Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 16 | |
16:1 См.: 🔗Прем. 12:26 🔗Исх. 8:24 | Сего ради от подобныхъ пострадаша достойнѣ, и множествомъ звѣрей казнени быша. |
16:2 См.: 🔗Исх. 16:13 🔗Чис. 11:31 | Вмѣсто мученiя благо сотворилъ еси людемъ твоимъ, въ похотѣнiе желанiя странное вкушенiе, пищу уготовалъ еси крастели, |
16:3 | да они убо вожделѣвшiи пищи, показанiемъ посланыхъ, и от нужнаго хотѣнiя отвратятся, сіи же вмалѣ скудни бывше, и странна приобщатся вкушенiя. |
16:4 | Подобаше бо на оныхъ убо неизбѣжнѣй нищетѣ наити мучителствующихъ, симъ же токмо показати, како врази ихъ мучишася. |
16:5 См.: 🔗Чис. 21:6 🔗1Кор. 10:9 | Ибо егда тѣмъ найде жестокъ звѣрей гнѣвъ, и угрызеньми сверѣпыхъ истребляхуся змиевъ, |
16:6 См.: 🔗Ин. 3:14 | но не до конца пребысть гнѣвъ твой: въ наказанiе же вмалѣ смущени быша, знаменiе имѣюще спасенiя, на воспоминанiе заповѣди закона твоего: |
16:7 См.: 🔗Чис. 21:9 | обративыйся бо не [вещiю] зримою цѣляшеся, но тобою всѣхъ спасителемъ. |
16:8 См.: 🔗Пс. 3:9 🔗2Тим. 4:8 | И въ семъ же показалъ еси врагомъ нашымъ, яко ты еси избавляяй от всякаго зла: |
16:9 | тѣхъ бо акриды и мухи побиша угрызенiемъ, и не обрѣтеся цѣльба душамъ ихъ, яко достойни бяху от таковыхъ мучитися. |
16:10 | Сыновъ же твоихъ ниже ядовитыхъ змиевъ зубы одолѣша: милость бо твоя прихождаше и изцѣляше ихъ. |
16:11 | Въ память бо словесъ твоихъ бяху усѣчени и скоро изцѣляхуся, да не во глубину впадше забвенiя отлучатся твоего благодѣянiя: |
16:12 См.: 🔗Пс. 106:20 | ниже бо зелiе, ниже обязанiе изцѣли ихъ, но слово твое, Господи, изцѣляющее вся. |
16:13 | Ты бо живота и смерти власть имаши, и низводиши даже до вратъ ада, и возводиши. |
16:14 См.: 🔗Иов. 14:10 | Человѣкъ же убиваетъ убо злобою своею: изшедшаго же духа не возвратитъ, ниже паки призываетъ душу взятую. |
16:15 См.: 🔗Рим. 2:3 | Твоея же руки избѣжати невозможно есть: |
16:16 | отметающiися бо тебе вѣдѣти нечестивiи, въ крѣпости мышцы твоея бiени быша странными дождьми и градами, и бурями гоними неизбѣжно, и огнемъ растаеваеми. |
16:17 См.: 🔗Прем. 19:19 | Преславное бо, въ водѣ вся угашающей множае дѣйствоваше огнь: споборникъ бо есть мiръ о праведныхъ. |
16:18 | Овогда бо убо укрощашеся пламень, да не сожжетъ посланныхъ животныхъ на нечестивыя: но сіи зряще да вѣдятъ, яко от Божiя суда страждутъ гоненiе. |
16:19 | Овогда же и между водою выше силы огненныя паляше, да беззаконныя земли порожденiя растлитъ. |
16:20 | Вмѣсто же сихъ ангелскою пищею питалъ еси люди твоя, и уготованъ хлѣбъ съ небесе послалъ еси имъ безъ труда, всякое услажденiе въ себѣ имѣющь и ко всякому сличный вкушенiю. |
16:21 См.: 🔗1Пет. 2:3 | Существо бо твое сладость твою ко сыномъ показоваше, и угождая единаго коегождо воли, якоже кто хотяше, превращашеся. |
16:22 См.: 🔗Исх. 9:23 | Снѣгъ же и ледъ терпяху огнь и не растаяваху: да увѣдятъ, яко плоды враговъ истребляше огнь горящь во градѣ и въ дождехъ блистающь: |
16:23 | тойже паки, да питаются праведнiи, [огнь] и свою забы силу. |
16:24 | Творенiе бо, тебѣ творцу всѣхъ служащее, распростирается на муку противу неправедныхъ и легчае творится во благодѣянiе ради на тя надѣющихя. |
16:25 | Сего ради и тогда во вся преобразуемое всѣхъ кормителницѣ благодати твоей служаше къ воли требующихъ: |
16:26 | да научатся сынове твои, ихже возлюбилъ еси, Господи, яко не рожденiя плодовъ питаютъ человѣка, но слово твое тебѣ вѣрующихъ соблюдаетъ. |
16:27 | Еже бо огнемъ нерастлѣно скоро от малыя лучи солнечныя грѣемое растаявашеся: |
16:28 | да знаемо будетъ [всѣмъ], яко подобаетъ предварити солнце на благодаренiе тебѣ и къ востоку свѣта тебѣ поклонитися. |
16:29 См.: 🔗Прем. 5:14 | Неблагодарнаго бо упованiе яко зимный иней растаетъ, и излiется яко вода неключима. |