Книга Бытия, глава 42

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 42
42:1 См.: 🔗Деян. 7:12	Видѣвъ же Иаковъ, яко купля есть [пшеницы] во Египтѣ, рече сыномъ сво­имъ: почто не радите?
42:2	Се, слышахъ, яко есть пшеница во Египтѣ: идите тамо и купите намъ мало пищи, да живи будемъ и не умремъ.
42:3	Идоша же братiя Иосифовы десять купити пшеницы во Египетъ.
42:4 См.: 🔗Быт. 43:5	Венiамина же, брата Иосифова, не от­пусти съ братiею его, рече бо: да не когда случит­ся [на пути] ему зло.
42:5	Прiидоша же сынове Израилевы купити съ при­­ходящими: бяше бо гладъ въ земли Ханаанстѣй.
42:6 См.: 🔗Быт. 37:7 🔗Быт. 41:40	Иосифъ же бяше князь земли: сей продаяше всѣмъ людемъ земли [тоя]. Пришедше же братiя Иосифовы, поклонишася ему лицемъ до земли.
42:7 См.: 🔗Быт. 43:7 🔗Быт. 44:19	Видѣвъ же Иосифъ братiю свою, позна: и от­чужда­шеся ихъ, и глаголаше имъ жестоко, и рече имъ: от­куду прiидосте? Они же рѣша: от­ земли Ханаанскiя купити пищи.
42:8	Позна же Иосифъ братiю свою: они же не познаша его.
42:9 См.: 🔗Быт. 37:5	И помяну Иосифъ сны своя, яже видѣ онъ: и рече имъ: соглядатаи есте, соглядати путій страны [сея] прiидосте.
42:10	Они же рѣша: ни, господине, раби тво­и прiидохомъ купити пищи:
42:11	вси есмы сынове единаго человѣка: мирницы есмы, не суть раби тво­и соглядатаи.
42:12	Рече же имъ: ни, но пути земли [сея] прiидосте соглядати.
42:13 См.: 🔗Быт. 37:33 🔗Быт. 44:20	Они же рѣша: два­на­де­сять есмы братiя раби тво­и въ земли Ханаани: и се, меншiй [от­ насъ] со отцемъ нашимъ днесь, а другаго нѣсть.
42:14	Рече же имъ Иосифъ: сiе есть, еже рекохъ вамъ, глаголя, яко соглядатаи есте:
42:15 См.: 🔗Быт. 43:5 🔗Быт. 44:23	въ семъ явитеся: тако ми здравiя фараоня, не изыдете от­сюду, аще братъ вашъ меншiй не прiидетъ сѣмо:
42:16	послите от­ себе единаго, и воз­мите брата ва­шего: вы же держими будите, дондеже явѣ будутъ словеса ваша, аще истин­ствуете, или ни: аще же ни, тако ми здравiя фараоня, во­истин­ну соглядатаи есте.
42:17	И даде я подъ стражу на три дни.
42:18	Рече же имъ въ день третiй: сiе сотворите, и живи будете: Бога бо азъ боюся:
42:19	аще мирницы есте, братъ вашъ да удержит­ся единъ подъ стражею: сами же идите и от­везите купленую пшеницу вашу,
42:20 См.: 🔗Быт. 43:8	и брата ва­шего меншаго при­­ведите ко мнѣ, и вѣрна будутъ словеса ваша: аще же ни, умрете. И сотвориша тако.
42:21 См.: 🔗Быт. 37:25	И рече кійждо къ брату сво­ему: ей, во грѣсѣхъ бо есмы брата ради на­шего, яко презрѣхомъ скорбѣнiе души его, егда моляшеся намъ, и не послушахомъ его: и сего ради прiиде на ны скорбѣнiе сiе.
42:22 См.: 🔗Быт. 37:21	Отвѣщавъ же Рувимъ, рече имъ: не рѣхъ ли вамъ, глаголя: не преобидите дѣтища? И не послушасте мене: и се, кровь его взыскует­ся.
42:23	Тіи же не вѣдѣша, яко разумѣетъ Иосифъ: толмачь бо между ими бяше.
42:24	Отвратився же от­ нихъ, проплакася Иосифъ: и паки прiиде къ нимъ и рече имъ. И поя Симеона от­ нихъ, и связа его предъ ними.
42:25	Повелѣ же Иосифъ наполнити сосуды ихъ пшеницы и воз­вратити сребро ихъ комуждо во вретище свое и дати имъ брашно на путь. И бысть имъ тако.
42:26	И воз­ложив­ше пшеницу на ослы своя, от­идоша от­туду.
42:27	Отрѣшивъ же единъ вретище свое дати пищу осломъ сво­имъ, идѣже сташа, и видѣ узолъ сребра сво­его, и бѣ верху устiя вретищнаго.
42:28	И рече братiи сво­ей: воз­вращено ми есть сребро, и се, сiе во вретищи мо­емъ. И ужасеся сердце ихъ: и воз­мятошася, другъ ко другу глаголюще: что сiе сотвори Богъ намъ?
42:29	Прiидоша же ко Иакову, отцу сво­ему, въ землю Ханааню и повѣдаша ему вся случив­шаяся имъ, глаголюще:
42:30	глагола мужъ господинъ земли [оныя] къ намъ жестоко и вверже насъ въ темницу, аки согляда­ю­щихъ землю:
42:31	рѣхомъ же ему: мирницы есмы, нѣсмы соглядатаи:
42:32	два­на­де­сять братiя есмы, сынове отца на­шего: единаго нѣсть, а меншiй со отцемъ нашимъ днесь въ земли Ханаани:
42:33	рече же намъ мужъ господинъ земли [тоя]: по сему увѣмъ, яко мирницы есте: брата единаго оставите здѣ у мене, а купленую пшеницу дому ва­шему вземше от­идите
42:34	и при­­ведите ко мнѣ брата ва­шего меншаго: и увѣмъ, яко не соглядатаи есте, но яко мирницы есте: и брата ва­шего от­дамъ вамъ, и куплю творите въ земли.
42:35 См.: 🔗Быт. 43:18 🔗Быт. 44:1	Бысть же егда испраздняху вретища своя, и бяше узолъ сребра во вретищи ко­егождо ихъ: и видѣша узлы сребра сво­его сами и отецъ ихъ, и убояшася.
42:36 См.: 🔗Быт. 37:33	Рече же имъ Иаковъ отецъ ихъ: мене безчадна сотвористе: Иосифа нѣсть, Симеона нѣсть, и Венiамина ли поймете? На мя быша сiя вся.
42:37 См.: 🔗Быт. 46:9	Рече же Рувимъ отцу сво­ему, глаголя: дво­ихъ сыновъ мо­ихъ убій, аще не при­­веду его къ тебѣ: даждь его въ руцѣ мо­и, и азъ при­­веду его къ тебѣ.
42:38 См.: 🔗Быт. 37:35 🔗Быт. 44:29	Онъ же рече: не пойдетъ сынъ мой съ вами, яко братъ его умре, и той единъ оста: и случит­ся ему зло на пути, въ оньже аще пойдете, и сведете старость мою съ печалiю во адъ.