|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 3 | |
| 3:1 | Праведныхъ же души въ руцѣ Божiей, и не прикоснется ихъ мука. |
| 3:2 | Непщевани быша во очiю безумныхъ умрети, и вмѣнися озлобленiе исходъ ихъ, |
| 3:3 | и еже от насъ шествiе сокрушенiе: они же суть въ мирѣ. |
| 3:4 | Ибо предъ лицемъ человѣческимъ аще и муку прiимутъ, упованiе ихъ безсмертiя исполнено: |
| 3:5 | и вмалѣ наказани бывше, великими благодѣтелствовани будутъ, яко Богъ искуси ихъ и обрѣте ихъ достойны себѣ: |
| 3:6 | яко злато въ горнилѣ искуси ихъ, и яко всеплодiе жертвенное прiятъ я. |
| 3:7 | И во время посѣщенiя ихъ возсiяютъ, и яко искры по стеблiю потекутъ: |
| 3:8 | судятъ языкомъ и обладаютъ людьми, и воцарится въ нихъ Господь во вѣки. |
| 3:9 | Надѣющiися нань уразумѣютъ истину, и вѣрнiи въ любви пребудутъ ему, яко благодать и милость въ преподобныхъ его и посѣщенiе во избранныхъ его. |
| 3:10 | Нечестивiи же, яко помыслиша, прiимутъ запрещенiе, иже нерадившiи о праведнѣмъ и от Господа отступивше. |
| 3:11 | Премудрость бо и наказанiе уничижаяй окаяненъ, и праздно упованiе ихъ, и труды безплодны, и неключима дѣла ихъ: |
| 3:12 | жены ихъ безумны и лукава чада ихъ, проклято рожденiе ихъ. |
| 3:13 | Яко блажена есть неплоды неоскверненая, яже не позна ложа во грѣсѣ, имѣти будетъ плодъ въ посѣщенiи душъ: |
| 3:14 | и евнухъ, иже не содѣла въ руку [своею] беззаконiя, ниже помысли на Господа лукавая, дастся бо ему вѣры благодать избранна и жребiй во храмѣ Господни угоднѣйшiй. |
| 3:15 | Благихъ бо трудовъ плодъ благославенъ, и не отпадающь корень разума. |
| 3:16 | Чада же прелюбодѣевъ несовершена будутъ, и от законопреступнаго ложа сѣмя изчезнетъ: |
| 3:17 | аще бо долгоживотни будутъ, ни во чтоже вмѣнятся, и безчестна на послѣдокъ старость ихъ: |
| 3:18 | аще же скоро скончаются, не будутъ имѣти упованiя, ниже въ день суда утѣшенiя: |
| 3:19 | рода бо неправеднаго лютая окончанiя. |
