Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
5:1 | По сихъ же избрани суть изыти началницы домовъ отечествъ по племеномъ ихъ, и жены ихъ, и сынове ихъ, и дщери ихъ, и раби ихъ, и рабыни ихъ, и скоти ихъ: |
5:2 | и дарiй царь посла съ ними конники тысящу, дондеже возведутъ ихъ во Иерусалимъ съ миромъ и съ мусикіею, съ тимпаны и трубами: |
5:3 | и вся братiя ихъ бяху играюще, и сотвори ихъ взыти вкупѣ съ ними. |
5:4 | И сiя суть имена мужей, иже взыдоша по отечествомъ своимъ и по колѣномъ въ части началствъ своихъ: |
5:5 | священницы сынове Финееса, сына Аароня, иисусъ сынъ Иоседека сареова и Иоакимъ сынъ зоровавеля сына Салаѳiилева, от дому давидова, от рода Фаресова, колѣна же Иудина, |
5:6 | иже глаголаше при дарiи цари персстѣмъ словеса премудра, во второе лѣто царства его, месяца нисана, перваго месяца. |
5:7 | Суть же сіи от Иудеи изшедшiи от плѣна преселенiя, ихже пресели навуходоносоръ царь Вавилонскiй въ Вавилонъ, |
5:8 См.: 🔗Неем. 7:6 | и возвратишася во Иерусалимъ и во прочую Иудею, кійждо во свой градъ, иже прiидоша съ зоровавелемъ и иисусомъ, нееміею, захарiею, рисеемъ, ениніемъ, мардохеемъ, веелсаромъ, со Асфарасомъ, съ рееліемъ, съ роимомъ съ Вааномъ, началники ихъ. |
5:9 | Число сущихъ от языка и началницы ихъ: сынове форосовы двѣ тысящы и сто седмьдесятъ два, сынове Сафатовы четыреста седмьдесятъ два, |
5:10 | сынове Аресовы седмь сотъ пятьдесятъ шесть, |
5:11 | сынове фааѳъ-моавли двѣ тысящы осмь сотъ и дванадесять, |
5:12 | сынове Иламовы тысяща двѣсти пятьдесятъ четыре, сынове заѳуины девять сотъ четыредесять пять, сынове корвеовы седмь сотъ пять, сынове ваніины шесть сотъ четыредесять осмь, |
5:13 | сынове виваины шесть сотъ двадесять три, сынове садасовы три тысящы двѣсти двадесять два, |
5:14 | сынове Адоникамовы шесть сотъ шестьдесятъ седмь, сынове вагоины двѣ тысящы шестьдесятъ шесть, сынове Адинуевы четыре ста пятьдесятъ четыре, |
5:15 | сынове атирезекиевы девятьдесятъ два, сынове килановы и азитасовы шестьдесятъ седмь, сынове азурановы четыре ста тридесять два, |
5:16 | сынове Ананиевы сто единъ, сынове Аромовы тридесять два, сынове Вассаевы триста двадесять три, сынове Арсифуриѳовы сто два, |
5:17 | сынове метировы три тысящи пять, сынове от веѳломоновъ сто двадесять три, |
5:18 | иже от нетофаи пятьдесятъ пять, иже от Анаѳоѳа сто пятьдесятъ осмь, иже от веѳсамоса четыредесять два, |
5:19 | иже от карiаѳiарима двадесять пять, иже изъ кафиры и вироѳа седмь сотъ четыредесять три, иже изъ пиры седмь сотъ, |
5:20 | иже хадiасовы и амидиевы четыре ста двадесять два, иже от кирама и гаввиса шесть сотъ двадесять единъ, |
5:21 | иже от макалона сто двадесять два, иже от витолiа пятьдесятъ два, сынове нифисовы сто пятьдесятъ шесть, |
5:22 | сынове каламолалуевы и онусовы седмь сотъ двадесять пять, сынове иереховы триста четыредесять пять, |
5:23 | сынове Анаасовы три тысящы триста тридесять. |
5:24 | Жерцы: сынове Иеддуа, сына иисуева, съ сыны санасивовыми девять сотъ седмьдесятъ два, сынове от мируѳа тысяща пятьдесятъ два, |
5:25 | сынове фасарони тысяща четыредесять седмь, сынове Хармиевы тысяща седмьнадесять. |
5:26 | Левити же: сынове Иесуевы и кадмiиловы, и ваннуевы и судиевы, седмьдесятъ четыре. |
5:27 | Священнопѣвцы: сынове Асафовы сто четыредесять осмь. |
5:28 | Дверницы же: сынове Салумовы, сынове аттаровы, сынове толмановы, сынове дакувиевы, сынове титаевы, сынове самиевы, всѣхъ сто тридесять девять. |
5:29 | Священнослужителiе: сынове Исавовы, сынове Асифаевы, сынове таваоѳовы, сынове кирасовы, сынове судовы, сынове Фалеевы, сынове Лаванаевы, сынове аграваевы, |
5:30 | сынове акуаевы, сынове утаевы, сынове китавовы, сынове агаваевы, сынове сиваиевы, сынове Анани, сынове каѳуаевы, сынове геддуровы, |
5:31 | сынове Иаировы, сынове десановы, сынове ноиваевы, сынове хасеваевы, сынове газираевы, сынове Озіевы, сынове Финоевы, сынове Асараевы, сынове Васѳаиевы, сынове Асанаевы, сынове меаниевы, сынове Нафисиевы, сынове акувовы, сынове акифаевы, сынове Асуровы, сынове фаракимовы, сынове Васалоѳовы, |
5:32 | сынове меедаевы, сынове куѳаевы, сынове Хареевы, сынове Харкусовы, сынове Асирари, сынове Ѳомиевы, сынове насиѳовы, сынове атифаевы. |
5:33 | сынове отрокъ соломоновыхъ: сынове Асапфiоновы, сынове фарираевы, сынове Иеилевы, сынове лозони, сынове издаилевы, сынове Сафиѳовы, |
5:34 | сынове агiаевы, сынове фахареѳовы, сынове Савiины, сынове сароѳиевы, сынове Масiасовы, сынове гаровы, сынове Аддусовы, сынове сувасовы, сынове Афераевы, сынове Варадисовы, сынове Сафатовы, сынове Алломовы. |
5:35 | Всѣхъ священнослужителей и сыновъ отрокъ соломоновыхъ триста седмьдесятъ два. |
5:36 | Сіи возшедшiи от Ѳермелеѳа и Ѳелерсаса, вождь ихъ Харааѳаларь и Ааларь, |
5:37 | и не могоша возвѣстити отечествъ своихъ и родовъ, яко от Израиля ли суть: сынове ладана сына ванова, сынове некодановы, шесть сотъ пятьдесятъ два: |
5:38 | и от жерцевъ творящiи жречество, и не обрѣтошася: сынове Авдіины, сынове аккосовы, сынове Аддуса, поемшаго авгію жену от дщерей верзеллеевыхъ, и прозванъ бысть во имя его: |
5:39 | и сихъ взыскану бывшу родословному писанiю и не обрѣтену, отлучени суть от священства. |
5:40 См.: 🔗Неем. 7:65 | И рече имъ нееміа и атѳаріа, да не причащаются святынь, дондеже востанетъ архiерей облеченъ во изъявленiе и истину. |
5:41 | Вси же бяху от Израиля, от двунадесяти лѣтъ и выше, кромѣ рабовъ и рабынь, четыредесять двѣ тысящы триста шестьдесятъ: раби сихъ и рабыни седмь тысящъ триста четыредесять седмь, пѣвцы и пѣвицы двѣсти четыредесять пять: |
5:42 | велблюдъ четыре ста тридесять пять, коней седмь тысящъ тридесять шесть, мсковъ двѣсти четыредесять пять, подъяремникъ пять тысящъ пять сотъ двадесять пять. |
5:43 | И от настоятелей по отечествомъ, егда прiидоша во храмъ Божiй, иже во Иерусалимѣ, обѣщаша воздвигнути храмъ на мѣстѣ его по силѣ своей |
5:44 | и даяти во святое сокровище на дѣла злата мнасъ тысящу и сребра мнасъ пять тысящъ и ризъ священническихъ сто. |
5:45 | И вселишася священницы и левити, и иже [изыдоша] от народа во Иерусалимъ и во страну, и священнопѣвцы, и дверницы, и весь Израиль въ селѣхъ своихъ. |
5:46 | Настоящу же седмому месяцу и сущымъ сыномъ Израилевымъ коемуждо во своихъ, собрашася единодушно во дворъ первыхъ вратъ восточныхъ. |
5:47 См.: 🔗1Езд. 3:2 | И воставъ иисусъ сынъ Иоседековъ и братiя его священницы и зоровавель сынъ Салаѳiилевъ и братiя его, уготоваша олтарь Богу Израилеву, |
5:48 | да возносятъ на немъ всесожженiя по чину, якоже въ книзѣ Моисеа человѣка Божiя писана суть, |
5:49 | И собрашася къ нимъ от иныхъ народовъ земли, и воздвигнуша жертвенникъ на мѣстѣ своемъ, яко во враждѣ бяху съ ними, и премогоша ихъ вси языцы земстiи: и приношаху жертвы по времени и всесожженiя Господеви, утреннее и вечернее. |
5:50 | И сотвориша кущей потченiя праздникъ, якоже повелѣно въ законѣ, и жертвы на всякъ день, якоже подобаше, |
5:51 | и по сихъ приношенiя непрестанная, и жертвы субботнiя и новомесячныя и праздниковъ всѣхъ освященныхъ. |
5:52 | И елицы обѣщаша обѣтъ Богу от новомесячiя седмаго месяца, начаша приносити жертвы Богу, храмъ же Господень не бысть еще созданъ. |
5:53 | И даша сребро каменосѣчцемъ и дѣлателемъ пищу и питiе съ радостiю, и даша карры Сидоняномъ и тиряномъ, да привозятъ имъ от Ливана древа кедрова, да приведутъ судна во Иоппійское пристанище, по повелѣнiю, еже писано бысть имъ от кира царя персскаго. |
5:54 См.: 🔗1Езд. 3:8 | И во второе лѣто пришедъ во храмъ Божiи во Иерусалимъ, месяца втораго, нача зоровавель сынъ Салаѳiилевъ и иисусъ сынъ Иоседековъ и братiя ихъ, и священницы, левити и вси, иже прiидоша от плѣненiя во Иерусалимъ, |
5:55 | и основаша храмъ Божiй въ новомесячiи втораго месяца втораго лѣта, егда прiидоша во Иудею и во Иерусалимъ, |
5:56 | и поставиша левиты от двадесяти лѣтъ на дѣла Господня: и ста иисусъ и сынове его и братiя и кадмiилъ братъ, и сынове Мадiавуни, и сынове Иодаа илiадуева съ сынми и братiями, вси левити единодушно дѣла призирателiе, творяще дѣла въ дому Господни, и создаша дѣлателiе домъ Господень. |
5:57 | И сташа священницы облечени въ ризы съ мусикіею и трубами, и левити сынове Асафовы имѣюще кимвалы, восхваляюще Господа и благословяще, по давиду царю Израилеву, |
5:58 | и пояху пѣсньми благословяще Господа, яко благость его и слава во вѣки во всемъ Израили. |
5:59 | И вси людiе вострубиша и возгласиша гласомъ великимъ, восхваляюще Господа о воздвиженiи дому Господня. |
5:60 | И прiидоша от священниковъ, левитовъ и предстоятелей по отечествомъ своимъ старѣйшины, иже видѣша прежнiй домъ, къ сему созиданiю съ плачемъ и воплемъ великимъ, |
5:61 | и мнози со трубами и радостiю гласа велiя, |
5:62 | яко людемъ не слышати трубъ плача ради людскаго, народъ бо бысть трубящь зѣло, яко далече слышатися. |
5:63 | И услышавше врази колѣна Иудина и Венiаминова, прiидоша познати, кій гласъ трубный? |
5:64 См.: 🔗1Езд. 4:1 | И познаша, яко сущiи от плѣненiя созидаютъ храмъ Господу Богу Израилеву. |
5:65 | И приступльше къ зоровавелю и иисусу и къ началникомъ отечествъ, рекоша имъ: да созидаемъ вкупѣ съ вами: |
5:66 | тако бо, якоже вы, слушаемъ Господа вашего и ему жремъ от дній Асвасареѳа царя Ассирійскаго, иже пресели насъ здѣ. |
5:67 | И рече имъ зоровавель и иисусъ и началницы отечествъ Израилевыхъ: нѣсть вамъ и намъ созидати домъ Господу Богу нашему: |
5:68 | мы бо сами созиждемъ Господу Богу Израилеву по чину, якоже повелѣ намъ киръ царь персскiй. |
5:69 | Языцы же земстiи стужающе сущымъ во Иудеи и пакости творяще, не попущаху созидати, |
5:70 | и козни и людій наводяще и крамолы творяще возбраниша совершити дѣло созиданiя во все время жизни кира царя, и препятiе сотвориша созиданiю лѣта два, даже до дарiева царства. |