Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 10 | |
10:1 См.: 🔗Иер. 11:13 | Виноградъ благолозенъ Израиль, плодъ обиленъ его: по множеству плодовъ его умножи требища, по благотамъ земли его возгради капища. |
10:2 | Раздѣлиша сердца своя, нынѣ погибнутъ: самъ раскопаетъ требища ихъ, сокрушатся кумiры ихъ. |
10:3 | Тѣмже нынѣ рекутъ: нѣсть царя въ насъ, яко не бояхомся Господа: царь же что сотворитъ намъ? |
10:4 См.: 🔗Втор. 29:18 | Глаголяй словеса извиненiя ложная завѣщаетъ завѣтъ: прозябнетъ судъ аки троскотъ на лядинѣ селнѣй. |
10:5 См.: 🔗Ос. 8:5 | У телца дому онова возобитаютъ живущiи въ самаріи, яко плакашася людiе его о немъ: и якоже разгнѣваша его, порадуются о славѣ его, яко преселися от нихъ. |
10:6 См.: 🔗Ос. 5:13 | И связавше его, во Ассирію отведоша въ даръ царю Иариму: въ даръ Ефремъ прiимется, и усрамится Израиль о совѣтѣ своемъ. |
10:7 См.: 🔗Ос. 9:6 | Отверже самаріа царя своего, аки хврастiе на лицы воды. |
10:8 | Извергутся требища онова согрѣшенiя Израилева, тернiе и волчецъ возникнутъ на требищихъ ихъ: и рекутъ къ горамъ: покрыйте ны: и холмомъ: падите на ны. |
10:9 См.: 🔗Ос. 9:9 | Отнелѣже холми, согрѣши Израиль: тамо сташа: не постигнетъ ихъ на холмѣ рать, на чада неправды. |
10:10 | Прiиде наказати ихъ по желанiю моему: и соберутся людiе на ня, внегда наказатися имъ во двою неправдахъ своихъ. |
10:11 См.: 🔗Иер. 31:18 | Ефремъ юница наученая, еже любити прѣнiе: азъ же найду на доброту выи ея, наступлю на Ефрема, умолчу о Иудѣ, укрѣпится себѣ Иаковъ. |
10:12 См.: 🔗Иер. 4:3 | Сѣйте себѣ въ правду, соберите плодъ живота, просвѣтите себѣ свѣтъ вѣдѣнiя, дондеже время, взыщите Господа, дондеже прiидутъ вамъ жита правды. |
10:13 См.: 🔗Иер. 4:3 | Вскую премолчасте нечестiе, и неправды его объимасте, изъядосте плодъ лживъ? яко уповалъ еси на оружiе твое, во множествѣ силы твоея. |
10:14 См.: 🔗Суд. 8:12 | И востанетъ пагуба въ людехъ твоихъ, и вся ограды твоя погибнутъ, якоже [погибе] князь Саламанъ от дому иеровоамля, во дни ратны матерь о чада разбиша: |
10:15 | тако сотворю вамъ, доме Израилевъ, от лица неправды злобъ вашихъ. |