Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 1 | |
1:1 | [Зач. 1.] Зачало Евангелiа Иисуса Христа, Сына Божiя, |
1:2 | якоже есть писано во пророцѣхъ: се, Азъ посылаю Ангела Моего предъ лицемъ Твоимъ, иже уготовитъ путь Твой предъ Тобою. |
1:3 | Гласъ вопiющаго въ пустыни: уготовайте путь Господень, правы творите стези Его. |
1:4 | Бысть Иоаннъ крестяй въ пустыни и проповѣдая крещенiе покаянiя во отпущенiе грѣховъ. |
1:5 | И исхождаше къ нему вся Иудейская страна и Иерусалимляне: и крещахуся вси во Иорданѣ рѣцѣ от него, исповѣдающе грѣхи своя. |
1:6 См.: 🔗Лев. 11:22 🔗Мф. 3:4 | Бѣ же Иоаннъ оболченъ власы велблужди, и поясъ усменъ о чреслѣхъ его, и ядый акриды и медъ дивiй. |
1:7 | И проповѣдаше, глаголя: грядетъ Крѣплiй мене вслѣдъ мене, Емуже нѣсмь достоинъ преклонься разрѣшити ремень сапогъ Его: |
1:8 | азъ убо крестихъ вы водою: Той же креститъ вы Духомъ Святымъ. |
1:9 | [Зач. 2.] И бысть во онѣхъ днехъ, прiиде Иисусъ от Назарета Галилейскаго и крестися от Иоанна во Иорданѣ. |
1:10 | И абiе восходя от воды, видѣ разводящася небеса и Духа яко голубя, сходяща Нань. |
1:11 | И гласъ бысть съ небесе: Ты еси Сынъ Мой возлюбленный, о Немже благоволихъ. |
1:12 | И абiе Духъ изведе Его въ пустыню. |
1:13 | И бѣ ту въ пустыни дній четыредесять, искушаемь сатаною, и бѣ со звѣрьми: и Ангели служаху Ему. |
1:14 | По преданiи же Иоанновѣ, прiиде Иисусъ въ Галилею, проповѣдая Евангелiе Царствiя Божiя |
1:15 См.: 🔗Мф. 4:17 | и глаголя, яко исполнися время и приближися Царствiе Божiе: покайтеся и вѣруйте во Евангелiе. |
1:16 См.: 🔗Мф. 4:18 | [Зач. 3.] Ходя же при мори Галилейстѣмъ, видѣ Симона и Андреа брата [того] Симона, вметающа мрежи въ море: бѣста бо рыбаря. |
1:17 | И рече има Иисусъ: прiидита вслѣдъ Мене, и сотворю васъ быти ловца человѣкомъ. |
1:18 | И абiе оставльша мрежи своя, по Немъ идоста. |
1:19 | И прешедъ мало оттуду, узрѣ Иакова Зеведеова и Иоанна брата его, и та въ корабли строяща мрежа: |
1:20 | и абiе воззва я. И оставльша отца своего Зеведеа въ корабли съ наемники, по Немъ идоста. |
1:21 | И внидоша въ Капернаумъ: и абiе въ субботы вшедъ въ сонмище, учаше. |
1:22 | И дивляхуся о ученiи Его: бѣ бо учя ихъ яко власть имый, и не яко книжницы. |
1:23 См.: 🔗Лк. 4:33 | [Зач. 4.] И бѣ въ сонмищи ихъ человѣкъ въ дусѣ нечисте, и воззва, |
1:24 | глаголя: остави, что намъ и Тебѣ, Иисусе Назарянине? Пришелъ еси погубити насъ: вѣмъ Тя, кто еси, Святый Божiй. |
1:25 | И запрети ему Иисусъ, глаголя: умолчи и изыди изъ него. |
1:26 | И стрясе его духъ нечистый, и возопи гласомъ великимъ, и изыде изъ него. |
1:27 | И ужасошася вси, якоже стязатися имъ къ себѣ, глаголющымъ: что есть сiе? [и] что ученiе новое сiе, яко по области и духовомъ нечистымъ велитъ, и послушаютъ Его? |
1:28 | Изыде же слухъ Его абiе во всю страну Галилейску. |
1:29 | [Зач. 5.] И абiе изъ сонмища изшедше, прiидоша въ домъ Симоновъ и Андреовъ, со Иаковомъ и Иоанномъ. |
1:30 | Теща же Симонова лежаше огнемъ жегома: и абiе глаголаша Ему о ней. |
1:31 | И приступль воздвиже ю, емь за руку ея: и остави ю огнь абiе, и служаше имъ. |
1:32 | Поздѣ же бывшу, егда захождаше солнце, приношаху къ Нему вся недужныя и бѣсныя. |
1:33 | И бѣ весь градъ собрался къ дверемъ. |
1:34 | И исцѣли многи злѣ страждущыя различными недуги: и бѣсы многи изгна, и не оставляше глаголати бѣсы, яко вѣдяху Его Христа суща. |
1:35 | [Зач. 6.] И утро, нощи сущей зѣло, воставъ изыде, и иде въ пусто мѣсто, и ту молитву дѣяше. |
1:36 | И гнаша Его Симонъ и иже съ нимъ: |
1:37 | и обрѣтше Его, глаголаша Ему, яко вси Тебе ищутъ. |
1:38 См.: 🔗Лк. 4:43 | И глагола имъ: идемъ въ ближнiя веси и грады, да и тамо проповѣмъ: на сiе бо изыдохъ. |
1:39 | И бѣ проповѣдая на сонмищихъ ихъ, во всей Галилеи, и бѣсы изгоня. |
1:40 | И прiиде къ Нему прокаженъ, моля Его и на колѣну припадая предъ Нимъ, и глаголя Ему, яко, аще хощеши, можеши мя очистити. |
1:41 | Иисусъ же милосердовавъ, простеръ руку, коснуся его, и глагола ему: хощу, очистися. |
1:42 | И рекшу ему, абiе отъиде от него прокаженiе, и чистъ бысть. |
1:43 | И запрещь ему, абiе изгна его: |
1:44 | и глагола ему: блюди, никомуже ничесоже рцы: но шедъ покажися иерееви и принеси за очищенiе твое, яже повелѣ Моисей, во свидѣтелство имъ. |
1:45 | Онъ же изшедъ начатъ проповѣдати много и проносити слово, якоже ктому не мощи Ему явѣ во градъ внити: но внѣ въ пустыхъ мѣстѣхъ бѣ. И прихождаху къ Нему отвсюду. |