Вторая книга Маккавейская, глава 8 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 8
8:1	Иуда же маккавей и иже съ нимъ, входяще тайно въ села, созываху сродники и пребывающихъ во Иудей­ст­вѣ прiемлюще собраша до шести тысящъ мужей.
8:2	И при­­зываху Господа при­­зрѣти на люди от­ всѣхъ попираемыхъ, ущедрити же и храмъ от­ нечестивыхъ человѣкъ оскверненъ
8:3	помиловати же и разореный градъ и имѣющь равно со землею быти, и гласъ кровей вопiющихъ къ нему услышати,
8:4	помянути же и безгрѣшныхъ младенцевъ беззакон­ное погубленiе и быв­шая хуленiя на имя его, и воз­ненавидѣти лукав­ст­ва.
8:5	Собравъ же множе­с­т­во, маккавей нестерпимь уже языкомъ бысть, гнѣву Господню въ милость обратив­шуся.
8:6	И нападая на веси и грады нечаян­но сожига­ше, и благовремен­на мѣста взимающь, не мало супостатъ побѣжда­ше убивая,
8:7	наипаче же нощы на таковая нападенiя въ помощь прiемляше: и слава нѣкая муже­ст­ва его прохожда­ше всюду.
8:8	Видя же Филиппъ по малу въ предуспѣянiе грядуща мужа, частѣе же во благоден­ствiихъ успѣвающа, ко Птоломею во­еводѣ килисиріи и Финикіи писа, дабы помогалъ въ царскихъ дѣлѣхъ.
8:9	Онъ же скоро избравъ никанора, сына патроклова от­ первѣйшихъ друговъ посла, подчинивъ ему от­ всякихъ языковъ вооружен­ныхъ воевъ не меньше двадесяти тысящъ, да весь Иудейскiй родъ избiетъ: при­­даде же ему и горгію мужа стратига и въ ратныхъ дѣлѣхъ искус­ст­во имуща.
8:10	Устави же никаноръ дань царю, яже римляномъ даяшеся, двѣ тысящы талантовъ от­ плѣненiя Иудейскаго наполнити.
8:11	Абiе же въ поморскiя грады посла, созывая на куплю Иудейскихъ плѣн­никовъ, обѣщаяся девятьдесятъ плѣн­никовъ за талантъ дати, не чая мщенiя хотящаго послѣдовати ему от­ Вседержителя.
8:12	Иудѣ же воз­вѣщено бѣ о при­­ше­ст­вiи никаноровѣ: и егда онъ воз­вѣсти сущымъ съ собою о при­­ше­ст­вiи воин­ства,
8:13	ужасшеся и не вѣровав­ше Божiю от­мщенiю разбѣгахуся и от­ мѣста сво­его от­ступаху:
8:14	иніи же остав­шая вся продаяху, купно же Господа моляху, да избавитъ от­ нечестиваго никанора проданыхъ, прежде даже снитися,
8:15	и аще не ихъ ради, то ради завѣта, иже бысть ко отцемъ ихъ, и при­­зыванiя ради честнаго и великолѣпаго имене сво­его на нихъ.
8:16	Собравъ же маккавей сущихъ окрестъ его числомъ шесть тысящъ, моляше, да не ужаснут­ся от­ супротивниковъ, ниже да устрашат­ся неправедно грядущихъ на ня языковъ множе­ст­ва, но муже­с­т­вен­но да подвизают­ся,
8:17	предъ очима имѣюще беззакон­но на мѣсто святое содѣлан­ную от­ нихъ укоризну и посмѣян­наго града обиду, еще же и прародитель­наго житель­ства разрушенiе.
8:18	Они бо на оружiе надѣют­ся купно и на дерзость, рече: мы же на Вседержителя Бога могущаго и грядущихъ на насъ и весь миръ единымъ мгновенiемъ низложити надѣемся.
8:19 См.: 🔗4Цар. 19:35 🔗Сир. 48:24 🔗Ис. 35:36 🔗1Мак. 7:41	Воспомянувъ же имъ и быв­шая заступленiя при­­ прародителехъ, и яко подъ сен­нахиримомъ сто осмьдесятъ пять тысящь погибоша,
8:20	и въ Вавилонѣ на Галатовъ быв­шее ополченiе, како вси, егда на брань прiидоша, осмь тысящъ съ четырiю тысящами македонянъ, македоняномъ от­чаяв­шымся, едини осмь тысящъ побиша сто двадесять тысящъ помощiю дан­ною имъ от­ небесе, и пользу многу взяша.
8:21	Сими [воспомяновенiи] дерзостны оныя поставивъ и готовы умрети за законы и отече­с­т­во, четверочастно воин­ство постави:
8:22	учинивъ и братiю свою во­еводами обо­его ополченiя, Симона и Иосифа и Ионаѳана, поддавъ ко­емуждо тысящу и пять сотъ,
8:23	еще же и Елеазару [повелѣвъ] чести святую книгу и давъ знаменiе помощи Божiю, первому полку самъ предводитель­ствуя сразися съ никаноромъ.
8:24	Быв­шу же имъ Вседержителю споборнику, убиша супостатовъ болѣе девяти тысящъ, язвеныхъ же и безчлен­ныхъ большую часть сотвориша воевъ никаноровыхъ, всѣхъ же въ бѣг­ст­во понудиша.
8:25	Сребреники же от­ при­­шедшихъ на куплю ихъ взяша.
8:26	Гонив­ше же ихъ зѣльнѣ, воз­вратишася от­ времене заключени: бѣ бо [день] предъ субботою, сея ради вины не продолжиша гоняще ихъ.
8:27	Оружiя же ихъ собирающе и корысти от­ супостатъ отъ­емлюще, субботу праздноваху попремногу благословяще и исповѣда­ю­щеся Господеви спасшему ихъ въ день сей, начало милости учинив­шему имъ.
8:28	По субботѣ же немощнымъ и сиротамъ, и вдовамъ [и обидимымъ] раздѣлив­ше от­ корыстѣй, прочая сами и отроцы раздѣлиша.
8:29	Сiя же содѣяв­ше и общую молитву сотворше, милосердаго Господа моляху, въ конецъ при­­миритися рабомъ сво­имъ.
8:30	И от­ сущихъ съ тимоѳеемъ и вакхидомъ противныхъ множае двадесяти тысящъ убиша и твердыни зѣло высокiя одержаша, и многiя корысти раздѣлиша, равночастнѣ себѣ и немощнымъ, и сиротамъ и вдовамъ, еще же и старѣйшинамъ сотворше.
8:31	Собрав­ше же оружiя ихъ, при­­лѣжнѣ вся положиша въ мѣстѣхъ благовремен­ныхъ, прочыя же корысти во Иерусалимъ при­­несоша.
8:32	И Филарха тимоѳеева убиша мужа беззакон­нѣйшаго и вельми Иудеовъ озлобив­шаго,
8:33	побѣдитель­ная же праздну­ю­ще во отече­ст­вѣ, зажегшихъ священ­ная врата, калисѳена и нѣкiихъ иныхъ сожгоша убѣгшихъ во едину храмину, иже достойную мзду нечестiя воспрiяша.
8:34	Треклятѣйшiй же никаноръ, иже тысящу купцевъ на куплю Иудеовъ при­­ведый,
8:35	смиренъ помощiю Господнею от­ тѣхъ, ихже противу себе за ничтоже вмѣняше, славную от­ложивъ ризу, чрезъ средиземное [море] бѣглеца образомъ уединена себе сотворь, прiиде во Антiохію презѣльнѣ неблагополученъ о погублѣнiи воин­ства.
8:36	И иже обѣща римляномъ дань воз­дати от­ плѣненiя Иерусалимскаго, проповѣдаше, яко защитителя Бога имѣютъ Иудеи, и сего ради не уязвляеми суть Иудее, зане послѣдуютъ закономъ от­ того уставленымъ.