Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 17 | |
17:1 См.: 🔗Пс. 54:4 | И рече Ахитофелъ ко Авессалому: изберу нынѣ себѣ дванадесять тысящъ мужей и востану, и пожену вслѣдъ давида нощiю, |
17:2 См.: 🔗2Цар. 16:14 | и найду на него, и той утружденъ и ослабленъ руками, и устрашу его, и побѣжатъ вси людiе иже съ нимъ, и убiю царя единаго: |
17:3 | и возвращу вся люди къ тебѣ, имже образомъ обращается невѣста къ мужеви своему: ты бо токмо души единаго мужа ищеши, всѣмъ же людемъ будетъ миръ. |
17:4 | И угодно слово бысть предъ очима Авессаломлима и предъ очима всѣхъ старѣйшинъ Израилевыхъ. |
17:5 | И рече Авессаломъ: призовите же и хусіа Арахіина, и услышимъ что изъ устъ его. |
17:6 | И вниде хусій ко Авессалому, и рече Авессаломъ къ нему, глаголя: по глаголу сему глагола Ахитофелъ: сотворимъ ли по словеси его? аще же ни, ты глаголи. |
17:7 См.: 🔗2Цар. 15:34 | И рече хусій ко Авессалому: не благъ совѣтъ сей, егоже совѣща Ахитофелъ единою сiе. |
17:8 | И рече хусій: ты вѣси отца твоего и мужей его, яко сильни суть зѣло, и гнѣвливи душами своими, яко медвѣдица чадъ лишеная на селѣ, и аки вепрь свирѣпый на поли: и отецъ твой мужъ борецъ, и не дастъ почити людемъ: |
17:9 См.: 🔗Суд. 6:2 | се бо, той нынѣ скрыся на нѣкоторѣмъ холмѣ или на нѣкоторѣмъ мѣстѣ: и будетъ внегда напасти на нихъ въ началѣ, и услышитъ слушаяй, и речетъ: бысть сокрушенiе въ людехъ иже за Авессаломомъ: |
17:10 | и той сынъ силы, емуже сердце якоже сердце льву таящо истаетъ: понеже вѣсть весь Израиль, яко силенъ отецъ твой, и сынове силы вси иже съ нимъ: |
17:11 | тако совѣтуя азъ усовѣтовахъ, и собираяся соберется къ тебѣ весь Израиль от Дана и до вирсавіи, аки песокъ иже при мори во множествѣ, и лице твое идущее посредѣ ихъ: |
17:12 | и прiидемъ къ нему на едино мѣсто, идѣже обрящемъ его тамо, и ополчимся на него, якоже спадаетъ роса на землю, и не оставимъ въ немъ и въ мужехъ его иже съ нимъ ни единаго: |
17:13 | и аще во градъ соберутся, и возметъ весь Израиль ко граду тому ужы, и совлечемъ его въ потокъ, дондеже не останется тамо ниже камень. |
17:14 | И рече Авессаломъ и вси мужiе Израилтестiи: благъ совѣтъ хусіа Арахіина паче совѣта Ахитофелева. И Господь заповѣда разорити совѣтъ Ахитофелевъ благій, яко да наведетъ Господь на Авессалома злая вся. |
17:15 | И рече хусій Арахіинъ ко садоку и Авiаѳару иереемъ: тако и тако совѣтова Ахитофелъ Авессалому и старѣйшинамъ Израилевымъ: и азъ тако и тако совѣтовахъ: |
17:16 | и нынѣ послите скоро и возвѣстите давиду, глаголюще: не пребуди нощь сiю во Аравоѳѣ пустыни, но пойти потщися, да не како пожертъ будетъ царь и вси людiе иже съ нимъ. |
17:17 См.: 🔗2Цар. 15:27 | И Ионаѳанъ и Ахимаасъ стояста на студенцѣ рогили, и иде рабыня и повѣда има: и тіи идоста и возвѣстиста давиду царю, яко не могоста явитися еже внити во градъ. |
17:18 | И видѣ ихъ отрочищь и повѣда Авессалому. И идоста оба скоро и прiидоста въ домъ мужа въ вауримъ: и тому ровъ на дворѣ, и снидоста тамо. |
17:19 См.: 🔗Нав. 2:4 | И взя жена, и положи покровъ на устiи рова, и суши на немъ Арафоѳъ, и не познася глаголъ. |
17:20 | И прiидоша отроцы Авессаломли къ женѣ въ домъ и рѣша: гдѣ Ахимаасъ и Ионаѳанъ? И рече имъ жена: преидоста вмалѣ воду. И искаша, и не обрѣтоша, и возвратишася во Иерусалимъ. |
17:21 См.: 🔗2Цар. 15:28 | Бысть же по отшествiи ихъ, и излѣзоста изъ рова, и идоста, и возвѣстиста давиду царю и глаголаста ему: востаните, и прейдите скоро воду, яко сице совѣща на вы Ахитофелъ. |
17:22 | И воста давидъ и вси людiе иже съ нимъ и преидоша Иорданъ до свѣта заутра, и ни единъ не оста, иже бы не прешелъ Иордана. |
17:23 См.: 🔗2Цар. 15:12 | И Ахитофелъ видѣ, яко не сбыстся совѣтъ его, и осѣдла осля свое, и воста, и отъиде въ домъ свой, во градъ свой: и заповѣда дому своему, и удавися, и умре, и погребенъ бысть во гробѣ отца своего. |
17:24 | И давидъ прейде въ Манаимъ, Авессаломъ же прейде Иорданъ самъ и вси мужiе Израилтестiи съ нимъ. |
17:25 См.: 🔗2Цар. 19:13 | И Амессая постави Авессаломъ вмѣсто Иоава надъ силою: Амессай же сынъ мужа, емуже имя Иеѳеръ Иезраилитинъ, сей вниде ко Авигеи дщери Иессеинѣ, сестрѣ саруіи матере Иоавли. |
17:26 | И ополчися Авессаломъ и весь Израиль въ земли Галаадстѣй. |
17:27 См.: 🔗2Цар. 19:31 | И бысть егда вниде давидъ въ Манаимъ, и уесвій сынъ Наасовъ от равваѳа сыновъ Аммонихъ, и Махиръ сынъ Амiиль иже изъ лодавара, и верзеллій Галаадитинъ изъ рогеллима, |
17:28 | принесоша десять постель устроеныхъ и конобовъ десять и сосуды скуделны и пшеницу и ячмень и муку и пшено и бобъ и сочевицу |
17:29 См.: 🔗2Цар. 16:2 | и медъ и масло и овцы и сыры кравiя, и принесоша давиду и людемъ иже съ нимъ ясти: быша бо людiе гладни и утруждени и жаждни въ пустыни. |