|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 8 | |
| 8:1 | Не сварися съ человѣкомъ сильнымъ, и да не когда впадеши въ руцѣ его. |
| 8:2 | Не тяжися съ человѣкомъ богатымъ, да не когда отяготитъ ти мѣру: |
| 8:3 | многихъ бо погуби злато, и сердца царская преклони. |
| 8:4 | Не сварися съ человѣкомъ язычнымъ и не накладай на огнь его дровъ. |
| 8:5 | Не играй съ ненаказаннымъ, да не прiимутъ безчестiя прародителiе твои. |
| 8:6 | Не поноси человѣку обращающуся от грѣха: помяни, яко вси есмы во епитимiахъ. |
| 8:7 | Не безчести человѣка въ старости его: ибо и ты самъ состарѣешися. |
| 8:8 | Не радуйся о мертвецѣ бывшемъ враждебнѣйшемъ тебѣ: помяни, яко вси умираемъ. |
| 8:9 | Не презри повѣсти премудрыхъ и въ притчахъ ихъ живи: |
| 8:10 | яко от нихъ навыкнеши наказанiю и служити вельможамъ удобно. |
| 8:11 | Не отступай от повѣсти старцевъ: ибо тіи навыкоша от отецъ своихъ: |
| 8:12 | яко от нихъ навыкнеши разуму и во время потребно дати отвѣтъ. |
| 8:13 | Не возгнѣщай углiя грѣшнику, да не сгориши огнемъ пламене его. |
| 8:14 | Не востани на лице досадителево, да не присѣдитъ яко навѣтникъ устомъ твоимъ. |
| 8:15 | Взаимъ не дай человѣку крѣпльшу тебе, и аще даси, буди якоже погубивый. |
| 8:16 | Не поручайся выше силы твоея: и аще поручишися, яко воздаяй пецыся. |
| 8:17 | Не сварися со судiею: по разсужденiю бо его будутъ судити ему. |
| 8:18 | Съ дерзымъ не ходи на путь, яко да не отяготится на тя: той бо сотворитъ по воли своей, и съ буйствомъ его погибнеши. |
| 8:19 | Съ яростивымъ не сварися и не иди съ нимъ сквозѣ пустыню: предъ очима бо его кровь яко ничтоже есть, и идѣже нѣсть помощи, тамо низложитъ тя. |
| 8:20 | Съ буимъ совѣта не твори: не возможетъ бо слова удержати. |
| 8:21 | Предъ чужимъ не твори тайнаго: не вѣси бо, что родитъ ти. |
| 8:22 | Всякому человѣку не являй сердца твоего, да не воздастъ ти благодати ложныя. |
