|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 1 | |
| 1:1 | Возлюбите правду, судящiи землю: мудрствуйте о Господѣ въ благостыни и въ простотѣ сердца взыщите его: |
| 1:2 | яко обрѣтается не искушающымъ его, является же не невѣрующымъ ему. |
| 1:3 | Строптивая бо помышленiя отлучаютъ от Бога: искушаемая сила обличаетъ безумныхъ. |
| 1:4 | Яко въ злохудожну душу не внидетъ премудрость, ниже обитаетъ въ тѣлеси повиннѣмъ грѣху: |
| 1:5 | святый бо Духъ наказанiя отбѣжитъ льстива и отъимется от помышленiй неразумныхъ и обличится от находящiя неправды. |
| 1:6 | Человѣколюбивъ бо духъ премудрости и не обезвинитъ хульника от устенъ его: яко внутреннихъ его свидѣтель есть Богъ и сердца его испытатель истиненъ и языка слышатель: |
| 1:7 | яко Духъ Господень исполни вселенную, и содержай вся разумъ имать гласа. |
| 1:8 | Сего ради вѣщаяй неправедная никтоже утаится, и не мимо идетъ его обличающь судъ. |
| 1:9 | Въ совѣтѣхъ бо нечестиваго истязанiе будетъ, словесъ же его слышанiе ко Господу прiидетъ во обличенiе беззаконiй его: |
| 1:10 | яко ухо рвенiя слышитъ вся, и молва роптанiй не крыется. |
| 1:11 | Хранитеся убо от роптанiя неполезна и от оболганiя щадите языкъ: яко вѣщанiе тайное тще не прейдетъ, уста же лжущая убиваютъ душу. |
| 1:12 | Не вожделѣйте смерти въ заблужденiи живота вашего, ниже привлекайте погибели дѣлами рукъ вашихъ: |
| 1:13 | яко Богъ смерти не сотвори, ни веселится о погибели живыхъ. |
| 1:14 | Созда бо во еже быти всѣмъ, и спасителны бытiя мiра, ни бо есть въ нихъ врачеванiя губителнаго, ниже аду царствiя на земли. |
| 1:15 | Правда бо безсмертна есть: [неправда же смерти снабдѣнiе:] |
| 1:16 | нечестивiи же рукама и словесы призваша ю, другиню вмѣниша ю и истаяша, и завѣтъ положиша съ нею, яко достойни суть оноя части быти. |
