Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
5:1 | И возвѣщено бысть Олоферну вождоначалнику силы Ассурскiя, яко сынове Израилевы уготовашася на брань, и проходы горнiя заключиша, и оградиша стѣнами всякiй верхъ горы высокiя, и положиша на поляхъ преткновенiя. |
5:2 | И разгнѣвася яростiю зѣло, и созва всѣхъ началниковъ Моавлихъ и воеводъ сыновъ Аммонихъ и всѣхъ властелей поморiя, |
5:3 | и рече имъ: возвѣстите убо ми, сынове ханаани, кто людiе сіи живущiи въ горней, и каковы, въ нихже живутъ, гради, и множество силы ихъ, и въ чемъ держава ихъ и крѣпость ихъ, и кто поставленъ надъ ними царь вождь воинства ихъ? |
5:4 | и чесо ради сопротивишася, еже не изыти во срѣтенiе мнѣ, паче всѣхъ живущихъ на западѣхъ? |
5:5 | И рече къ нему Ахiоръ вождь всѣхъ сыновъ Аммонихъ: послушай убо, господине мой, слова от устъ раба твоего, и возвѣщу тебѣ истину о людехъ сихъ, иже обитаютъ въ горней сей, близъ тебе живуще, и не изыдетъ ложь изъ устъ раба твоего: |
5:6 | людiе сіи суть исчадiя халдеовъ |
5:7 См.: 🔗Быт. 11:31 🔗Нав. 24:2 | и вселишася первѣе въ Месопотамiи, понеже не восхотѣша послѣдовати богомъ отцевъ своихъ, иже бѣша въ земли Халдейстѣй: |
5:8 | и отвратишася от пути отецъ своихъ и поклонишася Богу небесе, Богу, егоже познаша: и изгнаша ихъ от лица боговъ своихъ, и побѣгоша въ Месопотамiю и обиташа тамо дни многи: |
5:9 | и рече Богъ ихъ, да изыдутъ от пришелствiя своего и да идутъ въ землю ханааню: и вселишася тамо, и умножишася златомъ и сребромъ и скоты многими зѣло: |
5:10 | и снидоша во Египетъ, покры бо лице земли Ханаани гладъ, и пришелствоваша тамо, дондеже прекормишася, и быша тамо во множество много, и не бѣ числа роду ихъ: |
5:11 | и воста на нихъ царь Египетскiй и прехитри ихъ, и въ трудѣ и плинѳѣ смири ихъ, и положи ихъ въ рабы: |
5:12 | и возопиша къ Богу своему, и порази всю землю Египетскую язвами, въ нихже не бѣ изцѣленiе, и изгнаша ихъ Египтяне от лица своего: |
5:13 См.: 🔗Исх. 14:21 | и изсуши Богъ чермное море предъ ними, |
5:14 | и веде ихъ на путь Сины и Кадисъ-варни, и изгнаша всѣхъ живущихъ въ пустыни, |
5:15 | и вселишася въ земли Аморреовъ, и всѣхъ есевонитовъ истребиша крѣпостiю своею, и прешедше Иорданъ наслѣдиша всю горнюю: |
5:16 | и изгнаша от лица своего Хананеа и Ферезеа, и Иевусеа и Cихема и всѣхъ Гергесеовъ, и обиташа въ ней дни многи: |
5:17 | и дондеже не согрѣшиша предъ Богомъ своимъ, бѣша благая съ ними, понеже Богъ ненавидяй неправды съ ними есть: |
5:18 | егда же отступиша от пути, егоже завѣща имъ, истребишася во мнозѣхъ бранехъ на много зѣло, и плѣнени быша въ землю не свою, и храмъ Бога ихъ бысть въ попранiе, и гради ихъ одержани быша от супостатъ: |
5:19 | и нынѣ обратившеся къ Богу своему, взыдоша от разсѣянiя, идѣже разсѣяни быша тамо, и одержаша Иерусалимъ, идѣже святилище ихъ, и вселишася въ горней, понеже бѣ пуста: |
5:20 | и нынѣ, владыко господине, аще убо есть безумiе въ людехъ сихъ, и согрѣшаютъ къ Богу своему, и разсмотримъ сiе, яко есть въ нихъ соблазнъ сей, и взыдемъ и повоюемъ ихъ: |
5:21 | аще же нѣсть беззаконiя въ языцѣ ихъ, да прейдетъ господинъ мой, да не когда защититъ Господь ихъ и Богъ ихъ по нихъ, и будемъ въ поношенiе предъ всею землею. |
5:22 | И быстѣ яко преста Ахiоръ глаголя словеса сiя, и возропташа вси людiе обстоящiи шатеръ и предстоящiи, и рѣша вельможи Олоферновы и вси живущiи въ приморiи и въ Моавѣ посѣщи его: |
5:23 | не бо убоимся от сыновъ Израилевыхъ: се бо, людiе, въ нихже нѣсть силы, ниже могутства ко ополченiю крѣпкому: |
5:24 | тѣмже убо взыдимъ, и будутъ во снѣдь всему воинству твоему, владыко Олоферне. |