Книга пророка Амоса, глава 4

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 4
4:1 См.: 🔗Пс. 21:13 🔗Ис. 5:17 🔗Иез. 6:3	Слышите слово сiе, юницы Васанитидскiя, яже въ горѣ самарійстѣй, преобидящыя убогихъ и попирающыя нищихъ, глаголющыя господемъ сво­имъ: подадите намъ, да пiемъ.
4:2	Клят­ся Господь святыми сво­ими, яко се, дніе грядутъ на вы, и возмутъ вы во оружiи, и сущихъ съ вами ввергутъ въ конобы подгнѣщаемыя огнен­нiи губителiе:
4:3 См.: 🔗Иез. 12:12	и извержены будете наги прямо другъ друга и от­вержетеся въ гору ремманъ, глаголетъ Господь.
4:4 См.: 🔗Ам. 5:5	Внидосте въ Веѳиль и беззакон­новасте, и въ Галгалѣхъ умножисте еже нече­ст­вовати, и при­­несосте заутра требы вашя, въ треден­ство десятины вашя:
4:5 См.: 🔗Лев. 7:12	и прочтоша извнѣ законъ и при­­зваша исповѣданiе: воз­вѣстите, яко сiя воз­любиша сынове Израилевы, глаголетъ Господь Богъ.
4:6	Азъ же дамъ вамъ оскомину зубомъ во всѣхъ градѣхъ вашихъ и недостатокъ хлѣба во всѣхъ мѣстѣхъ вашихъ: и не обратистеся ко мнѣ, глаголетъ Господь.
4:7 См.: 🔗3Цар. 17:1 🔗Иак. 1:17	И азъ удержахъ дождь от­ васъ прежде трiехъ месяцевъ жатвы, и надождю на единъ градъ, а на другій [единъ] не надождю: часть едина надождит­ся, и часть, на нюже не надождю, изсохнетъ:
4:8	и соберут­ся два и три града во градъ единъ пити воду и не насытят­ся: и не обратистеся ко мнѣ, глаголетъ Господь.
4:9 См.: 🔗Аг. 2:17	Побихъ вы раждеженiемъ и златеницею: умножисте вертограды вашя, винограды вашя и смоквы вашя и масличiя ваша: сiя поядоша гусеницы: и ниже тако обратистеся ко мнѣ, глаголетъ Господь.
4:10 См.: 🔗Исх. 9:3 🔗Исх. 12:29	Послахъ на вы смерть на пути Египетстѣмъ, и избихъ оружiемъ юношы вашя, съ плѣномъ коней тво­ихъ, и изведохъ во огни полки вашя во гнѣвѣ мо­емъ: и ниже тако обратистеся ко мнѣ, глаголетъ Господь.
4:11 См.: 🔗Быт. 19:24 🔗Ос. 11:8	Разорихъ вы, якоже разори Богъ Cодому и Гоморру, и бысте яко главня исторжена изъ огня: и ниже тако обратистеся ко мнѣ, глаголетъ Господь.
4:12 См.: 🔗Лк. 15:18	Сего ради сице сотворю ти, Израилю: обаче, яко сице сотворю ти, уготовися при­­зывати Бога тво­его, Израилю.
4:13	Се, азъ утвержаяй громъ и созидаяй вѣтръ и воз­вѣщаяй въ человѣцѣхъ христа сво­его, творяй утро и мглу и восходяй на высокая земли: Господь Богъ Вседержитель имя ему.