Третья книга Ездры, глава 11 неканонич.

	Язык: Церковнослав. (дореф.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 11
11:1	И видѣхъ сонъ, и се, восхожда­ше от­ моря орелъ, емуже бяху два­на­де­сять крилъ пернатыхъ и главы три.
11:2	И видѣхъ, и се, простира­ше крилѣ сво­и по всей земли, и вси вѣтри небеснiи надыхаху въ него и собирахуся.
11:3	И видѣхъ, и от­ перiя его раждахуся сопротивная перiя, и тая творяхуся въ перiйцахъ дробныхъ и малыхъ:
11:4	ибо главы его бяху покойны, и средняя глава бѣ болши инѣхъ главъ, но та покояшеся съ ними.
11:5	И видѣхъ, и се, орелъ летяще крилами сво­ими и воцарися на земли и надъ живущими на ней.
11:6	И видѣхъ, яко повиновена бяху ему вся поднебесная, и никтоже ему противляшеся ни единъ от­ твари, яже есть на земли.
11:7	И видѣхъ, и се, воста орелъ на ногти своя и испусти гласъ периемъ сво­имъ, глаголя:
11:8	не бдите вси вкупѣ, спите единъ кійждо въ мѣстѣ сво­емъ и по времени бдите,
11:9	главы же на послѣдокъ да сохранят­ся.
11:10	И видѣхъ, и се, гласъ не исхожда­ше от­ главъ его, но от­ среды тѣла его.
11:11	И исчислихъ противная перiя его, и се, сихъ бяше осмь.
11:12	И видѣхъ, и се, о десную страну воста едино перо и воцарися надъ всею землею.
11:13	И бысть, егда цар­ст­воваше, прiиде ему конецъ, и не явися мѣсто его, и ино воста и цар­ст­воваше: тое много держа время.
11:14	И бысть, егда цар­ст­воваше, и грядяше конецъ его, да не явит­ся якоже прежднее,
11:15	и се, гласъ испущенъ бысть тому, глаголя:
11:16	слыши ты, еже толико время держало еси землю, сiя воз­вѣщаю тебѣ, прежде неже начнеши не являтися:
11:17	никтоже послѣди тебе одержитъ время твое, но ни полъ его.
11:18	И воз­движеся третiе и одержа начал­ст­во, якоже и преждняя, и не явися и тое.
11:19	И тако случа­шеся всѣмъ инымъ, ко­емуждо особно начал­ст­во содержати и паки никогда явитися.
11:20	И видѣхъ, и се, во время послѣд­ст­ву­ю­щее перiе воз­двизахуся о десную страну, да одержатъ и тіи начал­ст­во, и от­ тѣхъ быша, иже содержаху, но обаче абiе не являхуся:
11:21	ибо и нѣцыи от­ нихъ воз­двизахуся, но не содержаху начал­ст­ва.
11:22	И видѣхъ по сихъ, и се, не явишася два­на­де­сять перiй и два перiйца.
11:23	И ничтоже бяше остало въ тѣлѣ орли, токмо двѣ главы покоящыяся и шесть перiйцъ.
11:24	И видѣхъ, и се, шестимъ перiйцамъ раздѣлена суть два и пребыста подъ главою, яже есть на деснѣй странѣ, ибо четыри пребыша въ мѣстѣ сво­емъ.
11:25	И видѣхъ, и се, подкрилiя мышляху себе воз­двигнути и одержати начал­ст­во.
11:26	И видѣхъ, и се, едино воз­движено есть, но абiе не явися,
11:27	и вторая скорѣе, неже прежняя, не явишася.
11:28	И видѣхъ, и се, два, яже остастася въ себѣ сами, помышляста и тая цар­ст­вовати.
11:29	И въ томъ егда помышляста, и се, едина от­ покоящихся главъ, яже бяше средняя, воз­бужда­шеся: сiя бо бяше от­ дву главу болшая.
11:30	И видѣхъ, яко со­единены суть двѣ главы съ собою,
11:31	и се, обращена есть глава съ тѣми, яже съ нею бяху, и снѣде два подкрылята, яже помышляста цар­ст­вовати.
11:32	Сiя же глава устраши всю землю и облада­ше на ней тѣми, иже обитаютъ на земли, съ трудностiю многою, и власть обдержа надъ кругомъ земнымъ паче всѣхъ крилъ, яже быша.
11:33	И видѣхъ по сихъ, и се, средняя глава внезапу не явися, и сiя якоже крилѣ.
11:34	Остастѣся же двѣ главы, яже и тѣ такожде цар­ст­вовастѣ на земли и надъ обитающими на ней.
11:35	И видѣхъ. и се, пожре глава, сущая о десную страну, оную, яже о шуюю.
11:36	И слышахъ гласъ глаголющь ми: зри противу тебе и разсмотряй еже видиши.
11:37	И видѣхъ, и се, якоже левъ разгнѣванъ от­ лѣса рыкающь, и видѣхъ, яко испуска­ше гласъ человѣческiи ко орлу, и рече глаголя:
11:38	слыши ты, и воз­глаголю тебѣ, и речетъ вышнiй тебѣ:
11:39	не ты ли еси, иже остал­ся от­ четырехъ животныхъ, яже сотворихъ цар­ст­вовати въ вѣцѣ мо­емъ, и да чрезъ нихъ прiидетъ конецъ вѣка ихъ?
11:40	и четвертый грядый побѣди вся животная, яже преидоша, и властiю одержа вѣкъ со трепетомъ многимъ и всю вселен­ную съ трудностiю лютою, и обита­ше толико временъ на крузѣ земнѣмъ съ лестiю:
11:41	и судилъ еси землю не со истиною,
11:42	сокрушилъ бо еси кроткихъ и повредилъ еси миро­любивыхъ, и воз­любилъ ложныхъ, и разорилъ еси жилища ихъ, иже плодъ творяху, и смирилъ еси стѣны ихъ, иже тебе не повредиша:
11:43	и взыде укоренiе твое къ вышнему и гордыня твоя ко крѣпкому,
11:44	и узрѣ вышнiй гордая времена, и се, скончана суть, и беззаконiя его исполнишася:
11:45	сего ради не являйся ты, орле, и крилѣ тво­и грозныя и перiйца твоя строптивая, и главы твоя лукавыя, и ногти тво­и злѣйшiи, и все тѣло твое суетное,
11:46	яко да прохладит­ся вся земля и обратит­ся свободна от­ тво­ея силы, и уповаетъ на судъ и милосердiе того, иже сотвори ю.