Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 1 | |
1:1 См.: 🔗Иер. 49:14 | Видѣнiе Авдіино: сiя глаголетъ Господь Богъ Идумеи: слухъ слышахъ от Господа, извѣстiе во языки посла: востаните, и востанемъ на ню ратiю. |
1:2 См.: 🔗Иер. 49:15 | Се, мала дахъ тя во языцѣхъ, безчестенъ ты еси зѣло. |
1:3 См.: 🔗Чис. 24:21 🔗Иер. 21:13 | Презорство сердца твоего воздвиже тя живущаго въ пещерахъ каменныхъ: возвышаяй храмину свою, глаголяй въ сердцы своемъ: кто мя свержетъ на землю? |
1:4 См.: 🔗Иер. 49:16 🔗Ам. 9:2 | Аще вознесешися якоже орелъ и аще положиши гнѣздо твое средѣ звѣздъ, и оттуду свергу тя, глаголетъ Господь. |
1:5 См.: 🔗Иер. 49:9 | Аще бы татiе влѣзли къ тебѣ, или разбойницы нощiю, камо бы поверженъ былъ еси? еда не украли бы доволныхъ себѣ? или аще бы объемлющiи виноградъ влѣзли къ тебѣ, еда бы не оставили гроздiя? |
1:6 | Како объискася Исавъ, и взята быша сокровенная его? |
1:7 См.: 🔗Пс. 40:10 🔗Дан. 11:27 | Даже до предѣлъ испустиша тя: вси мужiе завѣта твоего сопротивишася ти, премогоша тя мужiе мирницы твои: [ядущiи съ тобою] положиша лесть подъ тобою, нѣсть смысла въ нихъ. |
1:8 | Въ той день, глаголетъ Господь, погублю премудрыя от Идумеи и смыслъ от горы Исавовы: |
1:9 См.: 🔗Иер. 49:7 | и убоятся воини твои, иже от Ѳеманъ, да отъимется человѣкъ от горы Исавовы. |
1:10 | Посѣченiя ради и нечестiя, еже на брата твоего Иакова, покрыетъ тя студъ, и отверженъ будеши во вѣкъ. |
1:11 | От негоже дне сопротивился еси во дни плѣняющихъ иноплеменниковъ силу его, и чуждіи внидоша во врата его и о Иерусалимѣ вергоша жребiя, и ты былъ еси яко единъ от нихъ. |
1:12 См.: 🔗Мих. 4:11 | И да не презриши дне брата твоего въ день чуждихъ, и да не порадуешися о сынѣхъ Иудиныхъ въ день погибели ихъ, и да не велерѣчиши въ день скорби: |
1:13 | и не входи во врата людій моихъ въ день болѣзни ихъ, и не презри и ты сонма ихъ въ день потребленiя ихъ, и не совѣщайся на силу ихъ въ день погибели ихъ: |
1:14 См.: 🔗Иез. 21:21 | ниже настой на исходы ихъ потребити избѣгающыя ихъ, ниже заключай бѣжащыя ихъ въ день скорби. |
1:15 См.: 🔗Иез. 35:15 | Понеже близъ день Господень на вся языки: якоже сотворилъ еси, сице будетъ ти, воздаянiе твое воздастся на главу твою. |
1:16 | Понеже якоже еси пилъ на горѣ моей святѣй, испiютъ вси языцы вино, испiютъ и снидутъ, и будутъ яко не бывшiи. |
1:17 См.: 🔗Ис. 14:2 | Въ горѣ же Сiони будетъ спасенiе, и будетъ свята: и наслѣдятъ домъ Иаковль наслѣдившихъ я. |
1:18 | И будетъ домъ Иаковль огнь, домъ же Иосифовъ пламень, а домъ Исавовъ въ тростiе, и возгорятся на нихъ и поядятъ я, и не будетъ избѣгаяй дому Исавову, яко Господь глагола. |
1:19 | И наслѣдятъ иже во нагевѣ гору Исавову, и иже въ раздолiи иноплеменники: и возмутъ гору Ефремову и поле самарійско, и Венiамина и Галаадитиду. |
1:20 См.: 🔗3Цар. 17:9 | И преселенiя начало сiе сыномъ Израилевымъ, земля Хананейска до сарепты: преселенiе же Иерусалимле до Ефраѳа: и наслѣдятъ грады нагевовы. |
1:21 | И взыдутъ спасаемiи от горы Сiони, еже отмстити гору Исавлю, и будетъ царство Господеви. |