Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 8 | |
8:1 | И отвѣща ко мнѣ и рече: сей вѣкъ сотворилъ вышнiй многихъ ради, будущiй же ради малыхъ: |
8:2 | реку же тебѣ уподобленiе, ездро: како же вопросиши земли, и речетъ ти, яко дастъ земли много болши, от неяже будетъ скудельное, мало же праха, отонудуже злато бываетъ: тако и дѣянiе настоящаго вѣка: |
8:3 | мнози убо сотворени суть, не мнози же спасутся. |
8:4 | И отвѣщахъ и рекохъ: душе моя! пожри убо разумѣнiе и поглоти мудрость, |
8:5 | понеже обѣщала еси слушати, и пророчествовати хотящи, не бо дано есть тебѣ время, развѣ токмо жити: |
8:6 | О, Господи! аще не попустиши рабу твоему, да помолимся предъ тобою, и даси намъ сѣмя въ сердце и чувству очищенiе, отонудуже плодъ былъ бы, гдѣ жити возможетъ всякъ растлѣнный, иже носити будетъ мѣсто человѣка? |
8:7 | единъ бо еси, и едино сотворенiе мы есмы руку твоею, якоже глаголалъ еси: |
8:8 | и како нынѣ въ ложеснахъ создано есть тѣло, и подаеши составы? содержится во огни и въ водѣ твое творенiе, и девять месяцъ терпитъ твое созданiе твою тварь, яже въ немъ создана есть: |
8:9 | самое же еже хранитъ, и еже хранится, обоя сохранятся: сохраненая же нѣкогда паки издаютъ ложесна, яже въ нихъ растоша: |
8:10 | повелѣлъ бо еси от самыхъ членовъ, сирѣчь от сосцевъ издаяти млеко плоду сосцевъ, |
8:11 | да питается то, еже создано есть, даже до времене нѣкоего, и потомъ управиши его твоему милосердiю: |
8:12 | воспиталъ еси его твоею правдою и научилъ еси его закону твоему и наказалъ еси его твоимъ разумомъ, |
8:13 | и умертвиши его якоже твое сотворенiе, и паки оживиши его, якоже дѣло твое: |
8:14 | аще убо погубиши его, иже толикими труды созданъ есть, твоимъ повелѣнiемъ удобно есть устроити, да и то, еже творяшеся, сохранится: |
8:15 | и нынѣ, Господи, возглаголю: о всяцѣмъ человѣцѣ ты паче вѣси, и о людехъ твоихъ, о нихже болѣзную, |
8:16 | и о наслѣдiи твоемъ, егоже ради азъ рыдаю, и ради Израиля, о немже скорбенъ есмь, и Иакова ради, о немже азъ болѣзную: |
8:17 | сего ради начну молитися предъ тобою за мя и за нихъ, яко вижду паденiе наше, иже обитаемъ на земли: |
8:18 | но слышахъ скорость судiи, иже прiидетъ, |
8:19 | сего ради услыши гласъ мой и разумѣй слово мое, и возглаголю предъ тобою. Начало словесъ ездриныхъ, прежде неже взятъ бысть. |
8:20 | И рѣхъ: Господи, иже обитаеши во вѣкъ, егоже очи вознесенны на вышняя и на воздусѣ, |
8:21 | и егоже престолъ безцѣнный есть и слава непостижима, емуже предстоятъ вои ангелстiи съ трепетомъ, ихже сохраненiе въ вѣтрѣ и огни обращается, егоже слово истинно и глаголы вѣчнiи, |
8:22 | егоже повелѣнiе крѣпко и разсмотренiе страшно, егоже зракъ изсушаетъ бездны и гнѣвъ растаявати творитъ горы и истина свидѣтелствуетъ: |
8:23 | услыши молитву раба твоего и во ушеса прiими моленiе творенiя твоего: |
8:24 | егда бо живу, глаголати буду, и егда разумѣю, отвѣщати буду: не смотри на людій твоихъ грѣхи, но иже тебѣ во истинѣ служатъ, |
8:25 | ни внемли нечестивымъ языковъ начинаниемъ, но иже твоя свидѣнiя со болѣзнiю сохраниша, |
8:26 | ни помысли иже предъ тобою лживо пожиша, но помяни сихъ, иже по воли твоей страхъ познаша, |
8:27 | ниже хощи погубити, иже скотскiя обычаи имѣша, но воззри на тѣхъ, иже закону твоему ясно учиша, |
8:28 | ни прогнѣвайся на нихъ, иже звѣрей горши осуждени суть, |
8:29 | но возлюби сихъ, иже всегда на правду твою надѣются и славу: |
8:30 | яко мы и отцы наши таковыми болѣзньми исчезаемъ, |
8:31 | ты же ради насъ грѣшныхъ милосердъ наречешися: |
8:32 | аще бо пожелаеши, да насъ помилуеши, тогда милосердъ наречешися, не имѣющымъ намъ дѣлъ правды: |
8:33 | праведнiи бо, ихже суть дѣла многа представленна, от своихъ дѣлъ прiимутъ мзду: |
8:34 | что бо есть человѣкъ, да на него прогнѣваешися? или родъ растлѣнъ, да тако огорченъ будеши на него? |
8:35 См.: 🔗3Цар. 8:46 🔗2Пар. 6:36 | воистинну бо никтоже от рожденныхъ есть, иже бы нечестиво не сотворилъ, и от исповѣдающихся, иже бы не согрѣшилъ: |
8:36 | въ томъ бо возвѣстится правда твоя и благость твоя, Господи, егда милосердъ будеши имъ, иже не имѣютъ существа благихъ дѣлъ. |
8:37 | И отвѣща ко мнѣ и рече: право глаголалъ еси нѣкая, и по словесемъ твоимъ тако и будетъ: |
8:38 | понеже не истинно помышлю на зданiе сихъ, иже согрѣшиша прежде смерти, прежде суда, прежде погубленiя, |
8:39 | но услаждуся надъ праведныхъ творенiемъ и помяну пришелствiе и спасенiе и мзды воспрiятiе: |
8:40 | якоже убо глаголалъ есмь, тако и есть: |
8:41 | якоже бо земледѣлецъ сѣетъ на земли сѣмена многа и сажденiя множество садитъ, но не во время вся, яже сѣяна суть, спасутся, но ни вся, яже сажена суть, вкоренятся: тако и иже въ вѣцѣ насѣяни суть, не вси спасутся. |
8:42 | И отвѣщахъ и рекохъ: аще обрѣтохъ благодать, возглаголю: |
8:43 | якоже сѣмя земледѣлца аще не взыдетъ, или не прiиметъ дождя твоего во время, или аще растлѣно будетъ умноженiемъ дождя: |
8:44 | тако погибаетъ подобнѣ и человѣкъ, иже рукама твоима созданъ бысть, и ты ему образъ именовался еси: понеже подобенъ еси ему, егоже ради вся создалъ еси и уподобилъ еси сѣмени земледѣлцеву: |
8:45 | не прогнѣвайся на насъ, но прости людемъ твоимъ и помилуй наслѣдiе твое, ты же творенiе твое милуеши. |
8:46 | И отвѣща ко мнѣ и рече: яже суть настоящая, настоящымъ, и яже будущая, будущымъ: |
8:47 | много бо тебѣ останетъ, да можеши возлюбити мое сотворенiе паче мене, тебѣ же часто и самому приближахся, къ неправеднымъ же никогда: |
8:48 | но и въ семъ дивенъ еси предъ вышнимъ, |
8:49 | яко смирился еси якоже подобаетъ тебѣ, и не судилъ еси тебе, да между праведными много славишися: |
8:50 | того ради бѣды многи и нищеты сотворятся тѣмъ, иже обитаютъ вѣкъ на послѣдокъ, понеже во мнозѣй гордыни ходиша: |
8:51 | ты же о тебѣ разумѣй и о подобныхъ тебѣ взыскуй славу: |
8:52 | вамъ бо отверстъ есть рай, насаждено есть древо жизни, предуготовано есть будущее время, готово есть изобилiе, созданъ есть градъ, искушенъ есть покой, совершенна есть благостыня и совершенна премудрость: |
8:53 | корень зла знаменанъ есть от васъ, немощь и молiе от васъ скрыто есть, и во адъ бѣжитъ растлѣнiе въ забвенiи: |
8:54 | преидоша болѣзни, и явлено есть на конецъ сокровище безсмертiя: |
8:55 | не прилагай убо испытовати о множествѣ погибающихъ, |
8:56 | ибо и тіи, прiемлюще свободу, уничижиша вышняго, и законъ его презрѣша, и пути его оставиша, |
8:57 | еще же и праведныхъ его попраша, |
8:58 См.: 🔗Пс. 52:2 | и рекоша въ сердцы своемъ: нѣсть Бога, аще и вѣдяху, яко умираютъ: |
8:59 | якоже бо васъ прiимутъ яже предрѣченна суть, тако тѣхъ жажда и мученiя, яже уготована суть: ибо не хотяше человѣка погубити, |
8:60 | но и тіи, иже сотворени суть, оскверниша имя того, иже сотвори ихъ, и неблагодарни быша тому, иже уготовалъ имъ животъ: |
8:61 | сего ради судъ мой нынѣ приближается, |
8:62 | яже не всѣмъ показахъ, токмо тебѣ и тебѣ подобнымъ не многимъ. И отвѣщахъ и рекохъ: |
8:63 | се, нынѣ, Господи, показалъ еси мнѣ множество знаменiй, яже начнеши творити въ послѣднiй часъ, но не показалъ еси мнѣ, въ кое время. |