Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Псалом 45 | |
45:1 См.: 🔗Пс. 41:1 | Въ конецъ, о сынѣхъ Кореовыхъ, о тайныхъ, псаломъ. |
45:2 | Богъ намъ прибѣжище и сила, помощникъ въ скорбехъ обрѣтшихъ ны зѣло. |
45:3 | Сего ради не убоимся, внегда смущается земля, и прелагаются горы въ сердца морская. |
45:4 | Возшумѣша и смятошася воды ихъ, смятошася горы крѣпостiю его. |
45:5 | Рѣчная устремленiя веселятъ градъ Божiй: освятилъ есть селенiе свое Вышнiй. |
45:6 | Богъ посредѣ его, и не подвижится: поможетъ ему Богъ утро заутра. |
45:7 | Смятошася языцы, уклонишася царствiя: даде гласъ Свой Вышнiй, подвижеся земля. |
45:8 См.: 🔗Рим. 8:31 | Господь силъ съ нами, заступникъ нашъ Богъ Иаковль. |
45:9 См.: 🔗Пс. 65:5 | Прiидите и видите дѣла Божiя, яже положи чудеса на земли: |
45:10 | отъемля брани до конецъ земли, лукъ сокрушитъ и сломитъ оружiе, и щиты сожжетъ огнемъ. |
45:11 См.: 🔗Ис. 64:2 | Упразднитеся и разумѣйте, яко Азъ есмь Богъ: вознесуся во языцѣхъ, вознесуся на земли. |
45:12 См.: 🔗Рим. 8:31 | Господь силъ съ нами, заступникъ нашъ Богъ Иаковль. |