Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 1 | |
1:1 См.: 🔗Мф. 27:57 🔗1Цар. 9:5 | И бысть человѣкъ от Армаѳемъ Сифы, от горы Ефремли, и имя ему Елкана сынъ Иеремiиль, сына Иліина, сына Ѳокеля въ Насивѣ от Армаѳема от горы Ефремли: |
1:2 См.: 🔗Быт. 29:31 🔗Лк. 1:7 | и сему двѣ жены [быша]: имя единѣй Анна и имя вторѣй Феннана: и бяху Феннанѣ дѣти, Аннѣ же не бяше отрочате. |
1:3 | И восхождаше человѣкъ от дне до дне изъ града своего Армаѳема покланятися и жрети Господу Богу Саваоѳу въ Силомъ. И тамо бѣ Илій и два сына его Офни и Финеесъ, жерцы Господни. |
1:4 | И бысть день, и пожре Елкана и даде Феннанѣ женѣ своей и сыномъ ея и дщеремъ ея части: |
1:5 См.: 🔗Быт. 20:18 🔗Быт. 29:30 | Аннѣ же даде часть едину, яко не бѣ ей чада, обаче Анну любляше Елкана паче Феннаны. И Господь затвори ложесна ея: |
1:6 | занеже не даде ей Господь чада по скорби ея и по сѣтованiю оскорбленiя ея, и сѣтоваше сего ради, яко затвори Господь утробу ея не дати ей чада. |
1:7 | Тако творяше от года до года, внегда приходити ей въ домъ Господень: [укоряше ея тако,] и сѣтоваше, и плакаше, и не ядяше. |
1:8 | И рече ей Елкана мужъ ея: Анна. И рече ему: се, азъ, господи. И рече ей: что ти есть, яко плачешися? и почто не яси? и почто бiеши сердце твое? нѣсмь ли азъ тебѣ добрѣе паче десяти чадъ? |
1:9 См.: 🔗1Цар. 3:3 | И воставши Анна по яденiи ихъ въ Силомѣ, и ста предъ Господемъ. Илій же жрецъ сѣдяше на престолѣ, при празѣ двери храма Господня. |
1:10 | И та умиленна душею, и помолися Господу и плачущи проплака, |
1:11 | и обѣща обѣтъ Господу, глаголющи: Адонаи Господи Елои Саваоѳъ, аще призирая призриши на смиренiе рабы твоея и помянеши мя, и даси рабѣ твоей сѣмя мужеско, то дамъ е предъ тобою въ даръ до дне смерти его: и вина и пiянственнаго не испiетъ, и желѣзо не взыдетъ на главу его. |
1:12 | И бысть егда умножи молящися предъ Господемъ, Илій же жрецъ смотряше на уста ея. |
1:13 | И та глаголаше въ сердцы своемъ, токмо устнѣ ея двизастѣся, а гласъ ея не слышашеся: и мняше ю Илій пiяну сущу. |
1:14 | И рече ей Илій: доколѣ пiяна будеши? отими вино твое и иди от мѣста Господня. |
1:15 См.: 🔗Пс. 41:5 | И отвѣща Анна и рече: ни, господи: жена въ жестокъ день азъ есмь, вина и пiянства не пихъ, но изливаю предъ Господемъ душу мою: |
1:16 | не даждь рабы твоея во дщерь погибели, яко от множества глумленiя моего и от множества сѣтованiя моего истаяхъ даже доселѣ. |
1:17 См.: 🔗4Цар. 5:19 | И отвѣща Илій и рече къ ней: иди съ миромъ, Богъ Израилевъ да дастъ ти все прошенiе твое, еже просила еси от него. |
1:18 См.: 🔗Руф. 2:13 | И рече Анна: обрѣте раба твоя благодать предъ очима твоима. И иде жена въ путь свой, и вниде во обитель свою, и яде съ мужемъ своимъ и пи, и лице ея не испаде ктому. |
1:19 См.: 🔗Быт. 30:22 | И утреневаша заутра, и поклонишася Господу, и идоша путемъ своимъ. И вниде Елкана въ домъ свой во Армаѳемъ и позна Елкана жену свою Анну: и помяне ю Господь, и зачатъ. |
1:20 См.: 🔗Евр. 11:32 | И бысть во время дній, и роди Анна сына и нарече имя ему Самуилъ: и рече: яко от Господа Бога Саваоѳа испросихъ его. |
1:21 | И взыде человѣкъ Елкана и весь домъ его въ Силомъ пожрети жертву дній и обѣты своя и вся десятины земли своея. |
1:22 | Анна же не взыде съ нимъ, яко рече мужеви своему: дондеже взыдетъ отроча, и аще отдою е, тогда явится лицу Господню и пребудетъ тамо до вѣка. |
1:23 | И рече ей Елкана мужъ ея: твори благое предъ очима твоима, сѣди дондеже отдоиши е: но да утвердитъ Господь [слово твое], изшедшее изъ устъ твоихъ. И сѣде жена, и млекомъ питаше сына своего, дондеже отдои его. |
1:24 | И взыде съ нимъ въ Силомъ, егда отдои его, съ телцемъ трилѣтнымъ и съ хлѣбы и со ефи муки пшеничны и мѣхомъ вина: и внидоша въ домъ Господень въ Силомъ, и отроча съ ними. |
1:25 См.: 🔗1Цар. 1:7 | И приведоша е предъ Господа: и закла отецъ его жертву, юже творяше от дній на дни Господеви: и приведоша отроча, и закла телца. И приведе Анна мати отроча ко Илію |
1:26 | И рече: во мнѣ, Господи, да живетъ душа твоя, господине мой, азъ жена стоявшая предъ тобою, о семъ помолитися Господу: |
1:27 | О отрочати семъ молихся, и даде ми Господь прошенiе мое, еже просихъ у него: |
1:28 | И азъ отдаю е Господеви во вся дни живота его на служенiе Господеви. И поклонися тамо Господеви. |