Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 45 | |
45:1 См.: 🔗2Пар. 36:23 🔗Ис. 44:28 | Сице глаголетъ Господь Богъ помазанному моему киру, егоже удержахъ за десницу, повинути предъ нимъ языки, и крѣпость царей разрушу, отверзу предъ нимъ врата, и гради не затворятся: |
45:2 | азъ предъ тобою пойду и горы уравню, врата мѣдяная сокрушу и вереи желѣзныя сломлю, |
45:3 | и дамъ ти сокровища темная сокровенная: невидимая отверзу тебѣ, да увѣси, яко азъ Господь Богъ твой прозывая имя твое, Богъ Израилевъ. |
45:4 | Ради раба моего Иакова и Израиля избраннаго моего, азъ прозову тя именемъ твоимъ и прiиму тя: |
45:5 См.: 🔗Ис. 44:8 | ты же не позналъ еси мене, яко азъ Господь Богъ, и нѣсть развѣ мене еще Бога: укрѣпихъ тя, и не позналъ еси мене, |
45:6 | да быша увѣдѣли, иже от востокъ солнечныхъ и иже от западъ, яко нѣсть Богъ развѣ мене: азъ Господь Богъ, и нѣсть еще. |
45:7 | Азъ устроивый свѣтъ и сотворивый тму, творяй миръ и зиждяй злая, азъ Господь Богъ, творяй сiя вся. |
45:8 См.: 🔗Ис. 61:11 🔗Ос. 10:12 | Да возрадуется небо свыше, и облацы да кропятъ правду: да прозябнетъ земля, и да прораститъ милость, и правду да прозябнетъ вкупѣ: азъ есмь Господь создавый тя. |
45:9 | Что лучшее устроихъ яко глину скудельничу? еда оряй орати будетъ землю весь день? еда речетъ бренiе скудельнику: что твориши, яко не дѣлаеши, ниже имаши рукъ, еда отвѣщаетъ зданiе создавшему е? |
45:10 | еда глаголетъ отцу: что родиши? и матери: что чревоболиши? |
45:11 | Яко тако глаголетъ Господь Богъ, святый Израилевъ, сотворивый грядущая: вопросите мене о сынѣхъ моихъ и о дщерехъ моихъ, и о дѣлѣхъ руку моею заповѣдите мнѣ. |
45:12 | Азъ сотворихъ землю и человѣка на ней, азъ рукою моею утвердихъ небо, азъ всѣмъ звѣздамъ заповѣдахъ. |
45:13 См.: 🔗Ис. 52:3 | Азъ возставихъ его со правдою царя, и вси путiе его правы: сей созиждетъ градъ мой и плѣненiе людій моихъ возвратитъ, не по мздѣ, ни по даромъ, рече Господь Саваоѳъ. |
45:14 | Тако глаголетъ Господь Саваоѳъ: утрудися Египетъ и купли еѳiопскiя, и Саваимстiи мужiе высоцыи къ тебѣ прейдутъ и тебѣ будутъ раби, и вслѣдъ тебе пойдутъ связани узами ручными, и прейдутъ къ тебѣ и поклонятся тебѣ, и въ тебѣ помолятся, яко въ тебѣ Богъ есть, и рекутъ: нѣсть Бога развѣ тебе: |
45:15 | ты бо еси Богъ, и не вѣдѣхомъ, Богъ Израилевъ Спасъ. |
45:16 См.: 🔗Ис. 44:11 | Постыдятся и посрамятся вси противящiися ему и пойдутъ въ студѣ: обновляйтеся ко мнѣ, острови. |
45:17 См.: 🔗Иез. 6:9 🔗Иез. 39:7 | Израиль спасается от Господа спасенiемъ вѣчнымъ: не постыдятся, ни посрамятся даже до вѣка ктому. |
45:18 См.: 🔗Ис. 42:5 🔗Втор. 4:35 | Зане тако глаголетъ Господь сотворивый небо, сей Богъ показавый землю и сотворивый ю, той раздѣли ю, не вотще сотвори ю, но на вселенiе созда ю: азъ есмь Господь, и нѣсть ктому. |
45:19 См.: 🔗Ин. 18:20 | Не отай глаголахъ, ни въ темнѣ мѣстѣ земли: не рекохъ племени Иаковлю: суетнаго взыщите. Азъ есмь, азъ есмь Господь глаголяй правду и возвѣщаяй истину. |
45:20 | Соберитеся и прiидите, совѣщайтеся вкупѣ, спасаемiи от языкъ. Не разумѣша воздвижущiи древо изваянiе свое и молящеся богомъ, иже не спасаютъ. |
45:21 | Аще возвѣстятъ, да приближатся, да увѣдятъ вкупѣ, кто слышана сотвори сiя исперва? Тогда возвѣстися вамъ: азъ Богъ, и нѣсть иного развѣ мене, праведенъ и спаситель, нѣсть кромѣ мене. |
45:22 | Обратитеся ко мнѣ и спасетеся, иже от края земнаго: азъ есмь Богъ, и нѣсть иного. |
45:23 См.: 🔗Рим. 14:11 🔗Флп. 2:10 | Кленуся мною самимъ, аще не изыдетъ изо устъ моихъ правда, словеса моя не возвратятся: яко мнѣ поклонится всяко колѣно, и исповѣстся всякъ языкъ богови, глаголя: |
45:24 См.: 🔗Ис. 65:16 | правда и слава къ нему прiидетъ: и посрамятся вси отлучающiися. |
45:25 | От Господа оправдятся, и о Бозѣ прославится все сѣмя сыновъ Израилевыхъ. |