Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 15 | |
15:1 | И посла царь Антiохъ сынъ димитрiа царя посланiя от острововъ морскихъ Симону архiерею и началнику языка Иудейска и всему языку. |
15:2 | И бяху содержаще образъ сей: царь Антiохъ Симону жерцу великому и языка началнику и языку Иудейскому радоватися: |
15:3 | понеже мужiе губителе одержаша царствiя отецъ нашихъ, хощу же снабдѣти царство, да устрою е якоже бѣ прежде, и от странъ собрахъ множество силъ и сотворихъ корабли воинскiя, |
15:4 | хощу же изыти во страну, да отмщу растлившымъ страну нашу и опустошившымъ грады многи въ царствiи [моемъ], |
15:5 | нынѣ убо утверждаю тебѣ вся оставленiя даней, яже оставиша тебѣ бывшiи прежде мене царiе, и елики ины дары оставиша тебѣ, |
15:6 | и попустихъ тебѣ творити кованiе особыхъ пѣнязей во странѣ твоей, |
15:7 | Иерусалиму же и святынемъ быти свободнымъ: и вся оружiя, елика уготовалъ еси, и твердыни, ихже создалъ еси, ихже держиши, да будутъ тебѣ: |
15:8 | и весь долгъ царевъ, и яже подобаютъ цареви, отнынѣ и во все время да оставятся тебѣ: |
15:9 | егда же одержимъ царство наше, прославимъ тебе и люди твоя и святилище славою великою, яко да явленна будетъ слава ваша по всей земли. |
15:10 | Лѣта сто седмьдесятъ четвертаго изыде Антiохъ въ землю отецъ своихъ, и собрашася къ нему вси вои, яко малымъ быти оставшымъ со трифономъ. |
15:11 | И гнаше его Антiохъ царь, и прiиде бѣжащь въ дору, яже при мори: |
15:12 | вѣдяше бо, яко собрашася злая нань и оставиша его воини. |
15:13 | И ополчися Антiохъ на дору, и съ нимъ дванадесять темъ мужей бранныхъ и осмь тысящъ конниковъ: |
15:14 | и обступи градъ, и корабли от моря прiидоша, и оскорбляше градъ от земли и моря, и не остави ни единаго изыти и внити. |
15:15 | Прiиде же нуминiй и иже съ нимъ от рима, имуще посланiе царемъ и странамъ, въ нихже написана сiя: |
15:16 | Левкій ипатъ римскiй Птоломею царю радоватися: |
15:17 | послы Иудейстiи прiидоша къ намъ друзи наши и споборницы, обновляюще прежнюю дружбу и споборенiе, послани от Симона архiереа и людій Иудейскихъ, |
15:18 | принесоша же и щитъ златый мнасъ тысящи: |
15:19 | угодно убо бысть намъ писати ко царемъ и странамъ, да не наносятъ имъ золъ и да не ратуютъ ихъ, ни градовъ ихъ, ни страны ихъ, и да не спобораютъ ратующымъ противу ихъ: |
15:20 | и изволися намъ прiяти от нихъ щитъ: |
15:21 | аще убо нѣцыи губителе пребѣжаша от страны ихъ къ вамъ, предайте ихъ Симону архiерею, да отмститъ имъ по закону своему. |
15:22 | Таяжде написа димитрiю царю и атталу, и Арiараѳу и Арсаку, |
15:23 | и во вся страны, и сампсаку и спартiатомъ, и въ дилонъ и въ миндонъ, и въ сикiонъ и въ карію, и въ самонъ и въ памфилію, и въ ликію и въ аликарнасъ, и въ родъ и въ фасилиду, и въ кою и въ Сидину, и въ Арадъ и въ гортину, и въ книдъ и въ кипръ и въ киринію. |
15:24 | Списанiе же ихъ написаша Симону архiерею. |
15:25 | Антiохъ же царь ополчися на дору вторицею, наводя выну на ню руки и миханы творя, и заключи трифона еже не входити ниже исходити. |
15:26 | И посла ему Симонъ двѣ тысящы мужей избранныхъ въ помощь ему и сребро и злато и сосуды многи. |
15:27 | И не восхотѣ ихъ прiяти, но отверже вся, елика завѣща ему прежде, и отчуждися от него. |
15:28 | И посла къ нему Аѳиновіа единаго от друговъ своихъ, да побесѣдуетъ съ нимъ, глаголя: вы держите Иоппію и газару и краеградiе еже во Иерусалимѣ, грады царства моего, |
15:29 | предѣлы ихъ опустошисте, и сотвористе язву велику на земли, и господствовасте мѣстами многими въ царствiи моемъ: |
15:30 | нынѣ убо отдадите грады, ихже взясте, и дани мѣстъ, имиже огосподствовасте внѣ предѣловъ Иудейскихъ: |
15:31 | аще же ни, дадите мѣсто сихъ пять сотъ талантовъ сребра, и за опустошенiе, имже опустошисте, и за дани градовъ другія пять сотъ талантовъ: аще же ни, пришедше поратуемъ васъ. |
15:32 | И прiиде Аѳиновій другъ царскiй во Иерусалимъ, и видѣ славу Симонову, и сокровище злата и сребра, и устроенiе доволно, и ужасеся, и возвѣсти ему словеса царска. |
15:33 | И отвѣщавъ Симонъ, рече ему: ниже чуждую землю прiяхомъ, ниже чуждая одержахомъ, но наслѣдiе отецъ нашихъ, от врагъ же нашихъ въ нѣкое время неправедно удержася: |
15:34 | мы же время имуще воспрiяхомъ наслѣдiе отецъ нашихъ: |
15:35 | о Иоппіи же и газарѣхъ, ихже просиши, сіи творяху въ людехъ язву велiю въ странѣ нашей, от сихъ дадимъ талантъ сто. И не отвѣща ему Аѳиновій словесе. |
15:36 | Возвратися же съ яростiю ко царю и возвѣсти ему словеса сiя и славу Симонову и вся елика видѣ. И прогнѣвася царь гнѣвомъ велiимъ. |
15:37 | Трифонъ же всѣдъ къ корабль, отбѣже во орѳосiаду. |
15:38 | И постави царь Кендевеа воеводою приморскимъ и силы пѣхотныя и конныя даде ему. |
15:39 | И повелѣ ему ополчитися противу лица Иудейска, и заповѣда ему создати Кедронъ и утвердити врата, и да ратуетъ люди. Царь же гоняше трифона. |
15:40 | И прiиде Кендевей во Иамнію и нача раздражати люди и входити во Иудею и плѣнити люди и убивати: и созда Кедронъ |
15:41 | и постави тамо конники и силы, яко да исходяще проходятъ пути иудейскiя, якоже повелѣ ему царь. |