Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 16 | |
16:1 | И взыде Иоаннъ от газаровъ и возвѣсти Симону отцу своему, яже сотвори Кендевей. |
16:2 | И призва Симонъ два сыны своя старѣйшыя Иуду и Иоанна и рече има: азъ и братiя моя и домъ отца моего поборахомъ враги Израилевы от юности даже и до сего дне, и благопоспѣшествовася въ рукахъ нашихъ избавити Израиля многащи: |
16:3 | нынѣ же состарѣхся и вы милостiю [Бога] доволни есте въ лѣтѣхъ: будите вмѣсто мене и брата моего, и изшедше поборствуйте за языкъ нашъ, помощь же съ небесе съ вама да будетъ. |
16:4 | И избра от страны двадесять тысящъ мужей военныхъ и конниковъ, и идоша на Кендевеа и обнощеваша въ модинѣ. |
16:5 | И воставше заутра идоша на поле, и се, сила велiя во срѣтенiе имъ, пѣшая и конная, и бѣ потокъ средѣ ихъ. |
16:6 | И ополчися противу лица ихъ самъ и людiе его: и видѣ люди боящыяся прейти потокъ и прейде первый, и видѣша его мужiе и преидоша вслѣдъ его. |
16:7 | И раздѣли людій и конниковъ посредѣ пѣшихъ: конницы же враговъ мнози зѣло. |
16:8 | И вострубиша трубами, и побѣжденъ бысть Кендевей и полкъ его, и падоша от нихъ язвени мнози: прочiи же бѣгоша въ твердыню. |
16:9 | Тогда уязвенъ бысть Иуда братъ Иоанновъ: Иоаннъ же гна ихъ, дондеже прiиде въ Кедронъ, егоже созда. |
16:10 | И побѣгоша даже до столповъ сущихъ на селѣхъ азотскихъ, и зажже его огнемъ, и падоша от нихъ двѣ тысящы мужей: и возвратися въ землю Иудину въ мирѣ. |
16:11 | И Птоломей сынъ Авувовъ поставленъ бысть воеводою въ поли иерихона и имяше сребра и злата много: |
16:12 | бѣ бо зять архiереовъ. |
16:13 | И вознесеся сердце его, и восхотѣ одержати страну, и помышляше лестно на Симона и сыновъ его, погубити ихъ. |
16:14 | Симонъ же прохождаше грады, яже во странѣ Иудейстѣй, попеченiе имѣя о прилѣжанiи ихъ, и сниде во иерихонъ самъ и маттаѳіа, и Иуда и сынове его, лѣта сто седмьдесятъ седмаго месяца первагонадесять, сей есть месяцъ Саватъ. |
16:15 | И прiя ихъ сынъ Авувовъ въ твердыню, нарицаемую докъ, съ лестiю, юже созда, и сотвори имъ пиръ великъ, и сокры тамо мужы. |
16:16 | И егда упися Симонъ и сынове его, воста Птоломей и иже съ нимъ, и взяша оружiя своя, и внидоша къ Симону на пиръ, и убиша его и два сына его и нѣкiихъ от отрокъ его. |
16:17 | И сотвори прелесть велику во Израили и воздаде злая за благая. |
16:18 | И писа сiя Птоломей и посла ко царю, да послетъ ему воевъ въ помощь, и предастъ ему страну ихъ и грады. |
16:19 | И посла иныя въ газару погубити Иоанна, и тысящникомъ посла посланiя, да прiидутъ къ нему, да дастъ имъ сребро и злато и дары. |
16:20 | И иныя посла объяти Иерусалима и гору святилища. |
16:21 | И предтекъ нѣкiй возвѣсти Иоанну въ газарѣ, яко погибе отецъ его и братiя его, и яко посла и тебе убити. И слышавъ ужасеся зѣло. |
16:22 | И ятъ мужы, иже прiидоша погубити его, и уби ихъ: позна бо яко ищутъ его убити. |
16:23 | И прочая словесъ Иоанновыхъ и браней его и благихъ мужествъ его, имиже благомужествова, и созиданiя стѣнъ, ихже созда, и дѣянiй его, |
16:24 | се, сiя писана суть въ книзѣ дній архiерейства его, отнелѣже бысть архiерей по отцѣ своемъ. |