Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 7 | |
7:1 | Лѣта сто пятьдесятъ перваго, изыде димитрiй селевкіевъ сынъ от рима, и взыде съ малыми людьми во градъ приморскiй, и воцарися тамо. |
7:2 | И бысть, егда вхождаше въ домъ царства отецъ своихъ, яша силы Антiоха и лисію привести ихъ къ нему. |
7:3 | И увѣдана бысть ему вещь, и рече: не покажите ми лицъ ихъ. |
7:4 | И убиша ихъ воини, и сѣде димитрiй на престолѣ царства своего. |
7:5 | И прiидоша къ нему вси мужiе беззаконнiи и нечестивiи от Израиля, и алкимъ предвождаше ихъ, хотяй жречествовати: |
7:6 | и оклеветаша людій предъ царемъ, глаголюще: погуби Иуда и братiя его всѣхъ друговъ твоихъ и насъ расточи от земли нашея: |
7:7 | нынѣ убо посли мужа, емуже вѣриши, да идетъ и видитъ истребленiя вся, яже сотвори намъ и странѣ царстѣй, и да мучитъ ихъ и всѣхъ помогающихъ имъ. |
7:8 | И избра царь вакхида друга царска, иже господствоваше объ ону страну рѣки, и великаго въ царствѣ и вѣрна цареви, |
7:9 | и посла его и алкима нечестиваго, и устави ему жречество, и повелѣ ему сотворити отмщенiе въ сынѣхъ Израилевыхъ. |
7:10 | И отидоша и прiидоша съ силою велiею въ землю Иудину: и посла вѣстники ко Иудѣ и братiи его словесы мирными съ лестiю. |
7:11 | И не вняша словесемъ ихъ: видѣша бо, яко прiидоша съ силою велiею. |
7:12 | И собрашася ко алкиму и вакхиду собранiя книжникъ изыскати праведная. |
7:13 | И первiи Асидее бѣху въ сынѣхъ Израилевыхъ, и искаху от нихъ мира. |
7:14 | Рекоша бо: человѣкъ жрецъ от сѣмене Аароня прiиде въ силахъ и не изобидитъ насъ. |
7:15 | И глагола съ ними словеса мирна и клятся имъ, глаголя: не воздамъ вамъ злая, ниже другомъ вашымъ. и вѣроваша ему. |
7:16 | И поима от нихъ шестьдесятъ мужей и уби ихъ во единъ день по словесѣхъ, якоже писано есть: |
7:17 См.: 🔗Пс. 78:2 | плоти преподобныхъ твоихъ и крови ихъ пролiяша окрестъ Иерусалима, и не бѣ погребаяй ихъ. |
7:18 | И нападе страхъ ихъ и трепетъ на вся люди, яко рекоша: нѣсть въ нихъ истины и суда: преступиша бо уставленiе и клятву, еюже кляшася. |
7:19 | И воздвижеся вакхидъ от Иерусалима и ополчися въ визеѳѣ, и посла и ятъ многихъ отступившихъ от него мужей и нѣкiихъ от людій, и закла ихъ, [и] въ кладязь великъ [вверже]: |
7:20 | и вручи страну алкиму и остави силу въ помощь ему: и отъиде вакхидъ ко царю. |
7:21 | И подвизашеся алкимъ о архiерействѣ. |
7:22 | И собрашася къ нему вси возмущающiи люди своя, и одержаша землю Иудину, и сотвориша язву велику во Израили. |
7:23 | И видѣ Иуда вся злая, яже сотвори алкимъ, и иже съ нимъ бяху, сыномъ Израилевымъ паче языковъ. |
7:24 | И изыде во вся предѣлы иудейскiя по окрестъ и сотвори отмщенiе на мужехъ отторгшихся, и престаша ходити во страну. |
7:25 | Егда же увидѣ алкимъ, яко укрѣпися Иуда и иже съ нимъ, и позна, яко не можетъ противостояти имъ, и возвратися ко царю и оклевета ихъ лукавнѣ. |
7:26 См.: 🔗2Мак. 14:12 | И посла царь никанора, единаго от началникъ своихъ славныхъ, и ненавидящаго и враждующаго на Израиля, и повелѣ ему избити люди. |
7:27 | И прiиде никаноръ во Иерусалимъ съ силою великою и посла ко Иудѣ и братiи его съ лестiю словесы мирными, глаголя: |
7:28 | да не будетъ брань между мною и вами: прiиду съ мужы малыми, да вижду лица ваша съ миромъ. |
7:29 | И прiиде ко Иудѣ, и поздравляху другъ друга мирно: и воини уготовани бяху восхитити Иуду. |
7:30 | И познася слово Иудѣ, яко съ лестiю прiиде къ нему: и устрашися от него и не восхотѣ ктому видѣти лица его. |
7:31 | И позна никаноръ, яко открыся совѣтъ его, и изыде во срѣтенiе Иудѣ бранiю близъ Харфарсарама. |
7:32 | И падоша от сущихъ при никанорѣ яко пять тысящъ мужей, и бѣжаша во градъ давидовъ. |
7:33 | И по словесѣхъ сихъ взыде никаноръ на гору Сiонъ: и изыдоша от иереевъ от святыхъ и от старѣйшинъ людскихъ поздравити его мирно и показати ему всесожженiе приносимое за царя. |
7:34 | И поругася имъ и посмѣяся имъ, и оскверни ихъ и глагола гордо. |
7:35 См.: 🔗2Мак. 14:33 | И клятся съ яростiю, рекій: аще не предастся Иуда и воини его въ руки моя нынѣ, и будетъ, егда возвращуся въ мирѣ, сожгу храмъ сей. и изыде съ яростiю велiею. |
7:36 | И внидоша жерцы и сташа предъ лицемъ олтаря и храма и плачуще рекоша: |
7:37 | ты, Господи, избралъ еси храмъ сей, нарещися имени твоему въ немъ, да будетъ храмъ молитвы и прошенiя людемъ твоимъ: |
7:38 | сотвори отмщенiе на человѣцѣ семъ и на воехъ его, и да падутъ мечемъ: помяни хуленiя ихъ и не даждь имъ обиталища. |
7:39 | И изыде никаноръ от Иерусалима и ополчися въ веѳоронѣ и срѣте его сила Сирска. |
7:40 | Иуда же приближися во Адасу съ тремя тысящьми мужей. и помолися Иуда и рече: |
7:41 | иже послани бяху от царя Ассирійскаго [сеннахирима], Господи, егда похулиша тя, изыде ангелъ твой и порази от нихъ сто осмьдесятъ пять тысящъ: |
7:42 | тако сокруши ополченiе сiе предъ нами днесь, и да познаютъ прочiи, яко зло глагола на святая твоя, и суди ему по злобѣ его. |
7:43 | И сотвориша воини брань въ третiйнадесять день месяца Адара, и сотреся ополченiе никанорово, и паде самъ первый во брани. |
7:44 | Егда же увидѣша вои его, яко паде никаноръ, повергше оружiя своя бѣжаша. |
7:45 | И гнаша ихъ путь дне единаго от Адаса, дондеже прiити въ газиръ, и трубами трубиша вслѣдъ ихъ со знаменами. |
7:46 | И изыдоша от всѣхъ селъ Иудейскихъ окрестъ и заключиша ихъ рогами, и возвращахуся тіи къ нимъ и падоша вси мечемъ, и не оста от нихъ ни единъ. |
7:47 | И взяша корысти ихъ и плѣнъ, и главу никанорову отсѣкоша, и десницу его, юже простре гордо, и принесоша и повѣсиша противу Иерусалима. |
7:48 | И возвеселишася людiе зѣло, и сотвориша день той день веселiя великаго, |
7:49 | и уставиша праздновати на всяко лѣто день той третiйнадесять месяца Адара. |
7:50 | И умолче земля Иудина на дни малы. |