сребромъ стяжати:
8:21	нѣсть ти части ни жребiя въ словеси семъ, ибо сердце твое нѣсть право предъ Богомъ:
8:22	покайся убо о злобѣ тво­ей сей и молися Богу, аще убо от­пустит­ся ти помышленiе сердца тво­его:
8:23 См.: 🔗Втор. 29:18	въ желчи бо горести и союзѣ неправды зрю тя суща.
8:24	Отвѣщавъ же Симонъ рече: помолитеся вы о мнѣ ко Господу, яко да ничтоже сихъ найдетъ на мя, яже рекосте.
8:25	Они же убо, засвидѣтел­ст­вовав­ше и глаголав­ше слово Господне, воз­вратишася во Иерусалимъ и многимъ весемъ Самарийскимъ благовѣстиша.
8:26	[Зач. 20.] Ангелъ же Господень рече къ Филиппу, глаголя: востани и иди на полудне, на путь сходящiй от­ Иерусалима въ Газу: и той есть пустъ.
8:27 См.: 🔗3Цар. 8:41	И воставъ пойде: и се, мужъ Муринъ, евнухъ силенъ Кандакіи царицы Муринскiя, иже бѣ надъ всѣми сокровищи ея, иже прiиде поклонитися во Иерусалимъ:
8:28	бѣ же воз­вращаяся, и сѣдя на колесницѣ сво­ей, чтяше пророка Исаiю.
8:29	Рече же Духъ къ Филиппу: при­­ступи и при­­лѣпися колесницѣ сей.
8:30	Притекъ же Филиппъ услыша его чтуща пророка Исаiю и рече: убо разумѣеши ли, яже чтеши?
8:31	Онъ же рече: како убо могу [разумѣти], аще не кто наставитъ мя? Умоли же Филиппа, да воз­шедъ сядетъ съ нимъ.
8:32	Слово же Писанiя, еже чтяше, бѣ сiе: яко овча на заколенiе ведеся, и яко агнецъ прямо стригущему его безгласенъ, тако не от­верзаетъ устъ Сво­ихъ:
8:33 См.: 🔗Ис. 53:7	во смиренiи Его судъ Его взят­ся, родъ же Его кто исповѣсть? Яко вземлет­ся от­ земли животъ Его.
8:34	Отвѣщавъ же каженикъ къ Филиппу, рече: молю тя, о комъ пророкъ глаголетъ сiе? О себѣ ли, или о инѣмъ нѣко­емъ?
8:35	Отверзъ же Филиппъ уста своя и наченъ от­ Писанiя сего, благовѣсти ему Иисуса.
8:36	Якоже идяху путемъ, прiидоша на нѣкую воду, и рече каженикъ: се, вода: что воз­браняетъ ми креститися?
8:37 См.: 🔗Мк. 16:16	Рече же ему Филиппъ: аще вѣруеши от­ всего сердца тво­его, мощно ти есть. Отвѣщавъ же рече: вѣрую Сына Божiя быти Иисуса Христа.
8:38	И повелѣ стати колесницѣ: и снидоста оба на воду, Филиппъ же и каженикъ: и крести его.
8:39	Егда же изыдоста от­ воды, Духъ Святый нападе на каженика: Ангелъ же Господень восхити Филиппа, и не видѣ его ктому каженикъ, идяше бо въ путь свой радуяся.
8:40	[Зач. 21.] Филиппъ же обрѣтеся во Азотѣ и проходя благовѣ­ст­вова­ше градомъ всѣмъ, дондеже прiити ему въ Кесарію.