Первая книга Маккавейская, глава 10 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 10
10:1	И въ лѣто сто шестьдесятое взыде Александръ сынъ Антiоховъ епифанъ и одержа Птолемаиду: и прiяша его, и цар­ст­вова тамо.
10:2	И слыша димитрiй царь, и собра воевъ много зѣло, и изыде противу ему на брань.
10:3	И посла димитрiй ко Ионаѳану епистолiи словесы мирными, величая его.
10:4	Рече бо: предваримъ сотворити миръ съ нимъ, прежде неже сотворитъ со Александромъ противу насъ:
10:5	воспомянетъ бо вся злая, яже сотворихомъ на него и на братiю его и на языкъ его.
10:6	И даде ему власть собирати воины и уготовляти оружiя, и быти ему другомъ его, и залогъ, иже бѣ въ краеградiи, повелѣ от­дати ему.
10:7	И прiиде Ионаѳанъ во Иерусалимъ и прочте епистолiи во услышанiе всѣмъ людемъ и иже от­ краеградiя.
10:8	И устрашишася страхомъ велiимъ, егда услышаша, яко даде ему царь власть собирати воины.
10:9	И предаша иже от­ краеградiя Ионаѳану залогъ, и от­даде ихъ родителемъ ихъ.
10:10	И обита Ионаѳанъ во Иерусалимѣ, и нача созидати и обновляти градъ,
10:11	и рече ко творящымъ дѣла созидати стѣны и гору Сiонъ окрестъ от­ каменiй четверо­уголныхъ ко утвержденiю, и сотвориша сице.
10:12	И побѣгоша иноплемен­ницы, иже бяху въ твердынехъ, яже созда вакхидъ:
10:13	и остави кійждо мѣсто свое и отъиде въ землю свою.
10:14	Обаче въ веѳсурѣ осташася нѣцыи от­ оставльшихъ законъ и заповѣди [Божiя]: бѣ бо имъ убѣжище.
10:15	И слыша Александръ царь обѣщанiя, елика посла димитрiй Ионаѳану, и повѣдаша ему брани и муже­ст­ва, яже сотвори той и братiя его, и труды, яже имѣху.
10:16	И рече: еда обрящемъ ко­его мужа такова? и нынѣ сотворимъ его въ друга и споборника на­шего.
10:17	И написа епистолiи и посла ему по словесемъ симъ, глаголя:
10:18	царь Александръ брату Ионаѳану радоватися:
10:19	слышахомъ о тебѣ, яко мужъ силенъ еси крѣпостiю и угоденъ еси быти намъ другъ:
10:20	и нынѣ поставихомъ тя днесь архiереа языка тво­его, и еже другомъ царевымъ нарицатися [и посла ему порфиру и вѣнецъ златъ], и мудр­ст­вовати таяжде съ нами и снабдѣвати дружбу къ намъ.
10:21	И облечеся Ионаѳанъ во святую ризу седмаго месяца лѣта сто шестьдесятаго, въ день праздника сѣнопотченiя, и собра силы и уготова оружiя многа.
10:22	И слыша димитрiй словеса сiя, и опечалися зѣло, и рече:
10:23	что сiе сотворихомъ, яко предвари насъ Александръ составити дружбу со иудеи во утвержденiе?
10:24	напишу и азъ имъ словеса просителная и воз­вышенiя и дары, яко да будутъ со мною въ помощь.
10:25	И написа имъ по словесемъ симъ: царь димитрiй языку Иудейскому радоватися:
10:26	понеже сохранисте завѣты къ намъ и пребывасте въ дружбѣ на­шей и не при­­ступисте ко врагомъ нашымъ, слышахомъ и радовахомся:
10:27	и нынѣ пребывайте еще сохранити къ намъ вѣру, и воз­дадимъ вамъ благая, ихже ради творите съ нами,
10:28	и оставимъ вамъ дани многи, и дадимъ вамъ дары:
10:29	и нынѣ свободныхъ творю васъ и оставляю всѣмъ Иудеомъ дани и цѣну от­ соли и от­ вѣнцевъ:
10:30 См.: 🔗1Мак. 11:34	и еже вмѣсто третины сѣмене и вмѣсто половины плода древеснаго надлежащаго ми взяти, оставляю от­ днесь и потомъ, еже не взимати от­ земли Иудины и от­ трiехъ странъ при­­лежащихъ ей, от­ самаріи и Галилеи, и от­ днешняго дне и въ вѣчное время:
10:31	и Иерусалимъ да будетъ святъ и свободенъ со предѣлы сво­ими, и десятины и дани:
10:32	оставляю и власть краеградiя еже во Иерусалимѣ, и даю архiерею, да поставитъ въ немъ мужы, ихже аще изберетъ самъ, хранити его:
10:33	и всяку душу Иудейскую, яже плѣнена есть от­ земли Иудины, во всемъ цар­ст­вѣ мо­емъ оставляю свободну туне, и вси да оставят­ся от­ даней и скотовъ сво­ихъ:
10:34	и вси праздницы и субботы и новомесячiя и дніе вчинен­нiи, и три дни прежде праздника и три дни по праздницѣ, да будутъ вси дніе свободы и оставленiя всѣмъ Иудеомъ сущымъ во цар­ст­вiи мо­емъ:
10:35	и никто имѣти будетъ власти дѣлати и стужати кому от­ нихъ о всяцѣй вещи:
10:36	и да напишут­ся от­ иудей въ воины царскiя до тридесяти тысящъ мужей, и да дадут­ся имъ оброцы, якоже подобаетъ всѣмъ воемъ царскимъ:
10:37	и да поставят­ся от­ нихъ въ твердынехъ царскихъ велiихъ, и от­ сихъ поставят­ся на потребы цар­ст­ва сущыя въ вѣрность: и сущiи надъ ними и началницы да будутъ от­ нихъ, и да ходятъ въ законѣхъ сво­ихъ, якоже повелѣ царь въ земли Иудинѣ:
10:38	и три предѣлы, при­­лежащiи Иудеи от­ страны самарійскiя, да при­­ложат­ся ко Иудеи, да вмѣнят­ся быти подъ единымъ, еже не послушати иныя власти, но токмо архiереа:
10:39	Птолемаиду и предѣлы ея дахъ въ даръ святымъ, сущымъ во Иерусалимѣ, на при­­личное иждивенiе святымъ,
10:40	и азъ дамъ на ко­еждо лѣто пять­на­де­сять тысящъ Сикль сребра от­ сокровищъ царскихъ от­ мѣстъ при­­лежащихъ:
10:41	и всякое излишнее, еже не воз­даша от­ потребъ, якоже въ первыхъ лѣтѣхъ, от­нынѣ дадутъ въ дѣла храму:
10:42	и свыше сихъ пять тысящъ сиклей сребра, ихже взимаху от­ потребъ святилища, якоже въ прежнихъ лѣтѣхъ от­ собранiя на всякое лѣто, и сiя оставляют­ся, понеже надлежатъ сiя жерцемъ служащымъ:
10:43	и елицы аще при­­бѣгнутъ къ церкви сущей во Иерусалимѣхъ и во всѣхъ предѣлѣхъ его, одолжени суще царскими и всякою вещiю, да от­рѣшают­ся, и вся елика суть имъ во цар­ст­вiи мо­емъ:
10:44	и созидати и обновляти дѣла святыхъ, и иждивенiе даст­ся от­ сокровища царскаго:
10:45	и еже созидати стѣны Иерусалима и утвердити окрестъ, и иждивенiе даст­ся от­ собранiя царска, и еже создати стѣны во Иудеи.
10:46	Егда же услыша Ионаѳанъ и людiе словеса сiя, не вѣроваша имъ, ниже прiяша, яко помянуша злобу велiю, юже сотвори во Израили, и оскорби ихъ зѣло.
10:47	И благоволиша о Александрѣ, яко сей бысть имъ началникъ словесъ мирныхъ, и споборяху ему во вся дни.
10:48	И собра царь Александръ силу велiю и ополчися противу димитрiа.
10:49	И сотвориша брань два царя, и побѣже полкъ димитрiевъ, и гна его Александръ и укрѣпися на нихъ.
10:50	И превоз­може брань зѣло, дондеже зайде солнце, и паде димитрiй въ день онъ.
10:51	И посла Александръ ко Птоломею царю Египетскому послы по словесемъ симъ, рекій:
10:52	понеже воз­вратихся въ землю цар­ст­ва мо­его, и сѣдохъ на престолѣ отецъ мо­ихъ, и одержахъ начал­ст­во, и сокрушихъ димитрiа, и воз­обладахъ страною на­шею,
10:53	и составихъ противу его рать, и сокрушися той и ополченiе его от­ насъ, и сѣдохомъ на престолѣ цар­ст­ва его:
10:54	и нынѣ составимъ между нами дружбу, и нынѣ даждь мнѣ дщерь твою въ жену, и буду зять твой, и дамъ тебѣ дары, и ей достойная тебе.
10:55	И от­вѣща царь Птоломей глаголя: благъ день, въ оньже воз­вратил­ся еси въ землю отецъ тво­ихъ и сѣлъ еси на престолѣ цар­ст­ва ихъ:
10:56	и нынѣ сотворю ти, яже писалъ еси: но срящися во Птолемаидѣ, яко да видимъ другъ друга, и будеши ми зять, якоже реклъ еси.
10:57	И изыде Птоломей от­ Египта самъ и клеопатра дщи его, и внидоша во Птолемаиду лѣта сто шестьдесятъ втораго.
10:58	И срѣте его Александръ царь: и даде ему клеопатру дщерь свою и сотвори бракъ ея во Птолемаидѣ, якоже царiе во славѣ велицѣй.
10:59	И написа Александръ царь Ионаѳану прiити во срѣтенiе ему.
10:60	И иде со славою во Птолемаиду и срѣте оба царя: и даде има сребро и злато и другомъ ихъ, и дары многи, и обрѣте благодать предъ нима.
10:61	И собрашася нань мужiе губителе от­ Израиля, мужiе беззакон­нiи клеветати нань. и не внятъ имъ царь.
10:62	И повелѣ царь совлещи Ионаѳана съ ризъ его и облещи его въ порфиру. и сотвориша тако.
10:63	И посади его царь съ собою и рече началникомъ сво­имъ: изыдите съ нимъ на среду града и проповѣдите ни единому клеветати нань ни о единѣй вещи, и ни единъ ему да стужитъ о всяцѣмъ глаголѣ.
10:64	И бысть егда увидѣша клеветницы славу его, якоже проповѣдаша, и облечена его порфирою, и бѣжаша вси.
10:65	И прослави его царь, и написа его въ первыхъ друзѣхъ, и постави его во­еводу и участ­ника начал­ст­ва.
10:66	И воз­вратися Ионаѳанъ во Иерусалимъ съ миромъ и веселiемъ.
10:67	И въ лѣто сто шестьдесятъ пятое прiиде димитрiй сынъ димитрiевъ от­ крита въ землю отецъ сво­ихъ.
10:68	И слыша Александръ царь, и опечалися зѣло, и воз­вратися во Антiохію.
10:69	И постави димитрiй аполлонiа сущаго от­ килисиріи: и собра силу велiю, и ополчися во Иамніи, и посла ко Ионаѳану архiерею, глаголя:
10:70	ты ли единъ воз­носишися на ны, азъ же быхъ въ посмѣхъ и въ поношенiе тебе ради: и чесо ради ты властел­ст­вуеши надъ нами въ горахъ?
10:71	нынѣ убо, аще надѣешися въ силахъ тво­ихъ, изыди къ намъ на поле и искусимся ту между собою, яко со мною есть сила градовъ:
10:72	вопроси и научися, кто есмь? и прочiи помогающiи намъ, и глаголютъ: нѣсть вамъ стоянiя ноги предъ лицемъ нашимъ, яко дващи въ бѣгъ обратишася отцы тво­и въ земли ихъ:
10:73	и нынѣ не воз­можеши стерпѣти кон­ника и силы таковыя въ поли, идѣже нѣсть камене, ни стѣны, ни мѣста къ бѣжанiю.
10:74	Егда же услыша Ионаѳанъ словеса аполлониева, подвижеся мыслiю, и избра десять тысящъ мужей, и изыде изъ Иерусалима, и снидеся съ нимъ Симонъ братъ его въ помощь ему.
10:75	И ополчися на Иоппію, и заступиша ему от­ града, яко стража аполлонiева въ Иоппіи бысть, и ратоваша ю.
10:76	И убояв­шеся от­верзоша иже изъ града, и облада Ионаѳанъ Иоппіею.
10:77	И слыша аполлонiй, и собра три тысящы кон­никъ и силу велiю, и иде во азотъ аки путьше­ст­вуя, и абiе изыде на поле, зане имѣяше множе­с­т­во кон­никъ и надѣяшеся на нихъ.
10:78	И гна Ионаѳанъ вслѣдъ его во азотъ, и сразишася полцы на рать.
10:79	И остави аполлонiй тысящу кон­никъ созади ихъ въ тайнѣ.
10:80	И позна Ионаѳанъ, яко есть засада созади его. и окружиша полкъ его и стрѣляху на люди от­ утра даже до вечера,
10:81	людiе же стояша, якоже заповѣда Ионаѳанъ: и утрудишася кони ихъ.
10:82	И при­­веде Симонъ силу свою и нападе на полкъ: кон­ницы бо утруждени бяху, и сокрушишася от­ него и побѣгоша,
10:83	и кон­ницы расточишася по полю и бѣгоша во азотъ, и внидоша въ Виѳдагонъ капище его, еже уцѣлѣти.
10:84	И пожже Ионаѳанъ азотъ и грады иже бѣху окрестъ его, и взя корысти ихъ и капище дагоново, и вбѣгшихъ въ не пожже огнемъ.
10:85	И бысть падшихъ мечемъ съ сожжеными яко осмь тысящъ мужей.
10:86	И отъиде от­туду Ионаѳанъ и прiиде во Аскалонъ, и изыдоша от­ града во срѣтенiе ему въ славѣ велицѣй.
10:87	И воз­вратися Ионаѳанъ во Иерусалимъ съ сущими съ нимъ, имуще корысти многи.
10:88	И бысть егда услыша Александръ царь словеса сiя, и при­­ложи прославити Ионаѳана:
10:89	и посла ему гривну златую якоже обычай есть даяти сродникомъ царевымъ, и даде ему аккаронъ и вся предѣлы его во одержанiе.