Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
5:1 | И бысть егда услышаша языцы окрестъ, яко создася олтарь и обновися святыня якоже прежде, и разгнѣвашася зѣло: |
5:2 | и совѣщашася погубити родъ Иаковль, иже бѣху посредѣ ихъ, и начаша убивати въ людехъ и истребляти. |
5:3 | И ратоваше Иуда на сыны Исавовы во Идумеи, яже во акраватинѣ, понеже обсѣдяху Израиля: и порази ихъ язвою великою, и утѣсни ихъ, и взя корысти ихъ. |
5:4 | И помяну злобу сыновъ веанихъ, иже бѣху людемъ въ сѣть и въ соблазнъ, во еже ловити имъ на путехъ. |
5:5 | И затворишася от него въ пиргѣхъ, и наступи на нихъ, и прокля ихъ, и зажже пирги ихъ огнемъ, со всѣми яже въ нихъ бяху. |
5:6 | И пройде на сыны Аммони, и обрѣте руку крѣпку и люди многи, и тимоѳеа вожда ихъ. |
5:7 | И состави на нихъ брани многи, и сотрени суть предъ лицемъ его, и поби ихъ, |
5:8 | и взя Иазира и дщери его, и возвратися во Иудею. |
5:9 | И собрашася языцы иже въ Галаадитидѣ противу Израилтяномъ сущымъ въ предѣлѣхъ ихъ, да избiютъ ихъ. и побѣгоша въ даѳему твердыню. |
5:10 | И послаша писанiе ко Иудѣ и братiи его, рекуще: собрашася на ны языцы, иже окрестъ насъ, избити насъ, |
5:11 | и готовятся прiити и взяти твердыню, въ нюже вбѣгохомъ, и тимоѳей есть воевода силъ ихъ: |
5:12 | нынѣ убо пришедъ избави насъ от руки ихъ, яко паде множество от насъ: |
5:13 | и вси братiя наша сущiи въ мѣстѣхъ тувіинихъ убiени суть, и плѣниша женъ ихъ и чадъ ихъ и имѣнiя ихъ, и погубиша тамо яко тысящу мужей. |
5:14 | И еще писанiя чтяхуся, и се, иніи вѣстницы прiидоша от Галилеи въ раздраныхъ ризахъ, возвѣщающе по словесемъ симъ, рекуще: |
5:15 | собрашася на насъ от Птолемаиды и тира, и Сидона и всея Галилеи иноплеменникъ, еже искоренити насъ. |
5:16 | Егда же услыша Иуда и людiе словеса сiя, собрася соборъ великъ усовѣтовати, что сотворятъ братiямъ своимъ сущымъ въ скорби и воюемымъ от нихъ. |
5:17 | И рече Иуда Симону и брату своему: избери себѣ мужы и иди, и избави братiю твою сущую въ Галилеи: азъ же и братъ мой Ионаѳанъ пойдемъ въ Галаадитъ. |
5:18 | И остави Иосифа сына захарiина и азарiю воеводы людемъ съ прочими воины во Иудеи на храненiе, |
5:19 | и заповѣда имъ, глаголя: прилѣжите людемъ симъ и не сотворите брани на языки, дондеже мы возвратимся. |
5:20 | И отдѣлиша Симону мужей три тысящы, да идетъ въ Галилею, Иудѣ же осмь тысящъ мужей въ Галаадитъ. |
5:21 | И иде Симонъ въ Галилею и состави брани многи на языки, и сотрошася языцы от лица его, |
5:22 | и погна вслѣдъ ихъ даже до вратъ Птолемаиды: и падоша от языкъ яко три тысящы мужей, и взя корысти ихъ, |
5:23 | и поятъ сущихъ въ Галилеи и во Арваттисѣхъ съ женами и чады, и вся елика бяху имъ, и приведе во Иудею съ веселiемъ велiимъ. |
5:24 | И Иуда маккавей и Ионаѳанъ братъ его преидоша Иорданъ, и идоша путь трiехъ дній въ пустыни, |
5:25 | и срѣтоша наватеевъ, и прiяша ихъ мирно, и повѣдаша имъ вся, яже случишася братiи ихъ въ Галаадитидѣ, |
5:26 | и яко мнози от нихъ заключени суть въ Восорѣ и Восоръ, во Алемисѣхъ, хасфорѣ, македѣ и Карнаинѣ: сіи вси гради тверди и велицы: |
5:27 | и въ прочiихъ градѣхъ Галаадитиды суть затворени, и во утрiе строятся ополчитися на твердыни и яти и избити всѣхъ сихъ во единъ день. |
5:28 | И возвратися Иуда и вои его въ путь въ пустыню въ Восоръ внезапу: и взя градъ, и уби всякъ мужескъ полъ усты меча, и взя вся корысти ихъ, и сожже его огнемъ: |
5:29 | и воста оттуду нощiю и иде даже до твердыни. |
5:30 | И бысть предъ зарею, и воздвигоша очи свои, и се, людiе мнози, имже не бѣ числа, несуще лѣствицы и миханы взяти твердыню, и ратоваху ихъ. |
5:31 | И видѣ Иуда, яко начася брань, и вопль града взыде даже до небесе трубами и гласомъ велiимъ, |
5:32 | и рече мужемъ силы: бійтеся днесь за братiю вашу. |
5:33 | И изыде тремя началы созади ихъ: и вострубиша трубами и возопиша въ молитвѣ. |
5:34 | И позна полкъ тимоѳеовъ, яко маккавей есть, и отбѣжа от лица его, и поби ихъ язвою велiею, и падоша от нихъ въ день онъ яко осмь тысящъ мужей. |
5:35 | И обратися [Иуда] въ Масфу и повоева ю и взя ю, и уби весь мужескъ полъ ея и взя корысти ея, и сожже ю огнемъ: |
5:36 | оттуду пойде и взя хасфоръ, македъ и Восоръ и прочыя грады Галаадитиды. |
5:37 См.: 🔗2Мак. 10:24 | И по сихъ словесѣхъ собра тимоѳей полкъ инъ и ополчися къ лицу Рафона объ ону страну потока. |
5:38 | И посла Иуда соглядати полкъ. и возвѣстиша ему глаголюще: собрани суть къ нему вси языцы, иже окрестъ насъ, сила велiя зѣло: |
5:39 | и Аравлянъ наяша въ помощь себѣ, и ополчаются объ ону страну потока, готови прiити на тя на брань. и иде Иуда во срѣтенiе ихъ. |
5:40 | И рече тимоѳей началникомъ воевъ своихъ: егда приближится Иуда и полкъ его къ потоку водному, аще прiидетъ къ намъ прежде, не можемъ постояти противу его, яко могій возможетъ противу насъ: |
5:41 | аще же устрашится и ополчится объ ону страну рѣки, прейдемъ къ нему и возможемъ противу его. |
5:42 | Егда же приближися Иуда къ потоку водному, постави книжники людій при потоцѣ и повелѣ имъ глаголя: не оставляйте всякаго человѣка остатися въ полцѣ, но да грядутъ вси на брань. |
5:43 | И прейде на нихъ прежде, и вси людiе вслѣдъ его. и сотрени суть вси языцы предъ лицемъ его, и повергоша оружiя своя, и бѣжаша въ капище, еже къ Карнаинѣ. |
5:44 | И взяша градъ, и капище сожгоша огнемъ со всѣми, яже въ немъ: и побѣжденъ бысть Карнаинъ и не возможе ктому стати противу лица Иудина. |
5:45 | И собра Иуда всѣхъ Израилтянъ, иже бѣху въ Галаадитидѣ, от мала даже до велика, и жены ихъ и чада ихъ и имѣнiя, полкъ великъ зѣло, прiити въ землю Иудину. |
5:46 См.: 🔗2Мак. 12:27 | И прiидоша даже до Ефрона, и сей градъ велiй на входѣ твердъ зѣло: и не бѣ уклонитися от него на десно или шуее, но токмо сквозѣ его проити. |
5:47 | И заключишася, иже бяху въ градѣ, и заградиша врата каменiемъ. и посла къ нимъ Иуда со словесы мирными, глаголя: |
5:48 См.: 🔗Чис. 21:22 | пройдемъ по земли вашей, еже отити въ землю нашу, и никтоже васъ изобидитъ, токмо ногами пройдемъ. и не восхотѣша отверсти ему. |
5:49 | И повелѣ Иуда проповѣдати въ полцѣ ополчитися коемуждо, въ немже кто есть мѣстѣ. |
5:50 | И ополчишася мужiе силы и ратоваша градъ той весь день и всю нощь. и предадеся градъ въ руки его. |
5:51 | И поби всякъ мужескъ полъ усты меча и искорени его, и взя корысти его и пройде сквозѣ градъ по убиенымъ. |
5:52 | И преидоша Иорданъ въ поле великое противу лицу веѳсана. |
5:53 | И бѣ Иуда собирая дальнѣйшихъ и увѣщаваше людій по всему пути, дондеже прiидутъ въ землю Иудину. |
5:54 | И взыдоша на гору Сiонъ съ веселiемъ и радостiю и принесоша всесожженiя, яко не паде от нихъ ни единъ, дондеже возвратишася въ мирѣ. |
5:55 | И во дни, въ няже бысть Иуда и Ионаѳанъ въ Галаадѣ, и Симонъ братъ его въ Галилеи противу лицу Птолемаиды, |
5:56 | слыша Иосифъ захарiинъ сынъ и азарiа, началницы силы, о вещехъ благосодѣянныхъ и о бранехъ, яже сотвориша, |
5:57 | и рѣша: сотворимъ и мы себѣ имя и пойдемъ ратовати на языки, иже окрестъ насъ. |
5:58 | И возвѣстиша сущымъ от силы яже съ ними и идоша на Иамнію. |
5:59 | И изыде горгіа изъ града и мужiе его во срѣтенiе имъ на брань. |
5:60 | И побѣжденъ бысть Иосифъ и азарiа, и гнани быша даже до предѣлъ Иудиныхъ: и падоша въ день онъ от людій Израилевыхъ яко двѣ тысящы мужей. и бысть язва велика въ людехъ Израилевыхъ, |
5:61 | понеже не послушаша Иуды и братiй его, мнящеся храбри быти: |
5:62 | тіи же не бяху от сѣмене мужей онѣхъ, имиже дадеся спасенiе Израилю рукою ихъ. |
5:63 | И мужъ Иуда и братiя его прославишася зѣло предъ всѣмъ Израилемъ и языки всѣми, идѣже слышашеся имя ихъ. |
5:64 | И совокупишася къ нимъ благо глаголющiи. |
5:65 | И изыде Иуда и братiя его, и ратоваху сыновъ Исавлихъ въ земли яже къ югу, и порази Хеврона и дщери его, и разори твердыни его, и столпы его пожже окрестъ. |
5:66 | И воздвижеся ити въ землю иноплеменниковъ и прохождаше самарію. |
5:67 | Въ день онъ падоша священницы на брани, хотящiи храбрѣе быти, внегда изыти имъ на брань безъ совѣта [его]. |
5:68 | И уклонися Иуда во азотъ въ землю иноплеменниковъ, и разори капища ихъ, и изваянiя боговъ ихъ сожже огнемъ, и взя корысти от градовъ, и возвратися въ землю Иудину. |