Книга пророка Иезекииля, глава 33

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 33
33:1	И бысть слово Господне ко мнѣ глаголя:
33:2 См.: 🔗4Цар. 9:17	сыне человѣчь, глаголи ко сыномъ людій тво­ихъ и речеши къ нимъ: земля, на нюже азъ аще наведу мечь, и поймутъ людiе земли человѣка единаго от­ себе и поставятъ его себѣ во стража,
33:3	и узритъ мечь грядущь на землю, и вострубитъ трубою, и проповѣсть людемъ,
33:4	и услышитъ услышавый гласъ трубы, а не сохранит­ся, и найдетъ мечь и постигнетъ его, кровь его на главѣ его будетъ:
33:5	яко слыша гласъ трубы и не сохранися, кровь его на немъ будетъ: а сей, понеже сохранися, душу свою избавилъ.
33:6	И стражъ, аще увидитъ мечь грядущь, и не вострубитъ трубою, [и не проповѣсть людемъ,] и людiе не охранятъ себе, и нашедъ мечь возметъ от­ нихъ душу, та убо беззаконiя ради сво­его взяся, а крове ея от­ руки стража взыщу.
33:7 См.: 🔗Ис. 58:1 🔗Иез. 3:17	И ты, сыне человѣчь, во стража дахъ тя дому Израилеву, и услышиши от­ устъ мо­ихъ слово, и проповѣси имъ от­ мене.
33:8 См.: 🔗Иез. 24:8 🔗Деян. 18:6	Егда реку грѣшнику: грѣшниче, смертiю умреши: и не будеши глаголати [грѣшнику], еже сохранитися нечестивому, [еже обратит­ся ему] от­ пути сво­его [и живу быти ему], той беззакон­никъ во беззаконiи сво­емъ умретъ, а крове его от­ руки тво­ея взыщу.
33:9	Аще же ты проповѣси нечестивому путь его, еже обратитися от­ него, и не обратит­ся съ пути сво­его, той въ нечестiи сво­емъ умретъ, а ты душу твою избавилъ еси.
33:10 См.: 🔗Пс. 37:5 🔗Пс. 89:8	И ты, сыне человѣчь, рцы дому Израилеву: сице рѣсте глаголюще: прелести нашя и беззаконiя наша въ насъ суть, и мы въ нихъ таемъ, и како намъ живымъ быти?
33:11 См.: 🔗2Цар. 14:14 🔗Иез. 18:23 🔗Аг. 1:5	Рцы имъ: живу азъ, глаголетъ Адонаи Господь, не хощу смерти грѣшника, но еже обратитися нечестивому от­ пути сво­его и живу быти ему: обращенiемъ обратитеся от­ пути ва­шего злаго: и вскую умираете, доме Израилевъ?
33:12 См.: 🔗Иез. 18:24	И ты, сыне человѣчь, рцы ко сыномъ людій тво­ихъ: правда праведника не избавитъ его, въ оньже день прельстит­ся: и беззаконiе беззакон­ника не убiетъ, въ оньже день обратит­ся от­ беззаконiя сво­его: и праведникъ не можетъ спастися въ день грѣха сво­его.
33:13 См.: 🔗1Кор. 10:12	Егда реку праведнику: жизнiю живъ будеши: сей же уповая на правду свою и сотворитъ беззаконiе, вся правды его не воспомянут­ся, въ неправдѣ сво­ей, юже сотвори, въ той умретъ.
33:14	И егда реку нечестивому: смертiю умреши: и обратит­ся от­ грѣха сво­его и сотворитъ судъ и правду,
33:15 См.: 🔗Исх. 22:26 🔗Втор. 24:13	и залогъ от­дастъ и восхищеное воз­вратитъ, беззакон­никъ въ заповѣдехъ жизни ходити будетъ, еже не сотворити неправды, жизнiю живъ будетъ и не умретъ:
33:16 См.: 🔗Ис. 43:25 🔗Иер. 31:34	вси грѣси его, яже согрѣши, не помянут­ся: понеже судъ и правду сотвори, живъ будетъ въ нихъ.
33:17 См.: 🔗Иез. 18:25	И рекутъ сынове людій тво­ихъ: неправъ путь Господень. И се, путь ихъ неправъ.
33:18	Егда совратит­ся праведникъ от­ правды сво­ея и сотворитъ беззаконiе, и умретъ въ немъ.
33:19	И егда грѣшникъ воз­вратит­ся от­ беззаконiя сво­его и сотворитъ судъ и правду, той живъ будетъ въ нихъ.
33:20 См.: 🔗Пс. 61:13 🔗Прит. 24:12 🔗Иер. 39:19 🔗Иез. 18:30 🔗Мф. 16:27 🔗Рим. 2:6	И се есть, еже рекосте: неправъ путь Господень. Комуждо по путемъ его сужду вамъ, доме Израилевъ.
33:21 См.: 🔗4Цар. 25:4	И бысть во второ­е­на­де­сять лѣто, месяца втораго­на­де­сять, въ пятый день месяца плѣненiя на­шего, прiиде ко мнѣ от­ Иерусалима уцѣлѣвый глаголя: плѣненъ бысть градъ.
33:22 См.: 🔗Иез. 24:27	И рука Господня бысть на мнѣ въ вечеръ, прежде при­­ше­ст­вiя его, и от­верзе уста моя, дондеже прiиде ко мнѣ заутра: и от­верзшаяся уста моя не затворишася ктому.
33:23	И бысть слово Господне ко мнѣ глаголя:
33:24 См.: 🔗Рим. 4:13 🔗Ис. 51:2	сыне человѣчь, живущiи на опустѣв­шихъ мѣстѣхъ во земли Израилевѣ глаголютъ: единъ бяше Авраамъ и одержа­ше землю, а мы множайшiи есмы, намъ дана есть земля во одержанiе.
33:25 См.: 🔗Втор. 12:23	Того ради рцы имъ: сице глаголетъ Адонаи Господь: понеже съ кровiю ясте и очи ваши воз­двигосте ко кумiромъ и кровь проливаете, и землю ли наслѣдите?
33:26 См.: 🔗Иез. 22:11	стасте съ мечемъ вашимъ, сотвористе мерзости, и кійждо жену ближняго сво­его осквернисте, и тако ли землю имате наслѣдити?
33:27 См.: 🔗Ам. 9:3	Того ради рцы имъ: сiя глаголетъ Адонаи Господь: живу азъ, яко падутъ мечемъ сущiи во опустѣв­шихъ, и иже на лицы поля, звѣремъ польнымъ предадут­ся на изъяденiе, и сущыя во градѣхъ и иже въ пещерахъ смертiю поражу,
33:28	и дамъ землю на опустѣнiе, и погибнетъ гордость крѣпости ея, и опустѣютъ горы Израилевы, занеже не будетъ проходящаго:
33:29 См.: 🔗Иез. 26:6 🔗Иез. 28:24	и увѣдятъ, яко азъ Господь: и сотворю землю ихъ пусту, и опустѣетъ всѣхъ ради мерзостей ихъ, яже сотвориша.
33:30	И ты, сыне человѣчь, сынове людій тво­ихъ глаголющiи о тебѣ у забралъ и во вратѣхъ дворовъ, и глаголютъ кійждо ко ближнему сво­ему и кійждо ко брату сво­ему, глаголюще: соберимся и услышимъ исходящая от­ устъ Господнихъ.
33:31 См.: 🔗Ис. 42:20 🔗Ис. 53:1	И при­­ходятъ къ тебѣ, якоже сходят­ся людiе, и сѣдятъ людiе мо­и предъ тобою, и послушаютъ глаголовъ тво­ихъ, и не сотворятъ ихъ: понеже лжа во устѣхъ ихъ, и вслѣдъ сквернъ ихъ сердце ихъ ходитъ.
33:32	И будеши имъ яко гласъ пѣснивца сладкогласнаго благосличнаго, и услышатъ глаголы твоя, и не сотворятъ ихъ.
33:33	И егда прiидеши, рекутъ: се, прiиде. И увѣдятъ, яко пророкъ бѣ средѣ ихъ.