Первая книга Маккавейская, глава 12 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 12
12:1	И видѣ Ионаѳанъ яко время ему споспѣше­ст­вуетъ, и избра мужы и посла ихъ въ римъ составити и обновити съ ними дружбу,
12:2	и ко спартiатомъ и ко инымъ мѣстомъ посла епистолiи, по томужде образу.
12:3	И идоша въ римъ и внидоша въ совѣтный домъ и рекоша: Ионаѳанъ архiерей и языкъ Иудейскiй послаша насъ обновити дружбу съ вами и споборенiе по прежнему.
12:4	И даша епистолiи имъ къ нимъ по мѣсту, да проводятъ ихъ въ землю Иудину съ миромъ.
12:5	И сiе списанiе епистолiй, ихже писа Ионаѳанъ ко спартiатомъ:
12:6	Ионаѳанъ архiерей и старѣйшины людій, и жерцы и прочiи людiе Иудейстiи, спартiатомъ братiи радоватися:
12:7	еще прежде посланы бяху епистолiи ко оніи архiерею от­ дарiа цар­ст­вовав­шаго въ васъ, яко есте братiя наша, якоже списанiе содержитъ:
12:8	и прiя оніа мужа посланаго славно и прiятъ епистолiи, въ нихже завѣщано о споборенiи и дружбѣ:
12:9	и мы убо не требу­ю­ще сихъ, утѣшенiе имуще святыя книги, яже въ рукахъ нашихъ,
12:10	покусихомся послати къ вамъ обновити брат­ст­во и дружбу, еже бы не от­чуждитися васъ: многа бо времена про­идоша, от­нелѣже посласте къ намъ:
12:11	мы убо во всяко время непрестан­но и въ праздники и въ прочихъ подобающихъ днехъ воспоминаемъ васъ въ жертвахъ, яже при­­носимъ, и въ молитвахъ, якоже подобаетъ и лѣпо есть воспоминати братiю:
12:12	веселимся убо о славѣ ва­шей:
12:13	насъ же обыдоша многи скорби и многи брани, и ратоваша насъ царiе, иже окрестъ насъ:
12:14	не хотѣхомъ убо стужати вамъ и прочiимъ споборникомъ и другомъ нашымъ во бранехъ сихъ,
12:15	имѣемъ бо съ небесе помощь помогающую намъ, и избавихомся от­ врагъ нашихъ, и смиришася врази наши:
12:16	избрахомъ убо нуминiа Антiохова сына и антипатра Иасонова, и послахомъ къ римляномъ обновити съ ними дружбу и споборенiе прежнее:
12:17	заповѣдахомъ убо имъ и къ вамъ по­ити и поздравити васъ, и дати вамъ от­ насъ посланiя о обновленiи и о брат­ст­вѣ на­шемъ:
12:18	и нынѣ добрѣ сотворите от­вѣщавающе намъ на сiя.
12:19	И сiе списанiе посланiй, ихже посла оніи:
12:20	дарiй царь спартiатовъ оніи священ­нику великому радоватися:
12:21	обрѣтеся въ писанiихъ о спартiатѣхъ и Иудеехъ, яко суть братiя и яко суть от­ рода Авраамля:
12:22	и нынѣ, от­нелѣже сiя познахомъ, добрѣ сотворите пишуще намъ о мирѣ ва­шемъ:
12:23	и мы же восписахомъ вамъ: скоти ваши и имѣнiе ва­ше наша суть, и яже наша ваша суть: повелѣхомъ убо, да воз­вѣстятъ вамъ сiя.
12:24	И слыша Ионаѳанъ, яко воз­вратишася началницы димитриевы съ силою многою, паче неже прежде, ратовати нань,
12:25	и изыде изъ Иерусалима, и срѣте ихъ во Амаѳитстѣй странѣ: не бо даде имъ времене, да внидутъ во страну его:
12:26	и посла созиратели въ полкъ ихъ: и воз­вратишася и воз­вѣстиша ему, яко сице устрояют­ся напасти на ня нощiю.
12:27	Егда же зайде солнце, заповѣда Ионаѳанъ сво­имъ бдѣти и быти во оружiи и готовитися на брань всю нощь, и постави стражы окрестъ полка.
12:28	И слышаша супостати, яко готовъ есть Ионаѳанъ со сво­ими на брань, и убояшася и ужасошася сердцемъ сво­имъ, и воз­жгоша огни въ полцѣ сво­емъ и от­идоша.
12:29	Ионаѳанъ же и иже съ нимъ бѣша, не познаша даже до утра: видяху бо огни горящыя.
12:30	И погна Ионаѳанъ вслѣдъ ихъ и не достиже ихъ, преидоша бо Елевѳеру рѣку.
12:31	И обратися Ионаѳанъ на Аравы, иже нарицахуся заведее, и порази ихъ, и взя корысти ихъ.
12:32	И воставъ иде въ Дамаскъ и прохожда­ше всю страну ту.
12:33	Симонъ же изыде и прiиде даже до Аскалона и ближнихъ твердынь, и уклонися во Иоппію и взя ю.
12:34	Слыша бо, яко совѣщашася твердыню предати странѣ димитрiевѣ, и постави тамо стражу, да стрегутъ ю.
12:35	И воз­вратися Ионаѳанъ, и собра старѣйшины людскія, и совѣщася съ ними созидати твердыни во Иудеи
12:36	и воз­высити стѣны Иерусалимскiя и воз­двигнути высоту велiю между краеградiемъ и градомъ, еже бы от­лучити оное от­ града, да будетъ сiе на уединенiи, яко да ни купуютъ, ниже продаютъ.
12:37	И собрашася созидати градъ, паде бо стѣна потока, яже от­ востока, и уготоваша нарицаемое хафенаѳа.
12:38	И Симонъ созда Адиду въ сефилѣ и утверди врата и заворы.
12:39	И взыска трифонъ цар­ст­вовати во Асіи и воз­ложити дiадиму и прострети руку на Антiоха царя,
12:40	и убояся, да не когда не попуститъ ему Ионаѳанъ и ратовати будетъ на него, и взыска пути, еже яти Ионаѳана и убити его: и воставъ прiиде въ веѳсанъ.
12:41	И изыде Ионаѳанъ во срѣтенiе ему съ четыредесятiю тысящiю мужей избран­ныхъ на ополченiе и прiиде въ веѳсанъ.
12:42	И видѣ трифонъ, яко прiиде Ионаѳанъ съ вои многими, и прострети нань руку убояся:
12:43	и воспрiятъ его честно, и постави его предъ всѣми други сво­ими, и даде ему дары, и заповѣда всѣмъ силамъ сво­имъ послушати его яко себе.
12:44	И рече Ионаѳану: вскую утрудилъ еси вся люди сiя, брани не настоящей намъ?
12:45	и нынѣ от­пусти ихъ въ домы своя, избери же себѣ мужей мало, иже будутъ съ тобою, и прiиди со мною во Птолемаиду, и предамъ тебѣ ю и прочыя твердыни и силы прочыя, и всѣхъ иже надъ потребами, и воз­вращься от­иду: сего бо ради прiидохъ.
12:46	И вѣровавъ ему, сотвори, якоже рече, и от­пусти силы, и от­идоша въ землю Иудину.
12:47	Остави же съ собою три тысящы мужей, ихже двѣ тысящы остави въ Галилеи, тысяща же идоша съ нимъ.
12:48	Егда же вниде Ионаѳанъ во Птолемаиду, заключиша врата градская во Птолемаидѣ, и яша его, и всѣхъ в­шедшихъ съ нимъ убиша мечемъ.
12:49	И посла трифонъ вои и кон­ники въ Галилею и на поле великое, еже погубити всѣхъ друговъ Ионаѳановыхъ.
12:50	И познаша, яко ятъ бысть Ионаѳанъ и убiенъ и вси иже съ нимъ, и увѣщаша сами себе и идоша уготовани на брань.
12:51	И видѣша гонящiи, яко о души имъ есть, и воз­вратишася.
12:52	И прiидоша вси съ миромъ въ землю Иудину, и плакашася Ионаѳана и сущихъ съ нимъ, и убояшася зѣло, и плакаше весь Израиль плачемъ велiимъ.
12:53	И взыскаша вси языцы, иже окрестъ ихъ, сокрушити ихъ, рѣша бо: 54не имѣютъ началника и помогающаго: нынѣ убо поратуемъ ихъ и отъ­имемъ от­ человѣкъ память ихъ.