Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 26 | |
26:1 | Въ той день воспоютъ пѣснь сiю въ земли Иудейстѣй, глаголюще: се, градъ крѣпокъ, и спасенiе намъ положитъ стѣну и огражденiе. |
26:2 См.: 🔗Пс. 117:19 | Отверзите врата, да внидутъ людiе хранящiи правду и хранящiи истину, |
26:3 См.: 🔗Ис. 27:5 | прiемлющiи истину и хранящiи миръ. |
26:4 См.: 🔗Втор. 32:4 | Яко на тя надѣянiемъ надѣяшася, Господи, во вѣкъ, Боже великiй, вѣчный, |
26:5 См.: 🔗Ис. 25:12 | иже смиривъ низвелъ еси живущыя въ высокихъ: грады крѣпкiя разориши и обнизиши я даже до земли. |
26:6 См.: 🔗Ис. 28:3 | И поперутъ я ноги кроткихъ и смиренныхъ. |
26:7 | Путь благочестивыхъ правъ бысть, и приуготованъ путь благочестивыхъ. |
26:8 См.: 🔗Пс. 43:18 | Путь бо Господень судъ: уповахомъ на имя твое и память, еяже желаетъ душа наша. |
26:9 См.: 🔗Пс. 76:7 | От нощи утренюетъ духъ мой къ тебѣ, Боже, зане свѣтъ повелѣнiя твоя на земли: правдѣ научитеся, живущiи на земли. |
26:10 См.: 🔗Ис. 5:12 🔗Деян. 12:19 | Преста бо нечестивый: всякъ, иже не научится правдѣ на земли, истины не сотворитъ: да возмется нечестивый, да не видитъ славы Господни. |
26:11 См.: 🔗Ис. 33:3 🔗Мф. 21:15 | Господи, высока твоя мышца, и не вѣдѣша, разумѣвше же постыдятся: ревность прiиметъ люди ненаказанныя, и нынѣ огнь супостаты поястъ. |
26:12 См.: 🔗Рим. 8:28 | Господи Боже нашъ, миръ даждь намъ, вся бо воздалъ еси намъ. |
26:13 | Господи Боже нашъ, стяжи ны: Господи, развѣ тебе иного не вѣмы: имя твое именуемъ. |
26:14 См.: 🔗Отк. 20:5 | Мертвiи же живота не имутъ видѣти, ниже врачеве воскресятъ: сего ради навелъ еси и погубилъ еси, и взялъ еси всякъ мужескъ полъ ихъ. |
26:15 | Приложи имъ зла, Господи, приложи зла славнымъ земли. |
26:16 См.: 🔗Пс. 17:7 | Господи, въ скорби помянухомъ тя, въ скорби малѣ наказанiе твое намъ. |
26:17 | И яко болящая приближается родити и въ болѣзни своей воскрича, тако быхомъ возлюбленному твоему. |
26:18 | Страха ради твоего, Господи, во чревѣ прiяхомъ и поболѣхомъ, и родихомъ духъ спасенiя твоего, егоже сотворихомъ на земли: не падемся, но падутся вси живущiи на земли. |
26:19 См.: 🔗4Цар. 4:35 🔗Иез. 37:3 | Воскреснутъ мертвiи и востанутъ иже во гробѣхъ, и возрадуются иже на земли: роса бо, яже от тебе, исцѣленiе имъ есть, земля же нечестивыхъ падетъ. |
26:20 | Идите, людiе мои, внидите во храмину вашу, затворите двери своя, укрыйтеся мало елико елико, дондеже мимоидетъ гнѣвъ Господень. |
26:21 См.: 🔗Мих. 1:3 | Се бо, Господь от святаго [мѣста] наводитъ гнѣвъ на живущыя на земли: и открыетъ земля кровь свою и не покрыетъ избiеныхъ. |