Первая книга Маккавейская, глава 3 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 3
3:1	И воста Иуда нарицаемый маккавей сынъ его вмѣсто его.
3:2	И помогаху ему вси братiя его и вси елицы при­­лѣпишася ко отцу его, и ополчахуся ополченiемъ Израиль съ веселiемъ.
3:3	И распространи славу людемъ сво­имъ: и облечеся въ броня яко исполинъ и препоясася оружiемъ сво­имъ бран­нымъ, и состави рати, защищая ополченiя мечемъ сво­имъ,
3:4	и уподобися льву въ дѣлѣхъ сво­ихъ, и яко скименъ рыкающь въ ловитвѣ:
3:5	и погна беззакон­ныя изслѣдуяй, и смущающихъ люди его пожже пламенемъ.
3:6	И слякошася беззакон­нiи от­ страха его, и вси дѣлателе беззаконiя смятошася, и благопоспѣшно быти спасенiе рукою его.
3:7	И огорчи цари многи и воз­весели Иакова въ дѣлѣхъ сво­ихъ, и даже до вѣка память его во благословенiе:
3:8	и пройде грады Иудины, и погуби нечестивыхъ от­ нихъ, и от­врати гнѣвъ от­ Израиля,
3:9	и именитъ бысть даже до послѣднихъ земли, и собра погибающихъ.
3:10	Аполлонiй же собра языки и от­ самаріи силу велiю, еже ратовати на Израиля.
3:11	И увѣда Иуда и изыде во срѣтенiе ему, и порази его и уби того: и падоша язвенiи мнози, а прочiи убѣгоша.
3:12	И взя корысти ихъ, и мечь аполлонiевъ отъ­я Иуда, и бысть воюя имъ вся дни.
3:13	И услыша сиронъ началникъ воевъ Сирскихъ, яко собра Иуда совокупленiе и церковь вѣрныхъ съ нимъ исходящихъ на брань,
3:14	и рече: сотворю себѣ имя, и прославлюся въ цар­ст­вiи, и поборю Иуду и сущихъ съ нимъ и уничижающихъ слово царево.
3:15	[и уготовася] и при­­ложи еже взыти: и взыде съ нимъ полкъ нечестивыхъ крѣпокъ помощи ему и сотворити от­мщенiе на сынѣхъ Израилевыхъ.
3:16	И при­­ближися даже до восхода веѳоронска: и изыде Иуда во срѣтенiе ему въ малѣ.
3:17	Егда же увидѣша полкъ грядущiй во срѣтенiе имъ, рѣша Иудѣ: како можемъ въ малѣ суще ополчатися противу множе­ст­ва толикаго крѣпкаго? и мы утруждени есмы постомъ днесь.
3:18	И рече Иуда: удобь есть объяти многихъ рукою малыхъ: и нѣсть разн­ствiя предъ Богомъ небеснымъ спасти во многихъ или въ малыхъ:
3:19	яко не во множе­ст­вѣ воевъ одолѣнiе брани есть, токмо от­ небесе крѣпость:
3:20	сіи грядутъ къ намъ во множе­ст­вѣ укоризны и беззаконiя, еже исторгнути насъ и жены нашя и чада наша, еже взяти корысти нашя,
3:21	мы же ополчаемся за душы нашя и законы нашя:
3:22	и самъ Господь сокрушитъ ихъ предъ лицемъ нашимъ, вы же не устрашитеся ихъ.
3:23	Якоже преста глаголати, и наскочи на нихъ внезапу, и сотреся сиронъ и вои его предъ нимъ:
3:24	и погна его въ низхожденiе веѳорона даже до поля: и падоша от­ нихъ яко осмь сотъ мужей, прочiи же побѣгоша въ землю Филистимлю.
3:25	И нападе страхъ Иудинъ и братiи его и боязнь на вся языки, яже окрестъ ихъ.
3:26	И дойде до царя имя его, и о ополченiихъ Иудиныхъ повѣдаху вси языцы.
3:27	Егда же услыша царь Антiохъ словеса сiя, разгнѣвася яростiю, и пославъ собра силы вся цар­ст­ва сво­его, полкъ крѣпокъ зѣло:
3:28	и от­верзе сокровище свое, и даде оброки воиномъ сво­имъ на лѣто, и заповѣда имъ въ лѣто быти готовымъ на всяку потребу.
3:29	И видѣ, яко оскудѣ сребро от­ сокровищъ, и дани от­ странъ малы, ради несогласiя и язвы, яже сотвори на земли, да возметъ закон­ная, яже бяху от­ первыхъ дній.
3:30	И устрашися, да не воз­неимѣетъ единою и дважды въ росходы и даянiя, яже даяше прежде простран­ною рукою, и избыточе­с­т­вова паче царей быв­шихъ прежде.
3:31	И смятеся душею сво­ею зѣло, и умысли ити въ персиду и прiяти дани от­ странъ и собрати сребра много.
3:32	И остави лисію человѣка славна и от­ рода царска надъ вещьми царскими, от­ рѣки Евфрата даже до предѣлъ Египетскихъ:
3:33	и питати Антiоха сына сво­его, дондеже воз­вратит­ся самъ.
3:34	И предаде ему полъ силы и слоновъ и заповѣда ему о всѣхъ, ихже совѣща, и о обитающихъ во Иудеи и Иерусалимѣ,
3:35	послати на нихъ силу, еже сокрушити и исторгнути крѣпость Израилеву и останокъ Иерусалима, и отъ­яти память ихъ от­ мѣста,
3:36	и вселити сыновъ инородныхъ во всѣхъ предѣлѣхъ ихъ, и по жребiю раздѣлити землю ихъ.
3:37	И царь взя полъ силы остав­шихъ и изыде от­ Антiохіи от­ града цар­ст­ва сво­его, лѣта сто четыредесять седмаго: и прейде Евфратъ рѣку и прохожда­ше въ вышнiя страны.
3:38	И избра лисіа Птоломеа сына дорименова, и никанора, и горгію мужы сильныя от­ друговъ царевыхъ.
3:39	И посла съ ними четыредесять тысящъ мужей и седмь тысящъ кон­никовъ, еже ити въ землю Иудину и растлити ю по словеси царску.
3:40	И от­идоша со всею силою сво­ею, и прiидоша, и ополчишася близъ Аммаума на земли полевой.
3:41	И слышаша купцы страны тоя имя ихъ, и взяша сребро и злато много зѣло и отроки: и прiидоша въ станы, да возмутъ сыновъ Израилевыхъ въ рабы, и при­­ложишася къ нимъ вои Сирскiя и земли иноплемен­никовъ.
3:42	И видѣ Иуда и братiя его, яко умножишася злая, и вои ополчахуся въ предѣлѣхъ ихъ: и познаша словеса царева, яже повелѣ людемъ сотворити въ погубленiе и скончанiе.
3:43	И рече кійждо ко искрен­нему сво­ему: востанемъ за истребленiе людій нашихъ и ополчимся за люди нашя и святыя.
3:44	И собрася сонмъ еже быти готовымъ на брань и еже молитися и просити милости и щедротъ.
3:45	И Иерусалимъ бѣ необитаемь аки пустыня: не бѣ входяй и исходяй от­ порожденiй его, и святыня попрана, и сынове инородныхъ въ краеградiи, бысть обиталище языкомъ: и взяся веселiе от­ Иакова, и оскудѣ [ту] сопѣль и гусли.
3:46	И собрашася и прiидоша въ Массифу прямо Иерусалиму, понеже мѣсто молитвы въ Массифѣ первѣе Израилю.
3:47	И постишася того дне, и облекошася во вретища, и пепелъ посыпаша на главы своя, и растерзаша одѣянiя своя,
3:48	и распростроша книгу закона, о нихже испытаху языцы написати на нихъ подобiя идолъ сво­ихъ,
3:49	и при­­несоша ризы святителскiя и первородная и десятины: и воз­двигнуша назиреевъ, иже наполниша дни,
3:50	и возопиша гласомъ [велiимъ] на небо, рекуще: что сотворимъ симъ и камо ихъ от­ведемъ?
3:51	и святая твоя попрашася и осквернишася, и священ­ницы тво­и въ скорби и въ смиренiи:
3:52	и се, языцы собрашася на ны, да расторгнутъ насъ: ты вѣси, яже помышляютъ на насъ:
3:53	како воз­можемъ стати предъ лицемъ ихъ, аще не ты поможеши намъ?
3:54	И вострубиша трубами и возопиша гласомъ велiимъ.
3:55	И посемъ постави Иуда во­еводы людій, тысящники и сотники, и пятьдесятники и десятоначалники.
3:56 См.: 🔗Втор. 20:5	И рекоша созидающымъ домы и обручающымъ жены, и насаждающымъ винограды и боязливымъ воз­вратитися комуждо въ домъ свой по закону.
3:57	И воз­движеся полкъ и ополчися на югъ Аммаума.
3:58	И рече Иуда: препояшитеся, и будите въ сыны сильны, и будите готови въ заутрiе ополчитися на языки сiя, иже собрашася на ны растерзати насъ и святая наша:
3:59	яко лучше есть намъ умрети въ брани, неже видѣти злая людій нашихъ и святыхъ:
3:60 См.: 🔗1Пар. 19:13	и якоже воля будетъ на небеси, тако сотворитъ.