Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
5:1 См.: 🔗Лк. 6:24 🔗1Тим. 6:9 | Прiидите нынѣ, богатiи, плачитеся и рыдайте о лютыхъ скорбехъ вашихъ грядущихъ на вы. |
5:2 | Богатство ваше изгни, и ризы вашя молiе поядоша. |
5:3 См.: 🔗Мф. 6:19 | Злато ваше и сребро изоржавѣ, и ржа ихъ въ послушество на васъ будетъ, и снѣсть плоти вашя аки огнь: егоже снискасте въ послѣднiя дни. |
5:4 См.: 🔗Втор. 24:14 | Се, мзда дѣлателей дѣлавшихъ нивы вашя, удержаная от васъ, вопiетъ, и вопиенiя жавшихъ во ушы Господа Саваоѳа внидоша. |
5:5 См.: 🔗Иов. 21:13 🔗Лк. 6:25 | Возвеселистеся на земли, и насладистеся: упитасте сердца ваша аки въ день заколенiя. |
5:6 | Осудисте, убисте Праведнаго: не противится вамъ. |
5:7 | Долготерпите убо, братiе моя, до пришествiя Господня. Се земледѣлецъ ждетъ честнаго плода от земли, долготерпя о немъ, дондеже прiиметъ дождь ранъ и позденъ: |
5:8 См.: 🔗Лк. 21:9 🔗Евр. 10:36 | долготерпите убо и вы, утвердите сердца ваша, яко пришествiе Господне приближися. |
5:9 | Не воздыхайте другъ на друга, братiе, да не осуждени будете: се, Судiя предъ дверьми стоитъ. |
5:10 См.: 🔗Мф. 5:12 | [Зач. 57А.] Образъ прiимите, братiе моя, злостраданiя и долготерпѣнiя пророки, иже глаголаша именемъ Господнимъ. |
5:11 См.: 🔗Иов. 1:21 | Се, блажимъ терпящыя. Терпѣнiе Иовле слышасте, и кончину Господню видѣсте, яко многомилостивъ есть Господь и щедръ. |
5:12 См.: 🔗Мф. 5:34 | Прежде же всѣхъ, братiе моя, не кленитеся ни небомъ, ни землею, ни иною коею клятвою: буди же вамъ еже ей, ей, и еже ни, ни: да не въ лицемѣрiе впадете. |
5:13 | Злостраждетъ ли кто въ васъ? Да молитву дѣетъ: благодушствуетъ ли кто? Да поетъ. |
5:14 См.: 🔗Мк. 6:13 | Болитъ ли кто въ васъ, да призоветъ пресвитеры Церковныя, и да молитву сотворятъ надъ нимъ, помазавше его елеемъ во имя Господне: |
5:15 См.: 🔗Мф. 9:2 | и молитва вѣры спасетъ болящаго, и воздвигнетъ его Господь: и аще грѣхи сотворилъ есть, отпустятся ему. |
5:16 См.: 🔗Пс. 144:19 | Исповѣдайте убо другъ другу согрѣшенiя и молитеся другъ за друга, яко да исцѣлѣете: много бо можетъ молитва праведнаго поспѣшествуема. |
5:17 См.: 🔗3Цар. 17:1 🔗Лк. 4:25 | Илiа человѣкъ бѣ подобострастенъ намъ, и молитвою помолися, да не будетъ дождь, и не одожди по земли лѣта три и месяцъ шесть: |
5:18 См.: 🔗3Цар. 18:42 | и паки помолися, и небо дождь даде, и земля прозябе плодъ свой. |
5:19 | Братiе, аще кто въ васъ заблудитъ от пути истины, и обратитъ кто его, |
5:20 | да вѣсть, яко обративый грѣшника от заблужденiя пути его спасетъ душу от смерти и покрыетъ множество грѣховъ. Конецъ Иаковлю соборному посланiю: имать въ себѣ главъ 5, зачалъ же церковныхъ 8. |