Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 1 | |
1:1 См.: 🔗Прит. 8:22 🔗1Ин. 1:1 | [Зач. 1.] Въ началѣ бѣ Слово, и Слово бѣ къ Богу {у Бога}, и Богъ бѣ Слово. |
1:2 | Сей бѣ искони къ Богу {у Бога}: |
1:3 | вся Тѣмъ быша, и безъ Него ничтоже бысть, еже бысть. |
1:4 | Въ Томъ животъ бѣ, и животъ бѣ свѣтъ человѣкомъ: |
1:5 См.: 🔗Ин. 3:19 | и свѣтъ во тмѣ свѣтится, и тма его не объятъ. |
1:6 См.: 🔗Мф. 3:1 | Бысть человѣкъ посланъ от Бога, имя ему Иоаннъ: |
1:7 | сей прiиде во свидѣтелство, да свидѣтелствуетъ о Свѣтѣ, да вси вѣру имутъ ему {да вси увѣруютъ чрезъ него}. |
1:8 | Не бѣ той свѣтъ, но да свидѣтелствуетъ о Свѣтѣ: |
1:9 См.: 🔗Ис. 60:1 | бѣ Свѣтъ истинный, Иже просвѣщаетъ всякаго человѣка грядущаго въ мiръ: |
1:10 | въ мiрѣ бѣ, и мiръ Тѣмъ бысть, и мiръ Его не позна: |
1:11 См.: 🔗Мф. 15:24 | во своя прiиде, и свои Его не прiяша. |
1:12 См.: 🔗Рим. 8:15 🔗Гал. 3:26 | Елицы же прiяша Его, даде имъ область чадомъ Божiимъ быти, вѣрующымъ во имя Его, |
1:13 См.: 🔗Ин. 3:5 | иже не от кровѣ, ни от похоти плотскія, ни от похоти мужескiя, но от Бога родишася. |
1:14 | И Слово плоть бысть и вселися въ ны, и видѣхомъ славу Его, славу яко Единороднаго от Отца, исполнь благодати и истины. |
1:15 См.: 🔗Мф. 3:11 | Иоаннъ свидѣтелствуетъ о Немъ и воззва глагола: Сей бѣ, Егоже рѣхъ, Иже по мнѣ Грядый, предо мною бысть, яко первѣе мене бѣ. |
1:16 См.: 🔗Еф. 1:6 🔗Кол. 1:19 | И от исполненiя Его мы вси прiяхомъ и благодать возъ благодать: |
1:17 См.: 🔗Исх. 20:1 🔗Рим. 3:24 | яко законъ Моисеомъ данъ бысть, благодать [же] и истина Иисусъ Христомъ бысть. |
1:18 | [Зач. 2.] Бога никтоже видѣ нигдѣже: Единородный Сынъ, сый въ лонѣ Отчи, Той исповѣда. |
1:19 См.: 🔗Ин. 5:33 | И сiе есть свидѣтелство Иоанново, егда послаша Жидове от Иерусалима иереевъ и левитовъ, да вопросятъ его: ты кто еси? |
1:20 См.: 🔗Ин. 3:28 🔗Деян. 13:25 | И исповѣда и не отвержеся: и исповѣда, яко нѣсмь азъ Христосъ. |
1:21 | И вопросиша его: что убо? Илiа ли еси ты? И глагола: нѣсмь. Пророкъ ли еси? И отвѣща: ни. |
1:22 | Рѣша же ему: кто еси? Да отвѣтъ дамы пославшымъ ны: что глаголеши о тебѣ самѣмъ? |
1:23 | Рече: азъ гласъ вопiющаго въ пустыни: исправите путь Господень, якоже рече Исаiа пророкъ. |
1:24 | И посланнiи бѣху от фарисей: |
1:25 | и вопросиша его и рѣша ему: что убо крещаеши, аще ты нѣси Христосъ, ни Илiа, ни пророкъ? |
1:26 | Отвѣща имъ Иоаннъ, глаголя: азъ крещаю водою: посредѣ же васъ стоитъ, Егоже вы не вѣсте: |
1:27 | Той есть Грядый по мнѣ, Иже предо мною бысть, Емуже нѣсмь азъ достоинъ, да отрѣшу ремень сапогу Его. |
1:28 | Сiя въ Виѳаварѣ быша объ онъ полъ Иордана, идѣже бѣ Иоаннъ крестя. |
1:29 См.: 🔗Исх. 12:3 🔗Ис. 53:7 | [Зач. 3.] Во утрiй [же] видѣ Иоаннъ Иисуса грядуща къ себѣ и глагола: се, Агнецъ Божiй, вземляй грѣхи мiра: |
1:30 | Сей есть, о Немже азъ рѣхъ: по мнѣ грядетъ Мужъ, Иже предо мною бысть, яко первѣе мене бѣ: |
1:31 См.: 🔗Мк. 1:4 | и азъ не вѣдехъ Его: но да явится Израилеви, сего ради прiидохъ азъ водою крестя. |
1:32 | И свидѣтелствова Иоаннъ, глаголя, яко видѣхъ Духа сходяща яко голубя съ небесе, и пребысть на Немъ: |
1:33 | и азъ не вѣдѣхъ Его: но Пославый мя крестити водою, Той мнѣ рече: надъ Негоже узриши Духа сходяща и пребывающа на Немъ, Той есть крестяй Духомъ Святымъ: |
1:34 | и азъ видѣхъ и свидѣтелствовахъ, яко Сей есть Сынъ Божiй. |
1:35 | [Зач. 4.] Во утрiй [же] паки стояше Иоаннъ, и от ученикъ его два. |
1:36 | И узрѣвъ Иисуса грядуща, глагола: се, Агнецъ Божiй. |
1:37 | И слышаста его оба ученика глаголющаго, и по Иисусѣ идоста. |
1:38 | Обращься же Иисусъ и видѣвъ я по Себѣ идуща, глагола има: чесо ищета? Она же рѣста Ему: Равви, еже глаголется сказаемо Учителю, гдѣ живеши? |
1:39 | [И] глагола има: прiидита и видита. Прiидоста и видѣста, гдѣ живяше, и у Него пребыста день той. Бѣ же часъ десятый. |
1:40 | Бѣ [же] Андрей, братъ Симона Петра, единъ от обою слышавшею от Иоанна и по Немъ шедшею. |
1:41 | Обрѣте сей прежде брата своего Симона и глагола ему: обрѣтохомъ Мессію, еже есть сказаемо Христосъ. |
1:42 См.: 🔗Мф. 16:18 | И приведе его ко Иисусови. Воззрѣвъ же нань Иисусъ рече: ты еси Симонъ сынъ Ионинъ: ты наречешися Кифа, еже сказается Петръ. |
1:43 | [Зач. 5.] Во утрiй [же] восхотѣ изыти въ Галилею: и обрѣте Филиппа и глагола ему: гряди по Мнѣ. |
1:44 | Бѣ [же] Филиппъ от Виѳсаиды, от града Андреова и Петрова. |
1:45 | Обрѣте Филиппъ Наѳанаила и глагола ему: Егоже писа Моисей въ законѣ и пророцы, обрѣтохомъ Иисуса сына Иосифова, иже от Назарета. |
1:46 | И глагола ему Наѳанаилъ: от Назарета можетъ ли что добро быти? Глагола ему Филиппъ: прiиди и виждь. |
1:47 | Видѣ [же] Иисусъ Наѳанаила грядуща къ Себѣ и глагола о немъ: се, воистинну Израилтянинъ, въ немже льсти нѣсть. |
1:48 | Глагола Ему Наѳанаилъ: како мя знаеши? Отвѣща Иисусъ и рече ему: прежде даже не возгласи тебе Филиппъ, суща тя подъ смоковницею видѣхъ тя. |
1:49 | Отвѣща Наѳанаилъ и глагола Ему: Равви, Ты еси Сынъ Божiй, ты еси Царь Израилевъ. |
1:50 | Отвѣща Иисусъ и рече ему: зане рѣхъ ти, яко видѣхъ тя подъ смоковницею, вѣруеши: болша сихъ узриши. |
1:51 См.: 🔗Быт. 28:12 | И глагола ему: аминь, аминь глаголю вамъ, отселѣ узрите небо отверсто и Ангелы Божiя восходящыя и низходящыя надъ Сына Человѣческаго. |