Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 1 | |
1:1 | Видѣнiе, еже видѣ Исаiа сынъ Амосовъ, еже видѣ на Иудею и на Иерусалимъ, въ царство Озіи и Иоаѳама, и Ахаза и езекіи, иже царствоваша во Иудеи. |
1:2 См.: 🔗Втор. 32:1 | Слыши, небо, и внуши, земле, яко Господь возглагола: сыны родихъ и возвысихъ, тіи же отвергошася мене. |
1:3 См.: 🔗Втор. 32:6 | Позна волъ стяжавшаго и, и оселъ ясли господина своего: Израиль же мене не позна, и людiе мои не разумѣша. |
1:4 | Увы, языкъ грѣшный, людiе исполнени грѣховъ, сѣмя лукавое, сынове беззаконнiи, остависте Господа и разгнѣвасте святаго Израилева, отвратитеся вспять. |
1:5 См.: 🔗Иер. 2:30 🔗Иер. 4:19 | Что еще уязвляетеся, прилагающе беззаконiе? Всякая глава въ болѣзнь, и всякое сердце въ печаль. |
1:6 См.: 🔗Втор. 28:35 | От ногъ даже до главы нѣсть въ немъ цѣлости: ни струпъ, ни язва, ни рана палящаяся: нѣсть пластыря приложити, ниже елеа, ниже обязанiя. |
1:7 См.: 🔗Втор. 28:51 🔗Ис. 5:5 | Земля ваша пуста, гради ваши огнемъ пожжени, страну вашу предъ вами чуждіи поядаютъ, и опустѣ низвращена от людій чуждихъ. |
1:8 | Оставится дщерь Сiоня, яко куща въ виноградѣ и яко овощное хранилище въ вертоградѣ, яко градъ воюемый. |
1:9 | И аще не бы Господь Саваоѳъ оставилъ намъ сѣмене, яко Cодома убо были быхомъ, и яко Гоморру уподобилися быхомъ. |
1:10 | Услышите слово Господне, князи Cодомстiи: внемлите закону Божiю, людiе Гоморрстiи. |
1:11 | Что ми множество жертвъ вашихъ, глаголетъ Господь? Исполненъ есмь всесожженiй овнихъ и тука агнцевъ, и крове юнцевъ и козловъ не хощу. |
1:12 См.: 🔗Иер. 7:22 | Ниже приходите явитися ми: кто бо изыска сiя изъ рукъ вашихъ? Ходити по двору моему не приложите. |
1:13 См.: 🔗Прит. 21:27 | И аще принесете ми семидалъ, всуе: кадило мерзость ми есть. |
1:14 | Новомесячiй вашихъ и субботъ и дне великаго не потерплю: поста и праздности, и новомесячiй вашихъ и праздниковъ вашихъ ненавидитъ душа моя: бысте ми въ сытость, ктому не стерплю грѣховъ вашихъ. |
1:15 | Егда прострете руки [вашя] ко мнѣ, отвращу очи мои от васъ: и аще умножите моленiе, не услышу васъ: руки бо вашя исполнены крове. |
1:16 См.: 🔗Пс. 33:15 🔗1Пет. 3:11 | Измыйтеся, [и] чисти будите, отимите лукавства от душъ вашихъ предъ очима моима, престаните от лукавствъ вашихъ. |
1:17 См.: 🔗Пс. 81:4 | Научитеся добро творити, взыщите суда, избавите обидимаго, судите сиру и оправдите вдовицу, |
1:18 | и прiидите, и истяжимся, глаголетъ Господь. И аще будутъ грѣси ваши яко багряное, яко снѣгъ убѣлю: аще же будутъ яко червленое, яко волну убѣлю. |
1:19 См.: 🔗Лев. 25:18 | И аще хощете и послушаете мене, благая земли снѣсте: |
1:20 | аще же не хощете, ниже послушаете мене, мечь вы поястъ: уста бо Господня глаголаша сiя. |
1:21 См.: 🔗Мф. 23:34 | Како бысть блудница градъ вѣрный Сiонъ полнъ суда? въ немже правда почиваше, нынѣ же [въ немъ] убийцы. |
1:22 См.: 🔗Иер. 6:30 🔗Иез. 22:18 | Сребро ваше неискушено, корчемницы твои мѣшаютъ вино съ водою. |
1:23 | Князи твои не покаряются, общницы татемъ, любяще дары, гоняще воздаянiе, сирымъ не судящiи и суду вдовицъ не внимающiи. |
1:24 См.: 🔗Втор. 28:63 | Сего ради тако глаголетъ Владыка Господь Саваоѳъ: горе крѣпкимъ во Израили: не престанетъ бо ярость моя на противныя, и судъ врагомъ моимъ сотворю: |
1:25 | и наведу руку мою на тя, и разжегу въ чистоту, непокаряющихся же погублю, и отиму всѣхъ беззаконныхъ от тебе, и всѣхъ гордыхъ смирю. |
1:26 См.: 🔗Иер. 33:16 | И приставлю судiи твоя якоже прежде, и совѣтники твоя яко от начала: и по сихъ нарѣчешися градъ правды, мати градовомъ, вѣрный Сiонъ. |
1:27 | Съ судомъ бо спасется плѣненiе его и съ милостынею. |
1:28 См.: 🔗Иов. 31:3 🔗Пс. 1:6 | И сокрушатся беззаконнiи и грѣшницы вкупѣ, и оставившiи Господа скончаются: |
1:29 | занеже постыдятся о идолѣхъ своихъ, ихже сами восхотѣша, и посрамятся о садѣхъ своихъ, ихже возжелѣша. |
1:30 См.: 🔗Пс. 1:3 | Будутъ бо яко теревинѳъ отметнувый листвiя [своя], и яко вертоградъ не имый воды. |
1:31 См.: 🔗Мал. 4:1 | И будетъ крѣпость ихъ яко стебль изгребiя, и дѣланiя ихъ яко искры огненныя, и сожгутся беззаконницы и грѣшницы вкупѣ, и не будетъ угашаяй. |