Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 4 | |
4:1 См.: 🔗Исх. 27:1 🔗3Цар. 8:64 | Сотвори же и олтарь мѣдянъ, двадесять лакотъ въ долготу и двадесять лакотъ въ широту и десять лакотъ въ высоту. |
4:2 См.: 🔗3Цар. 7:23 | И сотвори море [мѣдяно] слiяно, десять лакотъ от устiя до устiя его, кругло окрестъ, и пяти лакотъ въ высоту, и округлость его тридесяти лактей: |
4:3 | и подобiе телцевъ подъ нимъ окрестъ окружающихъ е: десять лакотъ обдержаху умывалницу окрестъ: два рода слiяша телцевъ въ слiянiи ихъ, |
4:4 См.: 🔗3Цар. 7:25 | имже сотвориша ихъ дванадесять телцевъ, иже трiе сматряху къ сѣверу и трiе къ западу, и трiе къ полудню и трiе къ востоку, и море на нихъ [наставлено], задняя же ихъ бяху внутрь [подъ моремъ]: |
4:5 См.: 🔗3Цар. 7:26 | и толстота его дланная, и устiе его яко устiе потира, изваянна яко отрасли крина, вмѣщающее три тысящы мѣръ: и соверши. |
4:6 См.: 🔗3Цар. 7:38 | Сотвори же омывалницъ десять и постави пять одесную и пять ошуюю, да омываютъ въ нихъ вся приносимая на всесожженiя и очищаютъ въ нихъ, море же, да омываются священницы въ немъ. |
4:7 См.: 🔗3Цар. 7:49 🔗1Пар. 28:15 | Сотвори же и подсвѣщникъ златыхъ десять по мѣрѣ ихъ и постави я въ храмъ пять одесную и пять ошуюю. |
4:8 См.: 🔗1Пар. 28:16 | И сотвори столовъ десять и постави въ храмъ пять одесную и пять ошуюю, и фiалъ златыхъ сотвори сто. |
4:9 | И сотвори дворъ священникомъ и дворъ великiй, и двери двора и вереи ихъ помѣдяны мѣдiю. |
4:10 | И море постави от угла дому одесную аки къ востоку прямо. |
4:11 См.: 🔗3Цар. 7:40 | Сотвори же хирамъ удицы мясныя, и кадилницы, и сковраду жертвенную, и вся сосуды его: и соверши хирамъ творити всякое дѣло, еже сотвори соломону царю въ дому Божiи: |
4:12 См.: 🔗3Цар. 7:15 🔗2Пар. 3:15 | столпа два, и на нихъ окружилiя, и вѣнцы на главахъ дву столпу, и мрежицѣ двѣ, еже покрывати главы вѣнцевъ иже суть надъ главами столповъ: |
4:13 | и звонцевъ златыхъ четыреста въ двѣ мрежи, и два ряда шипковъ во мрежи единѣй, еже покрывати два окружилiя вѣнцевъ, иже суть верху столповъ: |
4:14 См.: 🔗3Цар. 7:27 | и подставовъ сотвори десять, и умывалницы сотвори на подставахъ, |
4:15 | и море едино и воловъ дванадесять подъ нимъ, |
4:16 | и котлы, и удицы мясныя и вся сосуды ихъ, яже сотвори хирамъ и принесе царю соломону въ домъ Господень от мѣди чистыя. |
4:17 См.: 🔗3Цар. 7:46 | Во странѣ Иордана слiя ихъ царь, въ толщи земнѣй, между Сокхоѳомъ и между Саридаѳомъ. |
4:18 См.: 🔗3Цар. 7:47 | И сотвори соломонъ вся сосуды сiя многочисленны зѣло, понеже не оскудѣ тягость мѣди. |
4:19 См.: 🔗3Цар. 7:48 | Сотвори же соломонъ вся сосуды дому Божiя, и олтарь златъ, и трапезы, и на нихъ хлѣбы предложенiя, |
4:20 См.: 🔗3Цар. 7:49 | и подсвѣщники, и свѣтилники свѣта, да свѣтятъ предъ святая святыхъ по чину, от злата чиста, |
4:21 | и щипцы ихъ, и свѣтилники ихъ, и фiалы, и чашицы, и кадилницы от злата чиста, |
4:22 См.: 🔗3Цар. 6:31 | и двери храма внутреннiя яже во святая святыхъ и двери дому храма златыя. И совершися все дѣло еже сотвори соломонъ въ дому Господни. |