|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 1 | |
| 1:1 | [Зач. 300А.] Павелъ, рабъ Божiй, апостолъ же Иисусъ Христовъ, по вѣрѣ избранныхъ Божiихъ и разуму истины, яже по благочестiю, |
| 1:2 | о упованiи жизни вѣчныя, юже обѣтова неложный Богъ прежде лѣтъ вѣчныхъ, |
| 1:3 | яви же во времена своя слово Свое проповѣданiемъ, еже мнѣ поручено бысть по повелѣнiю Спасителя нашего Бога: |
| 1:4 | Титу, присному чаду по общей вѣрѣ: благодать, милость, миръ от Бога Отца и Господа Иисуса Христа Спаса нашего. |
| 1:5 | [Зач. 300Б.] Сего ради оставихъ тя въ Критѣ, да недокончанная исправиши и устроиши по всѣмъ градомъ пресвитеры, якоже тебѣ азъ повелѣхъ: |
| 1:6 | аще кто есть непороченъ, единыя жены мужъ, чада имый вѣрна, не во укоренiи блуда, или непокорива. |
| 1:7 | Подобаетъ бо епископу безъ порока быти, якоже Божiю строителю: не себѣ угождающу, [не дерзу, не напрасливу,] не гнѣвливу, не пiяницѣ, не бійцѣ, не скверностяжателну, |
| 1:8 | но страннолюбиву, благолюбцу, цѣломудренну, праведну, преподобну, воздержателну, |
| 1:9 | держащемуся вѣрнаго словесе по ученiю, да силенъ будетъ и утѣшати во здравѣмъ ученiи, и противящыяся обличати. |
| 1:10 | Суть бо мнози непокориви, суесловцы и умомъ прельщени, наипаче же сущiи от обрѣзанiя, |
| 1:11 | ихже подобаетъ уста заграждати: иже вся домы развращаютъ, учаще яже не подобаетъ, сквернаго ради прибытка. |
| 1:12 | Рече же нѣкто от нихъ, свой имъ пророкъ: Критяне присно лживи, зліи звѣрiе, утробы праздныя. |
| 1:13 | Свидѣтелство сiе истинно есть: еяже ради вины обличай ихъ нещадно, да здрави будутъ въ вѣрѣ, |
| 1:14 | не внимающе Иудейскимъ баснемъ, ни заповѣдемъ человѣкъ отвращающихся от истины. |
| 1:15 | [Зач. 301.] Вся убо чиста чистымъ: оскверненымъ же и невѣрнымъ ничтоже чисто, но осквернися ихъ и умъ и совѣсть. |
| 1:16 | Бога исповѣдуютъ вѣдѣти, а дѣлы отмещутся Его, мерзцы суще и непокориви и на всякое дѣло благое неискусни. |
