Вторая книга Маккавейская, глава 1 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 1
1:1	Братiи сущей во Египтѣ Иудеомъ радоватися: братiя иже во Иерусалимѣ Иудее и иже во странѣ Иудейстѣй, мира благаго:
1:2	и да благосотворитъ вамъ Богъ и да помянетъ завѣтъ свой иже ко Аврааму и Исааку и Иакову рабомъ сво­имъ вѣрнымъ,
1:3	и да дастъ вамъ сердце всѣмъ во еже че­ст­вовати его и творити хотѣнiя его сердцемъ великимъ и душевнымъ изволенiемъ,
1:4	и да от­верзетъ сердца ваша въ законѣ сво­емъ и въ повелѣнiихъ, и миръ да сотворитъ,
1:5	и да услышитъ молитвы вашя и умилит­ся вамъ и не оставитъ васъ во время лукаво.
1:6	И нынѣ здѣ есмы молящеся о васъ.
1:7	Цар­ст­ву­ю­щу димитрiю лѣта сто шестьдесятъ девятаго, мы Иудее писахомъ вамъ въ скорби и въ горести нашедшей намъ въ лѣтѣхъ сихъ, от­нелѣже от­ступи Иасонъ и иже съ нимъ от­ стыя земли и цар­ст­ва,
1:8	и пожгоша врата, и пролiяша кровь неповин­ну: и молихомся Господеви, и услышани есмы, и при­­несохомъ жертву и семидалъ, и воз­жгохомъ свѣтильники, и предложихомъ хлѣбы.
1:9	И нынѣ празднуйте дни скинопигіи хаслева месяца.
1:10	Лѣта сто осмьдесятъ осмаго, иже во Иерусалимѣ и иже во Иудеи, и старѣйшины и Иуда Аристовулу учителю Птоломеа царя сущему же от­ помазан­ныхъ иереевъ рода, и сущымъ во Египтѣ Иудеомъ, радоватися и здрав­ст­вовати.
1:11	От великихъ бѣд­ст­въ Богомъ спасени, вельми благодаримъ ему, аки на царя ополчающiися.
1:12	Сей бо изведе ополчающихся на святый градъ:
1:13	въ персиду бо бывъ вождомъ, и при­­ немъ нестерпимая мнящаяся быти сила, посѣчени быша въ капищи нанеи, прельщенiя употребив­шымъ жерцемъ сущымъ при­­ нанеи.
1:14	Аки бо спребывати хотя ей, прiиде на мѣсто Антiохъ и иже съ нимъ друзи, взятiя ради сребрениковъ подъ именемъ вѣна:
1:15	и предложив­шымъ сiя жерцемъ нанеи, и оному в­шедшу съ малыми въ при­­творъ капища, заключив­ше капище,
1:16	егда вниде Антiохъ, от­верзше свода сокровен­ную дверь, метающе каменiе побиша игемона и сущихъ съ нимъ, и раздѣлив­ше на уды и главы от­сѣкше изметаша къ сущымъ внѣ.
1:17	О всѣхъ благословенъ нашъ Богъ, иже предаде нече­ст­вовав­шихъ.
1:18 См.: 🔗1Мак. 4:59	Хотяще убо праздновати двадесять пятаго дне месяца хаслева очищенiе церкве, потребно непщевахомъ извѣстити вамъ, да и вы празднуете день скинопигіи и огня, егда нееміа создавъ церковь и олтарь, при­­несе жертву.
1:19 См.: 🔗Лев. 6:9	Ибо егда въ персиду ведяхуся отцы наши, тогда жерцы боящiися Бога вземше от­ огня олтарнаго отай, скрыша во юдоль кладязя дно имѣюща безводное, и въ немъ соблюдоша, яко всѣмъ невѣдому быти мѣсту.
1:20	Преминув­шымъ же лѣтомъ многимъ, егда изволися Богу, послан­ный нееміа от­ царя персидскаго, внуки жерцевъ сокрыв­шихъ посла на взысканiе огня: и якоже повѣдаша намъ, не обрѣтоша огня, но воду густу,
1:21	повелѣ имъ черпати и при­­нести: егда же при­­несена быша жертвен­ная, повелѣ жерцемъ нееміа покропити водою дрова и лежащая на нихъ.
1:22	Егда же бысть сiе, и время прiиде, егда солнце воз­сiя прежде облачно сущо, воз­жжеся огнь великъ, яко дивитися всѣмъ.
1:23	Молитву же творяху жерцы, егда горяще жертва, и жерцы и вси Ионаѳану начинающу, прочымъ же от­вѣщающымъ, якоже нееміи.
1:24	Бѣ же молитва имѣющи образъ сей: Господи, Господи Боже, всѣхъ творче, страшный и крѣпкiй, и праведный и милостивый, единый Царю и благій,
1:25	единый дателю, едине праведне и Вседержителю и вѣчный, спасаяй Израиля от­ всякаго зла, сотворивый отцы избран­ны и освятивый ихъ,
1:26	прiими жертву за вся люди твоя Израиля и сохрани часть твою и освяти:
1:27	собери расточенiе на­ше, избави работа­ю­щихъ языкомъ, на уничижен­ныхъ и мерзкихъ призри, и да увѣдятъ языцы, яко ты еси Богъ нашъ:
1:28	показни насилу­ю­щихъ и досаждающихъ въ гордыни:
1:29 См.: 🔗Втор. 30:4 🔗2Мак. 2:10 🔗3Езд. 1:30 🔗Неем. 1:9	насади люди твоя на мѣстѣ святѣмъ тво­емъ, якоже рече Моисей.
1:30	Жерцы же пояху пѣнiя.
1:31	Егда же сгорѣша жертвен­ная, остав­шею водою нееміа повелѣ каменiе большее полити.
1:32	Егда же сiе бысть, пламень воз­горѣся, и от­ олтаря облистав­шу свѣту, сгорѣ.
1:33	Егда же явлена бысть вещь, и воз­вѣщено бысть царю персску, яко на мѣстѣ, въ немже огнь скрыша преселен­нiи жерцы, вода явися, от­нелѣже нееміа и сущiи съ нимъ очистиша жертвы,
1:34	оградивъ же царь свято сотвори [мѣсто то], искушаяй вещь.
1:35	И имже дарова­ше царь, многи дары взима­ше и преподаяше.
1:36	Прозва же нееміа и иже съ нимъ мѣсто то нефѳарь, еже сказует­ся очищенiе, нарицает­ся же у многихъ нефѳай.