Книга пророка Иеремии, глава 26

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 26
26:1	Въ началѣ цар­ст­ва Иоакима сына Иосіина бысть слово сiе от­ Господа:
26:2 См.: 🔗Втор. 4:2 🔗Прит. 30:6	тако рече Господь: стани во дворѣ дому Господня и проповѣждь всѣмъ Иудеомъ, входящымъ кланятися въ домъ Господень, вся словеса, яже завѣщахъ тебѣ проповѣдати имъ, не уйми словесе:
26:3 См.: 🔗Иер. 18:8 🔗Иоил. 2:13	негли послушаютъ и от­вратят­ся кійждо от­ пути сво­его злаго, и почію от­ золъ, яже помышляю сотворити имъ злыхъ ради начинанiй ихъ.
26:4	И речеши: тако рече Господь: аще не послушаете мене, еже ходити въ законѣхъ мо­ихъ, яже дахъ предъ лицемъ вашимъ,
26:5 См.: 🔗Иер. 7:13	въ послушанiе словесъ отрокъ мо­ихъ пророковъ, ихже азъ посылаю къ вамъ изъ утра, и послахъ, и не послушасте мене,
26:6 См.: 🔗Иер. 7:14	и дамъ домъ сей якоже Силомъ, и градъ сей дамъ въ клятву всѣмъ языкомъ всея земли.
26:7	И слышаша жерцы и лжепророцы и вси людiе иеремію глаголюща словеса сiя въ дому Господни.
26:8	И бысть, егда иереміа преста глаголати вся, елика завѣща ему Господь глаголати всѣмъ людемъ, и яша иеремію жерцы и лжепророцы и вси людiе, глаголюще: смертiю да умретъ,
26:9 См.: 🔗Иер. 7:12	яко прорече именемъ Господнимъ, глаголя: якоже Силомъ будетъ сей домъ, и градъ сей опустѣетъ от­ живущихъ. И собрашася вси людiе на иеремію въ дому Господни.
26:10 См.: 🔗Иер. 36:10	И слышаша князи Иудины словеса сiя, и взыдоша от­ дому царева въ домъ Господень и сѣдоша во преддверiи вратъ дому Господня новыхъ.
26:11 См.: 🔗Плч. 4:13	И рѣша жерцы и лжепророцы княземъ и всѣмъ людемъ, глаголюще: судъ смертный человѣку сему, яко прорече на сей градъ, якоже слышасте во ушы ваши.
26:12	И рече иереміа ко всѣмъ княземъ и ко всѣмъ людемъ, глаголя: Господь посла мя прорещи на домъ сей и на градъ сей вся словеса, яже слышасте:
26:13 См.: 🔗Иер. 7:3	и нынѣ лучшыя сотворите пути вашя и дѣла ваша и послушайте гласа Господа Бога ва­шего, и престанетъ Господь от­ золъ, яже глагола на вы:
26:14	и се, азъ въ рукахъ вашихъ, сотворите ми якоже угодно и якоже лучше вамъ являет­ся:
26:15 См.: 🔗Иер. 22:17 🔗Мф. 23:35	но разумѣюще да уразумѣете, яко аще убiете мя, кровь неповин­ну дадите сами на ся и на градъ сей и на живущыя въ немъ: яко по­истин­нѣ посла мя Господь къ вамъ глаголати во ушы ваши вся словеса сiя.
26:16	И рѣша князи и вси людiе ко жерцемъ и ко лжепророкомъ: нѣсть человѣку сему судъ смертный, яко во имя Господа на­шего глагола къ намъ.
26:17	И восташа мужiе от­ старѣйшинъ земскихъ и рѣша всему собору людскому, глаголюще:
26:18 См.: 🔗Мих. 1:1 🔗Мих. 3:12	Михеа мораѳитскiй бѣ пророче­ст­вуя во дни езекіи царя Иудина и рече всѣмъ людемъ Иудинымъ, глаголя: тако рече Господь: Сiонъ яко нива изорет­ся, и Иерусалимъ яко въ путь непроходный будетъ, и гора храма будетъ въ лугъ дубравный.
26:19 См.: 🔗Иер. 18:8 🔗Ион. 3:10	Еда убивая уби его езекіа царь Иудинъ и вси людiе Иудины? не убояшалися убо Господа? И понеже помолишася лицу Господню, и почи Господь от­ золъ, яже глаголаше на ня: и мы сотворихомъ злобы велики на душы нашя.
26:20 См.: 🔗Суд. 18:12	И бѣ человѣкъ прорицая именемъ Господнимъ, уріа сынъ самеовъ от­ карiаѳiарима, и прорече на градъ сей и о земли сей по всѣмъ словесемъ иереміинымъ.
26:21	И слыша царь Иоакимъ и вси князи вся словеса его и искаху убити его: и слыша уріа и убояся, и бѣжа и прiиде во Египетъ.
26:22	И посла царь Иоакимъ мужы во Египетъ, Елдаѳана сына Ахорова и мужы съ нимъ во Египетъ,
26:23 См.: 🔗Иер. 22:17	и изведоша его от­туду и при­­ведоша его ко царю, и порази его мечемъ и вверже его во гробъ сыновъ людій сво­ихъ.
26:24 См.: 🔗4Цар. 22:12 🔗4Цар. 25:22 🔗Иер. 39:14	Обаче рука Ахикама сына Сафаніина бѣ со иереміею, еже не предати его въ руцѣ людій, да не убiютъ его.