Книга Исход, глава 3

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 3
3:1	Моисей же бяше пасый овцы Иоѳора тестя сво­его, священ­ника Мадiамска: и гна­ше овцы въ пустыню, и прiиде въ гору Божiю Хоривъ.
3:2 См.: 🔗Деян. 7:30	Явися же ему Ангелъ Господень въ пламени огнен­нѣ изъ купины: и видитъ, яко купина горитъ огнемъ, купина же не сгара­ше.
3:3	Рече же Моисей: мимошедъ увижду видѣнiе великое сiе, яко не сгараетъ купина.
3:4 См.: 🔗Сир. 45:5	Егда же видѣ Господь, яко при­­ступаетъ видѣти, воз­зва его Господь изъ купины, глаголя: Моисее, Моисее. Онъ же рече: что есть, Господи?
3:5 См.: 🔗Нав. 5:15	Онъ же рече: не при­­ближайся сѣмо: изуй сапоги от­ ногъ тво­ихъ: мѣсто бо, на немже ты сто­иши, земля свята есть.
3:6 См.: 🔗Мф. 22:32 🔗Мк. 12:26 🔗Лк. 20:37	И рече ему: Азъ есмь Богъ отца тво­его, Богъ Авраамовъ и Богъ Исааковъ и Богъ Иаковль. Отврати же Моисей лице свое: благоговѣяше бо воз­зрѣти предъ Бога.
3:7 См.: 🔗Чис. 20:16	Рече же Господь къ Моисею: видя видѣхъ озлобленiе людей Мо­ихъ, иже во Египтѣ, и вопль ихъ услышахъ от­ дѣлъ при­­ставниковъ: увѣдѣхъ бо болѣзнь ихъ,
3:8	и снидохъ изъяти ихъ от­ руку Египетску, и извести я изъ земли тоя, и ввести ихъ въ землю благу и многу, въ землю кипящую млекомъ и медомъ, въ мѣсто Хананейско и Хеттейско, и Аморрейско и Ферезейско, и Гергесейско и Евейско и Иевусейско:
3:9	и се, нынѣ вопль сыновъ Израилевыхъ прiиде ко Мнѣ, и Азъ видѣхъ тугу, еюже Египтяне стужаютъ имъ:
3:10 См.: 🔗Пс. 104:26	и нынѣ гряди, да послю тя къ фараону царю Египетскому, и изведеши люди Моя, сыны Израилевы изъ земли Египетскiя.
3:11	И рече Моисей къ Богу: кто есмь азъ, яко да пойду къ фараону царю Египетскому, и яко да изведу сыны Израилевы от­ земли Египетскiя?
3:12	Рече же Богъ къ Моисею, глаголя: яко буду съ тобою: и сiе тебѣ знаменiе, яко Азъ тя посылаю: внегда извести тебѣ люди Моя изъ Египта, и помолитеся Богу въ горѣ сей.
3:13	И рече Моисей къ Богу: се, азъ пойду къ сыномъ Израилевымъ и реку къ нимъ: Богъ отецъ нашихъ посла мя къ вамъ: и аще вопросятъ мя, что имя Ему, что реку къ нимъ?
3:14 См.: 🔗Отк. 1:4	И рече Богъ къ Моисею, глаголя: Азъ есмь Сый. И рече: тако речеши сыномъ Израилевымъ: Сый посла мя къ вамъ.
3:15 См.: 🔗Ис. 42:8 🔗Ос. 12:5 🔗Пс. 101:13	И рече Богъ паки къ Моисею: тако речеши сыномъ Израилевымъ: Господь Богъ отецъ нашихъ, Богъ Авраамовъ и Богъ Исааковъ и Богъ Иаковль, посла мя къ вамъ: сiе Мое есть имя вѣчное и память родовъ родомъ:
3:16	при­­шедъ убо собери старцы сыновъ Израилевыхъ и рцы къ нимъ: Господь Богъ отецъ нашихъ явися мнѣ, Богъ Авраамовъ и Богъ Исааковъ и Богъ Иаковль, глаголя: при­­сѣщенiемъ при­­сѣтихъ васъ, и елика случишася вамъ во Египтѣ:
3:17	и рече: изведу васъ от­ озлобленiя Египетскаго въ землю Хананейску и Хеттейску, и Аморрейску и Ферезейску, и Гергесейску и Евейску и Иевусейску, въ землю кипящую млекомъ и медомъ:
3:18 См.: 🔗Исх. 5:1 🔗Исх. 8:1	и послушаютъ гласа тво­его, и внидеши ты и старѣйшины Израилевы къ фараону царю Египетскому, и речеши къ нему: Господь Богъ Еврейскiй воз­зва насъ: да пойдемъ убо путемъ трехъ дній въ пустыню, да пожремъ Господу Богу на­шему:
3:19	Азъ же вѣмъ, яко не от­пуститъ васъ фараонъ царь Египетскiй пойти, аще не рукою крѣпкою:
3:20 См.: 🔗Прем. 10:15 🔗Пс. 104:27	и простеръ руку Мою, поражу Египтяны всѣми чудесы Мо­ими, яже сотворю въ нихъ: и по сихъ от­пуститъ вы,
3:21 См.: 🔗Исх. 11:3	и дамъ благодать людемъ симъ предъ Египтяны: егда же пойдете, не отъидете тщы:
3:22 См.: 🔗Исх. 12:35	но да испроситъ жена от­ сосѣды и подруги сво­ея сосуды сребряны и златы, и ризы: и украсите сыны вашя и дщери вашя, и оберите Египтянъ.