Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 6 | |
6:1 См.: 🔗Иез. 36:23 🔗Тит. 2:9 | Елицы суть подъ игомъ раби, своихъ господiй всякiя чести да сподобляютъ, да имя Божiе не хулится и ученiе. |
6:2 | Имущiи же вѣрныхъ господiй да не нерадятъ о нихъ, понеже братiя суть: но паче да работаютъ, зане вѣрни суть и возлюблени, иже благодать воспрiемлющiи. Сiя учи и моли. |
6:3 См.: 🔗1Кор. 2:2 | Аще ли кто инако учитъ и не приступаетъ къ здравымъ словесемъ Господа нашего Иисуса Христа и ученiю, еже по благовѣрiю, |
6:4 | разгордѣся, ничтоже вѣдый, но недугуяй о стязанiихъ и словопрѣнiихъ, от нихже бываетъ зависть, рвенiе, хулы, непщеванiя лукава, |
6:5 | бесѣды злыя растлѣнныхъ человѣковъ умомъ и лишенныхъ истины, непщующихъ приобрѣтенiе быти благочестiе. Отступай от таковыхъ. |
6:6 См.: 🔗Прит. 15:17 | Есть же снисканiе велiе благочестiе съ доволствомъ. |
6:7 См.: 🔗Иов. 1:21 🔗Пс. 48:18 | Ничтоже бо внесохомъ въ мiръ сей: явѣ, яко ниже изнести что можемъ. |
6:8 См.: 🔗Быт. 28:20 | Имѣюще же пищу и одѣянiе, сими доволни будемъ. |
6:9 См.: 🔗Мк. 4:19 🔗Лк. 12:15 | А хотящiи богатитися впадаютъ въ напасти и сѣть, и въ похоти многи несмысленны и вреждающыя, яже погружаютъ человѣки во всегубителство и погибель: |
6:10 | корень бо всѣмъ злымъ сребролюбiе есть, егоже нѣцыи желающе заблудиша от вѣры, и себе пригвоздиша болѣзнемъ многимъ. |
6:11 | Ты же, о, человѣче Божiй, сихъ бѣгай: [Зач. 288.] гони же правду, благочестiе, вѣру, любовь, терпѣнiе, кротость: |
6:12 | подвизайся добрымъ подвигомъ вѣры, емлися за вѣчную жизнь, въ нюже и званъ былъ еси, и исповѣдалъ еси доброе исповѣданiе предъ многими свидѣтели. |
6:13 | Завѣщаваю ти предъ Богомъ оживляющимъ всяческая, и Христомъ Иисусомъ свидѣтелствовавшимъ при Понтійстѣмъ Пилатѣ доброе исповѣданiе: |
6:14 | соблюсти тебѣ заповѣдь нескверну и незазорну, даже до явленiя Господа нашего Иисуса Христа, |
6:15 См.: 🔗1Тим. 1:11 🔗Отк. 17:14 | еже во своя времена явитъ блаженный и единъ сильный, Царь царствующихъ и Господь господствующихъ, |
6:16 См.: 🔗Ин. 1:18 🔗1Ин. 4:12 | единъ имѣяй безсмертiе и во свѣтѣ живый неприступнѣмъ, Егоже никтоже видѣлъ есть от человѣкъ, ниже видѣти можетъ: емуже честь и держава вѣчная. Аминь. |
6:17 См.: 🔗Мк. 4:19 🔗Лк. 12:15 | [Зач. 289.] Богатымъ въ нынѣшнемъ вѣцѣ запрещай не высокомудрствовати, ниже уповати на богатство погибающее, но на Бога жива, дающаго намъ вся обилно въ наслажденiе: |
6:18 | благое дѣлати, богатитися въ дѣлѣхъ добрыхъ, благоподатливымъ быти, общителнымъ, |
6:19 См.: 🔗Мф. 6:20 🔗Лк. 12:33 | сокровищующе себѣ основанiе добро въ будущее, да прiимутъ вѣчную жизнь. |
6:20 См.: 🔗1Тим. 1:4 🔗1Тим. 4:1 | О, Тимоѳее, преданiе сохрани, уклоняяся скверныхъ суесловiй и прекословiй лжеименнаго разума: |
6:21 | о немже нѣцыи хвалящеся, о вѣрѣ погрѣшиша. Благодать съ тобою. Аминь. Конецъ посланiю первому еже къ Тимоѳею святаго апостола Павла: имать въ себѣ главъ 6, зачалъ же церковныхъ 12. |