|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 3 | |
| 3:1 | Воспоминай тѣмъ началствующымъ и владѣющымъ повиноватися и покарятися, и ко всякому дѣлу благу готовымъ быти: |
| 3:2 | ни единаго хулити, не сварливымъ быти, но тихимъ, всяку являющымъ кротость ко всѣмъ человѣкомъ. |
| 3:3 | Бѣхомъ бо иногда и мы несмысленни, и непокориви, и прельщени, работающе похотемъ и сластемъ различнымъ, въ злобѣ и зависти живуще, мерзцы [суще и] ненавидяще другъ друга. |
| 3:4 | Егда же благодать и человѣколюбiе явися Спаса нашего Бога, |
| 3:5 | не от дѣлъ праведныхъ, ихже сотворихомъ мы, но по Своей Его милости, спасе насъ банею пакибытiя и обновленiя Духа Святаго, |
| 3:6 | Егоже излiя на насъ обилно Иисусъ Христомъ, Спасителемъ нашимъ, |
| 3:7 | да оправдившеся благодатiю Его, наслѣдницы будемъ по упованiю жизни вѣчныя. |
| 3:8 | [Зач. 302Б.] [Чадо Тите,] вѣрно слово, и о сихъ хощу тя извѣщати {утвердити}, да пекутся добрымъ дѣломъ прилѣжати вѣровавшiи Богу: сiя суть полезна человѣкомъ и добра. |
| 3:9 | Буихъ же стязанiй и родословiй и рвенiй и сваровъ законныхъ отступай: суть бо неполезны и суетны. |
| 3:10 | Еретика человѣка по первомъ и вторѣмъ наказанiи отрицайся, |
| 3:11 | вѣдый, яко развратися таковый, и согрѣшаетъ, и есть самоосужденъ. |
| 3:12 | Егда послю Артему къ тебѣ или Тихика, потщися прiити ко мнѣ въ Никополь: тамо бо судихъ озимѣти. |
| 3:13 | Зину законника и Аполлоса скоро предпосли, и да ничтоже имъ скудно будетъ. |
| 3:14 | Да учатся же и наши добрымъ дѣломъ прилѣжати въ нужная требованiя, да не будутъ безплодни. |
| 3:15 | Цѣлуютъ тя со мною сущiи вси. Цѣлуй любящыя ны въ вѣрѣ. Благодать со всѣми вами. Аминь. Конецъ посланiю еже къ Титу: имать въ себѣ главы 3, зачалъ же церковныхъ 3. |
