Псалтирь, псалом 117

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Псалом 117
117:1	Аллилуiа.
117:2 См.: 🔗Пс. 135:1	Исповѣдайтеся Господеви, яко благъ, яко въ вѣкъ милость Его.
117:3	Да речетъ убо домъ Израилевъ: яко благъ, яко въ вѣкъ милость Его.
117:4	Да речетъ убо домъ Ааронь: яко благъ, яко въ вѣкъ милость Его.
117:5	Да рекутъ убо вси боящiися Господа: яко благъ, яко въ вѣкъ милость Его.
117:6 См.: 🔗Ис. 26:16	От скорби при­­звахъ Господа, и услыша мя въ простран­ство.
117:7 См.: 🔗Пс. 26:1 🔗Пс. 55:12 🔗Рим. 8:31	Господь мнѣ помощникъ, и не убоюся: что сотворитъ мнѣ человѣкъ?
117:8 См.: 🔗Евр. 13:6	Господь мнѣ помощникъ, и азъ воз­зрю на враги моя.
117:9 См.: 🔗Пс. 61:9 🔗Пс. 83:13 🔗Пс. 107:13	Благо есть надѣятися на Господа, нежели надѣятися на человѣка:
117:10	благо есть уповати на Господа, нежели уповати на князи.
117:11	Вси языцы обыдоша мя, и именемъ Господнимъ противляхся имъ:
117:12 См.: 🔗1Цар. 17:45	обышедше обыдоша мя, и именемъ Господнимъ противляхся имъ:
117:13 См.: 🔗Втор. 1:44 🔗Ис. 7:18	обыдоша мя яко пчелы сотъ, и разгорѣшася яко огнь въ тернiи: и именемъ Господнимъ противляхся имъ.
117:14	Отриновенъ превратихся пасти, и Господь прiятъ мя.
117:15 См.: 🔗Исх. 15:2 🔗Ис. 12:2	Крѣпость моя и пѣнiе мое Господь, и бысть ми во спасенiе.
117:16	Гласъ радости и спасенiя въ селенiихъ праведныхъ: десница Господня сотвори силу.
117:17	Десница Господня воз­несе мя, десница Господня сотвори силу.
117:18 См.: 🔗Ис. 53:11 🔗Рим. 6:9	Не умру, но живъ буду и повѣмъ дѣла Господня.
117:19 См.: 🔗Иез. 18:21	Наказуя наказа мя Господь, смерти же не предаде мя.
117:20 См.: 🔗Ис. 26:2 🔗Евр. 9:24	Отверзите мнѣ врата правды: в­шедъ въ ня, исповѣмся Господеви.
117:21	Сiя врата Господня: праведнiи внидутъ въ ня.
117:22	Исповѣмся Тебѣ, яко услышалъ мя еси и былъ еси мнѣ во спасенiе.
117:23 См.: 🔗Ис. 28:16 🔗Мф. 21:42 🔗Мк. 12:10	Камень, егоже небрегоша зиждущiи, сей бысть во главу угла:
117:24	от­ Господа бысть сей, и есть дивенъ во очесѣхъ нашихъ.
117:25	Сей день, егоже сотвори Господь, воз­радуемся и воз­веселимся въ онь.
117:26	О, Господи, спаси же, о, Господи, поспѣши же.
117:27 См.: 🔗Мф. 21:9 🔗Мк. 11:9 🔗Лк. 19:38	Благословенъ грядый во имя Господне: благословихомъ вы изъ дому Господня.
117:28	Богъ Господь, и явися намъ: составите праздникъ во учащающихъ до рогъ олтаревыхъ.
117:29	Богъ мой еси Ты, и исповѣмся Тебѣ: Богъ мой еси Ты, и воз­несу Тя: исповѣмся Тебѣ, яко услышалъ мя еси и былъ еси мнѣ во спасенiе.
117:30 См.: 🔗Пс. 135:1	Исповѣдайтеся Господеви, яко благъ, яко въ вѣкъ милость Его.