Вторая книга Ездры, глава 2 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 2
2:1 См.: 🔗2Пар. 36:22 🔗1Езд. 1:1	Цар­ст­ву­ю­щу киру персскому перваго лѣта, во исполненiе слова Господня усты иереміиными,
2:2	воз­движе Господь духъ кира царя персскаго, и проповѣда во всемъ цар­ст­вѣ сво­емъ, и купно писаньми, глаголя:
2:3	сiя глаголетъ киръ царь персскiй: [Господь] мене постави царя вселен­нѣй, Господь Израилевъ, Господь вышнiй,
2:4	и назнамена мнѣ создати ему домъ во Иерусалимѣ, иже во Иудеи:
2:5	аще убо кто есть въ васъ от­ языка его, да будетъ Господь его съ нимъ: и воз­шедъ во Иерусалимъ, иже во Иудеи, да созиждетъ домъ Господа Израилева: сей Господь, иже вселися во Иерусалимѣ:
2:6	елицы убо окрестъ мѣстъ обитаютъ, да помогутъ ему, иже суть на мѣстѣ томъ, и златомъ и сребромъ,
2:7	даянiемъ съ конми и скоты и иными по обѣщанiю предлагаемыми во святилище Господне, еже во Иерусалимѣ.
2:8	И стоящiи началницы колѣномъ отече­ст­въ Иудиныхъ и колѣна Венiаминова, и священ­ницы и левити, и вси, ихже духъ воз­движе Господь взыти, создати домъ Господень, иже во Иерусалимѣ,
2:9	и иже окрестъ ихъ, помогоша во всемъ златомъ и сребромъ, конми и скоты и обѣтами многими зѣло, ихже чув­ст­во воз­движено бысть.
2:10	И киръ царь изнесе священ­ныя сосуды Господни, ихже пренесе навуходоносоръ [царь Вавилонскiй] изъ Иерусалима и постави ихъ во идолницѣ сво­ей:
2:11	и изнесе тыя киръ царь персскiй и предаде я Миѳридату сокровищехранителю сво­ему,
2:12	той же предаде сасавассару властителю Иудейскому.
2:13	Ихже сiе число бѣ: воз­ливалницъ златыхъ тысяща, и воз­ливалницъ сребряныхъ тысяща, кадилницъ сребряныхъ двадесять девять, фiалъ златыхъ тридесять, сребряныхъ двѣ тысящы четыре ста и десять, и иныхъ сосудовъ тысяща:
2:14	всѣхъ же сосудовъ пренесеныхъ златыхъ и сребряныхъ пять тысящъ четыре ста шестьдесятъ девять.
2:15	Принесени же сасавассаромъ вкупѣ съ тѣми, иже от­ плѣненiя изъ Вавилона во Иерусалимъ.
2:16 См.: 🔗1Езд. 4:6	Во временѣхъ же Артаксеркса царя персскаго, восписаша ему на обитающихъ во Иудеи и Иерусалимѣ вилемосъ и Миѳридатъ, и тавеллiй и раѳимъ, и веелтеѳмъ и самеллiй писецъ, и прочiи со­учинен­нiи, обитающiи въ самаріи и во иныхъ мѣстѣхъ, нижеписан­ное посланiе:
2:17	царю Артаксерксу господину отроцы тво­и, раѳимъ писецъ случаевъ и самеллiй писецъ, и прочiи от­ совѣта ихъ и судiи, иже въ килисиріи и Финикіи:
2:18	и нынѣ знаемо да будетъ господину царю, яко Иудее, иже взыдоша от­ васъ, къ намъ при­­шедшiи во Иерусалимъ градъ от­метный и строптивый, созидаютъ торжища его, и составляютъ стѣны его, и храмъ воз­двизаютъ:
2:19	аще убо градъ той созиждет­ся и стѣны совершены будутъ, не токмо дани не потерпятъ даяти, но и царемъ воспротивят­ся:
2:20	а понеже дѣй­ст­вуют­ся яже о храмѣ, право быти разсуждаемъ не презрѣти сего,
2:21	но знаемо сотворити господину на­шему царю, да аще воз­мнит­ся тебѣ, да взыщет­ся въ книгахъ отецъ тво­ихъ,
2:22	и обрящеши въ лѣтописцѣхъ писано о тѣхъ, и познаеши, яко градъ той бяше от­метникъ и царей и грады смущающь,
2:23	и Иудее от­ступницы, и ополченiе сотворяюще въ немъ от­ вѣка, еяже ради вины и градъ той опустошенъ бысть:
2:24	нынѣ убо знаемо ти творимъ, господине царю яко аще градъ сей созданъ будетъ и стѣны его воз­ставлены будутъ, исходу тебѣ ктому не будетъ въ килисирію и Финикію.
2:25	Тогда восписа царь раѳиму пишущему случаемая и веелтеѳму и самеллiю писцу и прочымъ, со­учиненымъ и обитающымъ въ самаріи и сиріи и Финикіи, сiя писаная:
2:26	чтохъ посланiе, еже посласте ко мнѣ: повелѣхъ убо взыскати, и обрѣтено есть, яко градъ той есть от­ начала царемъ противляющься,
2:27	и человѣцы от­ступленiя и ополченiе въ немъ сотворяюще, и царiе крѣпцы и жестоцы быша во Иерусалимѣ, обладающе и дани налагающе на килисирію и Финикію:
2:28	нынѣ убо повелѣхъ воз­бранити человѣкомъ онымъ созидати градъ и предусмотряти, да ничтоже болѣ сихъ сотворятъ,
2:29	ни да про­исходятъ бо множайшая лукав­ст­ва, во еже царемъ трудъ творити.
2:30	Тогда прочетше от­ царя Артаксеркса написан­ная раѳимъ и самеллiй писецъ и съ ними со­учинен­нiи, впрягше потщан­но прiидоша во Иерусалимъ съ кон­ники и народнымъ ополченiемъ,
2:31	и начаша созидающихъ удержавати: и упразднися созиданiе храма, иже во Иерусалимѣ, даже до втораго лѣта цар­ст­ва дарiа царя персскаго.