Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 23 | |
23:1 См.: 🔗2Пар. 34:29 | И возвѣстиша сiя глаголы цареви: и посла царь, и собра къ себѣ вся старѣйшины Иудины и Иерусалимляны, |
23:2 См.: 🔗2Пар. 34:30 | и вниде царь въ домъ Господень, и вси мужiе Иудины и вси живущiи во Иерусалимѣ съ нимъ, и жерцы, и пророцы, и вси людiе от мала и до велика, и прочте во ушеса ихъ вся словеса книги завѣта обрѣтшiяся въ дому Господни: |
23:3 | и ста царь у столпа и завѣща завѣтъ предъ Господемъ, еже ходити вслѣдъ Господа и хранити заповѣди его и свидѣнiя его и оправданiя его всѣмъ сердцемъ и всею душею, еже возставити словеса завѣта сего, яже писана въ книзѣ сей. И сташа вси людiе въ завѣтѣ. |
23:4 См.: 🔗Сир. 49:3 | И заповѣда царь хелкіи жерцу великому и жерцемъ вторымъ и стрегущымъ вратъ изнести от храма Господня вся сосуды сотвореныя Ваалу и дубравѣ и всей силѣ небеснѣй, и сожже и внѣ Иерусалима въ садимоѳѣ кедрстѣ и изверже прахъ ихъ въ Веѳиль: |
23:5 См.: 🔗2Пар. 34:33 | и сожже хомаримы, ихже даша царiе Иудины, и кадяху въ высокихъ и во градѣхъ Иудиныхъ и во окрестныхъ Иерусалима, и кадящихъ Ваалу, и солнцу, и лунѣ, и планетамъ и всей силѣ небеснѣй: |
23:6 См.: 🔗4Цар. 21:3 | и изнесе кумiръ изъ храма Господня внѣ Иерусалима на потокъ кедрскъ, и сожже его въ потоцѣ кедрстѣ, и истни въ прахъ, и вверже прахъ ихъ въ гробы сыновъ людскихъ: |
23:7 См.: 🔗Втор. 23:17 | и разруши храмъ кадисимовъ, иже бѣ въ храмѣ Господни, идѣже жены прядяху ризы кумiру: |
23:8 См.: 🔗2Пар. 34:5 | и возведе вся жерцы от градовъ Иудиныхъ, и оскверни высокая, идѣже кадяху жерцы, от гаваи да вирсавеи: и разруши храмъ вратъ, иже бѣ при дверехъ вратъ иисуса князя граднаго, иже ошуюю входящымъ дверми града. |
23:9 | Обаче не вхождаху жерцы высокихъ ко олтарю Господню во Иерусалимѣ, но токмо ядяху опрѣсноки посредѣ братiи своея. |
23:10 См.: 🔗Лев. 18:21 | И оскверни тафеѳа, иже въ дебри сыновъ Еномлихъ, еже не превести мужу сына своего и мужу дщере своея молоху сквозѣ огнь: |
23:11 | и сожже кони, ихже даша царiе Иудины солнцу во входѣ храму Господня, при влагалищи наѳана, царева скопца во фаруримѣ: и колесницу солнечную сожже огнемъ: |
23:12 | и олтари, яже на кровѣ горницы Ахазовы, яже сотвориша царiе Иудины и олтари, иже созда Манассіа во двою двору храма Господня, раскопа царь, и сверже оттуду, и всыпа прахъ ихъ въ потокъ кедрскъ: |
23:13 См.: 🔗3Цар. 11:7 | и храмъ, иже предъ лицемъ Иерусалима, одесную горы мосѳаѳъ, егоже созда соломонъ царь Израилевъ Астартѣ мерзости Сидонстѣй и хамосу мерзости Моавли и молхолу мерзости сыновъ Аммонихъ, оскверни царь: |
23:14 См.: 🔗2Пар. 34:5 | и сокруши столпы, и искорени дубравы, и наполни мѣста ихъ костми человѣческими: |
23:15 См.: 🔗3Цар. 12:28 | и олтарь иже во Веѳили высокiй, егоже сотвори иеровоамъ сынъ наватовъ, иже въ грѣхъ введе Израиля, и олтарь той высокiй раскопа, и сокруши каменiе его, и истни въ прахъ, и сожже кумiры. |
23:16 См.: 🔗3Цар. 13:2 | И восклонися Иосіа, и видѣ гробы сущыя во градѣ тамо, и посла, и взя кости от гробъ, и сожже на олтари, и оскверни его по глаголу Господню, егоже глагола человѣкъ Божiй, егда стояше иеровоамъ въ праздникъ предъ олтаремъ: и обращься возведе очи свои на гробъ человѣка Божiя глаголавшаго словеса сiя. |
23:17 См.: 🔗3Цар. 13:2 | и рече: что могила сiя, юже азъ вижду? И рѣша ему мужiе града: гробъ сей человѣка Божiя есть, иже прiиде от Иуды и проглагола словеса сiя, яже сотворилъ еси нынѣ надъ олтаремъ, иже въ Веѳили. |
23:18 См.: 🔗3Цар. 13:31 | И рече: оставите его, да не подвижетъ ни единъ мужъ костей его. И оставиша кости его съ костьми пророка пришедшаго от самаріи. |
23:19 | Еще и вся храмы высокихъ сущихъ во градѣхъ самарійскихъ, яже сотвориша царiе Израилевы прогнѣвляюще Господа, отверже Иосіа, и сотвори имъ вся дѣла, яже сотвори въ Веѳили, |
23:20 | и закла вся жерцы высокихъ сущыя тамо предъ олтарми, и сожже на нихъ кости человѣчи, и возвратися во Иерусалимъ. |
23:21 См.: 🔗2Пар. 35:1 🔗2Езд. 1:1 | И заповѣда царь всемъ людемъ, глаголя: сотворите пасху Господеви Богу нашему, якоже писано въ книзѣ завѣта сего: |
23:22 См.: 🔗2Пар. 35:18 | яко не бысть пасха сiя от дній судій, иже судиша Израилеви, и во всѣхъ днехъ царей Израилевыхъ и царей Иудиныхъ: |
23:23 См.: 🔗2Пар. 35:19 | но токмо во осмоенадесять лѣто царя Иосіи бысть пасха Господу во Иерусалимѣ. |
23:24 См.: 🔗2Пар. 35:20 | Еще и волшебники, и вражбиты, и Ѳерафимы, и кумiры, и вся мерзости бывшыя въ земли Иудинѣ и во Иерусалимѣ, искорени царь Иосіа, да утвердитъ словеса законная писанная въ книзѣ, юже обрѣте хелкіа жрецъ въ храмѣ Господни. |
23:25 См.: 🔗4Цар. 18:5 🔗Сир. 49:4 | Подобенъ ему не бысть предъ нимъ царь, иже обратися къ Господеви всѣмъ сердцемъ своимъ и всею душею своею и всею силою своею по всему закону Моисеову, и по немъ не воста подобенъ ему. |
23:26 См.: 🔗4Цар. 22:17 🔗Иер. 15:4 | Обаче не отвратися Господь от ярости гнѣва своего великаго, имже возъярися гнѣвомъ на Иуду, на прогнѣванiя, имиже прогнѣва его Манассіа, |
23:27 | и рече Господь: еще и Иуду отрину от лица моего, якоже отринухъ Израиля, и градъ сей отвергу, егоже избрахъ, Иерусалима, и храмъ, о немже рѣхъ: будетъ имя мое ту. |
23:28 См.: 🔗2Пар. 34:1 | И прочая словесъ Иосіевыхъ, и вся елика сотвори, не сiя ли написана въ книзѣ словесъ дній царей Иудиныхъ? |
23:29 См.: 🔗2Пар. 35:20 | Во днехъ же его взыде фараонъ нехао царь Египетскъ на царя Ассирійска на реку Евфратъ: и изыде царь Иосіа на срѣтенiе ему, и уби его нехао царь въ Магеддонѣ, егда его узрѣ. |
23:30 | И взяша его отроцы его мертва изъ Магеддона и принесоша его во Иерусалимъ, и погребоша его во гробѣ его во градѣ давидовѣ. И пояша людiе земли тоя Иоахаза сына Иосіина и помазаша его, и воцариша его вмѣсто отца его. |
23:31 См.: 🔗2Пар. 36:2 🔗4Цар. 24:18 | Сынъ двадесяти и трiехъ лѣтъ бѣ Иоахазъ, внегда нача царствовати и три месяцы царствова во Иерусалимѣ. Имя же матери его Амитала, дщи иереміи изъ ловны. |
23:32 | И сотвори лукавое предъ очима Господнима, по всѣмъ елика сотвориша отцы его. |
23:33 См.: 🔗2Пар. 36:3 | И пресели его фараонъ нехао въ ревлаамъ въ землю Емаѳъ, да не царствуетъ во Иерусалимѣ, и возложи дань на землю ту сто талантъ сребра и сто талантъ злата. |
23:34 См.: 🔗2Пар. 36:4 🔗Иер. 1:3 | И постави царемъ фараонъ нехао надъ ними Елiакима, сына Иосіи царя Иудина, вмѣсто Иосіи отца его, и премѣни имя ему Иоакимъ: Иоахаза же взя и введе во Египетъ и умре тамо. |
23:35 См.: 🔗2Пар. 36:4 | И сребро и злато даде Иоакимъ фараону, обаче написа землю даяти сребро по словеси фараоню: мужъ по оцѣненiю своему даяше сребро и злато от людій земли тоя даяти фараону нехао. |
23:36 | Сынъ бѣ двадесяти и пяти лѣтъ Иоакимъ, егда нача царствовати, и единонадесять лѣтъ царствова во Иерусалимѣ. Имя же матери его Иелдафъ, дщи фадаиля, от румы. |
23:37 См.: 🔗4Цар. 24:9 | И сотвори лукавое предъ очима Господнима, по всѣмъ елика сотвориша отцы его. |