Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
5:1 | И отвѣшавъ товіа, рече ему: отче, сотворю вся, елика заповѣдалъ еси ми: |
5:2 | но како возмогу взяти сребро, а не знаю его? |
5:3 | И даде ему рукописанiе и рече ему: ищи себѣ человѣка, иже пойдетъ съ тобою, и дамъ ему мзду, дондеже живъ есмь, и шедъ возми сребро. |
5:4 | И иде искати человѣка, и обрѣте Рафаила, иже бѣ ангелъ, и не вѣдяше: |
5:5 | и рече ему: могу ли пойти съ тобою въ раги мидіискiя, и извѣстенъ ли еси о мѣстѣхъ? |
5:6 | И рече ему ангелъ: пойду съ тобою, и путь вѣмъ, и у гаваила брата нашего живяхъ. |
5:7 | И рече ему товіа: пожди мя, и реку отцу моему. |
5:8 | И рече ему: иди и не косни. |
5:9 | И вшедъ рече отцу: се, обрѣтохъ, иже пойдетъ со мною. сей же рече: пригласи его ко мнѣ, да увѣмъ, коего племене есть, и аще вѣренъ есть, еже ити съ тобою. |
5:10 | И призва его: и вниде, и привѣтствоваста другъ друга. |
5:11 | И рече ему товитъ: брате, от коего племене и от коего отечества еси ты? скажи ми. |
5:12 | И рече ему: племене и отечества ты ищеши? или наемника, иже спутьшествуетъ съ сыномъ твоимъ? И рече ему товитъ: хощу брате, вѣдати родъ твой и имя. |
5:13 | Онъ же рече: азъ азаріа Ананіи великаго от братiи твоея. |
5:14 | И рече ему: благо пришелъ еси, брате, и на мя да не гнѣваешися, яко взыскахъ племя твое и отечество твое увѣдати, и ты еси братъ мой от добра и блага рода: знахъ бо азъ Ананію и Ионаѳана сыновъ семеа великаго, яко ходихомъ купно во Иерусалимъ кланятися, приносяще первородная и десятины плодовъ, и не заблудиша въ заблужденiи братiи нашея: от корене великаго еси, брате: |
5:15 | но рцы мнѣ, кую тебѣ имамъ мзду дати? драхму на день и нуждная тебѣ якоже и сынови моему: |
5:16 | и еще приложу тебѣ надъ мзду, аще здрави возвратитеся. |
5:17 | И благоизволиста тако. И рече къ товіи: готовъ буди къ пути, и да благоспѣшится вама. И уготова сынъ его, яже къ пути. И рече ему отецъ его: иди съ человѣкомъ симъ: обитаяй же на небеси Богъ благоустроитъ путь вашъ, и ангелъ его да спутьшествуетъ вама. И изыдоста оба отити, и песъ отрочища съ нима. |
5:18 | Плакася же анна мати его и рече къ товиту: почто отпустилъ еси чадо наше? или не жезлъ руки нашея есть, внегда входити ему и исходити предъ нама? |
5:19 | сребро сребромъ да не возвратится, но уметы сына нашего да будетъ: |
5:20 | яко бо дадеся нама жити от Господа, сiе доволно есть нама. |
5:21 | И рече ей товитъ: не печалися, сестро, здравъ прiидетъ, и очи твои узрятъ его: |
5:22 | ангелъ бо благъ спутьшествовати будетъ ему и благоуспѣется путь его, и возвратится здравъ. |