Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 30 | |
30:1 | И глагола Моисей сыномъ Израилевымъ по всѣмъ, елика заповѣда Господь Моисею: |
30:2 | и глагола Моисей княземъ племенъ сыновъ Израилевыхъ, глаголя: сiе слово, еже повелѣ Господь. |
30:3 См.: 🔗Лев. 27:2 | Человѣкъ человѣкъ, иже аще обѣщаетъ обѣтъ Господу, или закленется клятвою, или опредѣлитъ предѣломъ о души своей, не осквернавитъ словесе своего: вся, елика изыдутъ изъ устъ его, да сотворитъ. |
30:4 | Аще же обѣщаетъ жена обѣтъ Господу, или опредѣлитъ опредѣленiе въ дому отца своего въ юности своей, |
30:5 | и услышитъ отецъ ея обѣты ея и опредѣленiя ея, яже опредѣли на душу свою, и премолчитъ отецъ ея, и да состоятся вся обѣты ея, и вся опредѣленiя, яже опредѣли на душу свою, да пребудутъ ей. |
30:6 | Аще же возбраненiемъ возбранитъ отецъ ея, въ оньже день услышитъ вся обѣты ея и опредѣленiя, яже опредѣли на душу свою, не состоятся: и Господь очиститъ ю, яко возбрани отецъ ея. |
30:7 См.: 🔗1Цар. 1:11 | Аще же посягла за мужа, и обѣты ея на ней, по опредѣленiи устъ ея, елика опредѣли на душу свою, |
30:8 | и услышитъ мужъ ея, и премолчитъ ей, въ оньже день услышитъ, и тако состоятся вся обѣты ея, и опредѣленiя ея, яже опредѣли на душу свою, да состоятся. |
30:9 | Аще же возбраненiемъ возбранитъ мужъ ея, въ оньже день услышитъ вся обѣты ея и опредѣленiя ея, яже опредѣли на душу свою, да не пребудутъ, яко мужъ возбрани ей: и Господь очиститъ ю. |
30:10 | И обѣтъ вдовицы и пущеницы, елика аще обѣщаютъ на душу свою, да пребудутъ имъ. |
30:11 | Аще же въ дому мужа ея обѣтъ ея или опредѣленiе, еже на душу ея съ клятвою, |
30:12 | и услышитъ мужъ ея, и премолчитъ ей, и не возбранитъ ей, и состоятся вся обѣты ея, и вся опредѣленiя ея, яже опредѣли на душу свою да состоятся на ню. |
30:13 | Аще же отлучая отлучитъ мужъ ея, въ оньже день услышитъ, вся елика изыдоша изъ устъ ея по обѣтомъ ея и по опредѣлениемъ ея яже на душу ея, не пребудутъ ей: мужъ бо ея отлучилъ есть, и Господь очиститъ ю. |
30:14 | Всякъ обѣтъ и всяка клятва соуза во еже озлобити душу, мужъ ея поставитъ ей, и мужъ ея отъиметъ. |
30:15 | Аще же молча премолчитъ ей день от дне, и поставитъ ей вся обѣты ея, и опредѣленiя яже на ней, поставитъ ей, яко умолча ей въ день, въ оньже услыша. |
30:16 | Аще же отлучая отлучитъ мужъ ея по дни, въ оньже услыша, и прiиметъ грѣхъ свой. |
30:17 | Сiя оправданiя, елика заповѣда Господь Моисею, между мужемъ и между женою его, и между отцемъ и дщерiю въ юности ея, въ дому отчи. |