Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 10 | |
10:1 | И вземше два сына Аароня, Надавъ и Авiудъ, кійждо свою кадилницу, вложиста въ ня огнь и возложиста нань ѳимiамъ, и принесоста предъ Господа огнь чуждь, егоже не повелѣ има Господь. |
10:2 | И изыде огнь от Господа, и пояде я, и умроста предъ Господемъ. |
10:3 | И рече Моисей ко Аарону: сiе есть, еже рече Господь, глаголя: въ приближающихся Мнѣ освящуся и во всемъ сонмѣ прославлюся. И умилися Ааронъ. |
10:4 | И призва Моисей Мисаила и Елисафана, сыны Озiилевы, сыны брата отца Аароня, и рече имъ: приступите и возмите братiй своихъ от лица святыхъ внѣ полка. |
10:5 См.: 🔗Деян. 5:6 | И приступиша, и взяша ихъ въ ризахъ ихъ, [и изнесоша] внѣ полка, якоже рече Моисей. |
10:6 См.: 🔗Лев. 13:45 🔗Лев. 21:10 | И рече Моисей ко Аарону и Елеазару и Иѳамару, сыномъ его оставшымся: главъ вашихъ не открывайте и ризъ вашихъ не раздирайте, да не умрете, и на весь сонмъ будетъ гнѣвъ: братiя же вашя весь домъ Израилевъ да плачутся запаленiя, имже запалишася от Господа: |
10:7 | и изъ дверiй скинiи свидѣнiя не исходите, да не умрете: елей бо помазанiя, иже от Господа, на васъ есть. И сотвориша по словеси Моисеову. |
10:8 | И рече Господь ко Аарону, глаголя: |
10:9 | вина и сикера не пійте, ты и сынове твои съ тобою, егда входите въ скинiю свидѣнiя, или приступающымъ вамъ ко олтарю, да не умрете: [и будетъ сiе] законно вѣчно въ роды вашя: |
10:10 | отлучити между вещми святыми и между сквернавыми, и между нечистыми и между чистыми, |
10:11 См.: 🔗Втор. 33:10 🔗Мал. 2:4 | и устроити сыномъ Израилевымъ вся законная, яже глагола Господь къ нимъ рукою Моисеовою. |
10:12 См.: 🔗Лев. 2:3 🔗Лев. 6:16 | И рече Моисей ко Аарону, и Елеазару и Иѳамару, сыномъ его оставшымся: возмите жертву оставшуюся от приносовъ Господнихъ и ядите опрѣсноки у олтаря: яко святая святыхъ суть: |
10:13 См.: 🔗Лев. 2:3 🔗Лев. 6:16 | и ядите я на мѣстѣ святѣ: законно бо тебѣ есть, и законно сыномъ твоимъ сiе от приносовъ Господнихъ: сице бо ми заповѣда Господь: |
10:14 См.: 🔗Лев. 9:21 | и груди участiя и рамо участiя ядите на мѣстѣ святѣ ты и сынове твои, и домъ твой съ тобою: законно бо тебѣ, и законно сыномъ твоимъ дадеся от жертвъ спасенiи сыновъ Израилевыхъ: |
10:15 См.: 🔗Исх. 29:27 | рамо участiя и груди участiя въ приносѣхъ тучныхъ да принесутъ, участiе еже приносити предъ Господа: и да будетъ тебѣ и сыномъ твоимъ и дщеремъ твоимъ съ тобою законно вѣчно, якоже повелѣ Господь Моисею. |
10:16 См.: 🔗2Мак. 2:11 | И козла, иже грѣха ради, взыскуя взыска Моисей: и сей сожженъ бяше. И разгнѣвася Моисей на Елеазара и Иѳамара, сыны Аарони оставльшыяся, глаголя: |
10:17 См.: 🔗Лев. 6:26 🔗Исх. 28:38 | почто не снѣдосте на мѣстѣ святѣ, еже грѣха ради? яко святая святыхъ суть, сiе даде вамъ ясти, да отъимете грѣхъ сонма и помолитеся о нихъ предъ Господемъ: |
10:18 | не внесеся бо от крове его въ святое: предъ лицемъ внутрь да ясте е на мѣстѣ святѣ, якоже повелѣ мнѣ Господь. |
10:19 | И рече Ааронъ къ Моисею, глаголя: аще днесь принесоша яже грѣха ради своего и всесожженiя своего предъ Господа, и случишася мнѣ сицевая, и снѣмъ, яже грѣха ради, днесь, еда угодно будетъ Господу? |
10:20 | И слыша Моисей, и угодно ему бысть. |